Kabanata 6

Eleanor's Point Of View.

Ngunit noong nakapasok kami sa loob, hiniling ko na sana pala ay tinuloy ko na lamang ang meeting kay Damon dahil pagpasok sa loob, nakita ko sa sala ang ex-fiancée ni Arthur—si Bella Nuñez.

Si Bella ay isang kilalang model, half-American at talagang maganda. Naalala ko noon, nang marinig kong ikakasal sila ni Arthur, una kong hinanap ang mga accounts ng babae sa social media dahil wala akong ideya na may girlfriend na ang lalaking mahal ko.

Naalala kong umiyak ako kay Soph dahil pakiramdam ko ay natalo na ako. Na wala na akong pag-asa pa.

Pero nalaman ko kay Papa na ang kasalan na sana ay mangyayari sa kanila ay dahil lamang sa business. Kilala ang pamilya nila Bella sa isang fast food enterprise kaya hindi na nakakapagtaka na gano'n ang nangyari.

Pero hindi ko pa rin maiwasang makaramdam ng sakit dahil nalaman ko mismo sa engagement party nila na matagal na palang may nararamdaman si Arthur para kay Bella, so masaya siyang magpapakasal na sila.

Pero tatlong buwan lang ang tinagal ng engagement dahil sinira ko 'yon.

Flashback

"Bakit matagal na pala niyang mahal si Bella?" umiiyak kong tanong kay Soph habang nasa kwarto ko siya, kakauwi lang namin galing sa engagement party ni Arthur.

Nagkibit-balikat siya sa'kin. "Baka naman childhood friends sila?"

"Hindi. . . Kami ang childhood friends ni Arthur. At hindi rin naman malapit ang pamilya nilang dalawa. Baka naman sinabi lang 'yon ni Arthur para magmukhang hindi para sa business ang kasal nila."

Umilang siya sa kahibangan ko. "Wala pa rin naman magbabago. . . Ikakasal pa rin sila."

Kaagad na tumulo ang luha sa mga mata ko. Hindi ako makapaniwala. Ang lalaking minahal ko simula pagkabata ay ikakasal na.

"Pero kasi. . . Wala ka namang ginawa para iparamdam kay Arthur na mahal mo siya, hindi ba? Hindi niya alam. Wala siyang ideya," wika niya. "Matagal ko nang sinasabi sa'yo 'yan, Eleanor. Take the risk or lose the chance. Gusto mo siya simula pagkabata mo, pero baka hindi niya 'yon maramdaman kasi hindi mo pinapakita."

"Alam mo namang natatakot ako, hindi ba? Matagal na kaming magkaibigan. . . Ayoko namang mawala 'yon dahil lang bigla akong umamin sa kaniya."

"Pero tingnan mo ang nangyayari ngayon, dahil takot kang sumubok, ikakasal na sila."

Muling tumulo ang luha ko sa narinig dahil alam kong tama ang aking kaibigan.

"Mukhang kailangan ko na lang talagang ibaon sa limot 'tong nararamdaman ko."

'Yon ang naging plano ko, kakalimutan ko na ang nararamdaman ko para kay Arthur ngunit mapaglaro talaga ang Tadhana dahil isang araw, nasa isang private cruise ship party kami ni Soph nang bigla niya 'kong tawagan.

"Si Bella ba 'yon?" bulong niya sa'kin, sinundan ko ang tinuturo niya at kaagad na napakunot ang noo ko sa nakita.

Nasa isang table si Bella at may kausap siyang lalaki. Silang dalawa lang sa lamesa. Pinagmasdan ko silang mabuti at mas lalong napakunot ang noo ko noong hawakan ng lalaki ang kamay ni Bella.

"Anong meron sa kanila?" nagtatakang tanong ko habang nakatangin pa rin sa kanila. At nasagot ang tanong ko noong biglang lumapit si Bella at hinalikan sa labi ang lalaki.

Napatakip ako sa bibig habang napamura naman si Soph. At hindi ko alam kung bakit pero kaagad kong kinuha ang cellphone ko para picturan ang nakita namin.

"Kailangan 'tong malaman ni Arthur," wika ko, mabilis ang tibok ng puso dahil sa nakita.

"Pero gaano ka ka-sigurong maniniwala siya sa'yo? Pwedeng sabihin ni Bella na edited ang picture!" sagot nito. "Why don't we just investigate them first? Para marami tayong proof na hawak."

Kaagad akong sumangayon sa sinabi ni Soph, tama siya, kung isang litrato lang ang hawak namin, paniguradong madali lang 'yon mapapalabas na gawa-gawa lang.

Inembistigahan namin ang dalawa at tama ang desisyong 'yon dahil napansin naming madalas silang lumalabas ngunit palaging private na lugar lang pero sapat na ang ebidensiyang hawak namin na may ibang lalaki si Bella.

"So, anong plano mo?" tanong sa'kin ni Soph isang gabi habang nasa sasakyan kami pauwi. "Kailan mo balak sabihin kay Arthur ang totoo? Tatlong buwan na silang engaged ngayon, baka naman hihintayin mo pang ikasal na sila mismo bago pa lumabas ang katotohanan? Walang divorce rito sa Pilipinas."

"Huwag kang mag-alala, sasabihin ko na."

Kinabukasan lang din ay umalis ako ng mansyon para puntahan si Arthur. Saktong siya lamang ang nandoon. . . Noong una ay hindi siya naniwala sa akin pero pinakita ko sa kaniya lahat ng hawak kong ebidensya, at kinabukasan lang no'n, binalitang hindi na tuloy ang kasal.

End Of Flashback

"Long time no see, Arthur," narinig kong wika ni Bella kaya bumalik ako sa ulirat, malaki ang ngiti niya habang nakatingin sa lalaki ngunit nang malipat 'yon sa'kin ay unti-unti 'yong nawala.

"How are you, Bella?" narinig kong tanong ni Arthur, umiwas na lamang ako ng tingin.

"I'm good! Still modeling. Kakauwi ko lang from Francisco. Tita invited me here because she missed me. How about you? How are you?"

"I'm always busy with the company. Alam mo na, it's my passion."

Sasagot pa sana si Bella ngunit may maid na lumapit at sinabing pinapunta si Arthur sa opisina ng Tatay nito. Balak ko sanang sumama ngunit bigla na lang siyang umalis na para bang nakalimutan niya nang kasama niya ako.

Hindi ko alam ang gagawin ko kung susunod ba ako o hindi dahil naiwan akong mag-isa kasama si Bella. Aalis na sana ako ngunit narinig kong nagsalita siya.

"How are you, Eleanor?"

Napahinto ako at nilingon siya. "Ayos lang, ikaw ba?"

"I'm fine too. More than you know.," sagot niya at napatango na lamang ako. "So, how's the life with Arthur being your husband? Dream come true, right? Para kang nasa isang fairy tail, Eleanor. Naging asawa mo ang matagal mo nang mahal."

Natahimik ako sandali dahil ramdam na ramdam ko ang sarcasm sa boses niya. Noong pinakita ko kay Arthur ang mga proof na hawak ko, nalaman kong hindi naman talaga gusto ni Bella ang magpakasal dahil may mahal siyang iba ngunit kailangan niyang sumunod dahil itatakwil siya ng pamilya niya.

Kaya noong araw na 'yon, hindi lang engagement nila ang nasira ko, pati na rin ang relasyon ni Bella sa pamilya niya.