II. INVITATION

Nandito pa rin kami ngayon sa student lounge. Kalmado na si Sofia ngayon at dumating na rin si Mr. Francisco, ang principal ng school namin.

"Hindi mo ba talaga nakilala 'yung lalaking nakita mo sa loob ng CR?" tanong ni Mr. Francisco kay Sofia.

"Hindi po. Nakasuot po kasi siya ng maskara," sagot ni Sofia. Kumunot ang noo ni Mr. Francisco na tila ba naguguluhan din.

Nakita ko ang isang janitor na may dala-dalang trash bag kung saan nakalagay ang kahon na may nakalagay na patay na pusa.

"Hindi kaya estudyante lang din ang gumawa niyan?" tanong ni Mrs. Mariano, ang nanay ni Brix at teacher rin dito sa Greenville University.

"Maaari. Kaya mamayang tanghali, magkakaroon tayo ng inspection," saad ni Mr. Francisco.

Napatayo ako nang makita ko si daddy at ang iba pang pulis na kagagaling lang sa CR.

Dumako ang tingin ko sa kamay niyang may hawak na zip lock at sa loob no'n ay isang duguang kutsilyo.

"Nakita namin ito sa bintana ng cubicle kung saan nakita ang patay na pusa. Dadalhin muna namin ito para ma-imbestigahan," wika ni daddy.

"Thank you, Mr. San Diego," saad ni Mr. Francisco.

Napatingin sa 'kin si daddy at tinanguan ako.

"Alam na 'to ng mommy mo. Nag-aalala siya kaya umuwi ka agad mamaya. Mag-iingat ka," sabi niya sa 'kin.

"Sige po, dad. Mag-ingat din po kayo." Humalik ako sa pisngi niya bago sila tuluyang umalis.

Pinabalik na kami ni Mr. Francisco sa mga classroom namin.

"Nakakatakot! Sana malaman na kung sino ang gumawa no'n," sabi ni Macey. Estudyante nga kaya ang may gawa no'n? Pero bakit naman?

Hindi magandang biro iyon. Napatingin ako kay Sofia na tahimik pa rin na nakaupo sa pwesto niya. Tumayo ako at nilapitan siya.

"Sofia." Nagulat pa siya nang tapikin ko siya sa balikat. "Okay ka na ba talaga? Gusto mo bang pumunta muna sa clinic?"

Ngumiti siya at umiling. "I'm fine. Nagulat lang talaga ako sa nangyari kanina," sagot niya.

Maya-maya lang ay dumating na ang adviser namin. Pinagpatuloy ang klase hanggang sa mag hapon na.

Paglabas namin ng room ay nakita namin si Mr. Francisco sa hallway, kausap niya si Mayor Javier.

"Dad!" Agad lumapit si Sofia kay Mayor Javier.

"Are you okay?" nag-aalalang tanong ng Mayor sa kaniyang anak.

"Yes, dad."

Tumingin sa 'min si Mayor Javier.

"Good afternoon po, Mayor," bati namin.

"Ayos lang ba kayo?" tanong niya.

"Opo, ayos lang po kami." Si Brix ang sumagot.

"Mayor, babalitaan na lang din po namin kayo kapag may nahanap na kaming ebidensya. Pasensya po ulit dahil may ganitong nangyari dito," wika ni Mr. Francisco.

"Okay, thank you. I'll be back tomorrow," sagot ni Mayor pagkatapos ay tumingin kay Sofia.

"Let's go?"

Tumingin sa 'min si Sofia para magpaalam.

"See you tomorrow, guys," paalam nito.

"Bye. Mag-iingat kayo," sabi ko.

Umalis na ang mag-ama. Naiwan kaming apat dito nila Brix, Macey, at Jayson.

"Kailangan ko na rin umuwi. Baka inaantay na 'ko ni mommy sa bahay," paalam ko.

"Hatid na kita," alok ni Brix. Tumango na lang ako.

"Okay! See you tom, love birds!" mapang-asar na sabi ni Macey. Ngumisi naman si Jayson.

"Are you hungry? Gusto mo bang dumaan muna tayo sa coffee shop?" tanong ni Brix.

"Nasa bahay si mommy kaya baka may niluto siya. Sa bahay na lang tayo kumain," nakangiting sabi ko.

"Okay." Nag drive na si Brix paalis ng school. After 15 minutes ay nakarating na rin kami sa bahay.

Pagdating sa bahay ay sinalubong agad ako ni mommy ng yakap.

"Oh my God, anak! Are you okay? Nasaktan ka ba?" nag-aalalang tanong niya.

"I'm fine, mom. Hindi po ako nasaktan. Wala pong nasaktan sa 'min. Kaso po si Sofia natakot dahil siya po ang nakakita do'n sa lalaki," sabi ko.

"Kamusta naman siya ngayon?"

"Medyo ayos naman na po siya ngayon."

"Buti naman kung gano'n. Maupo muna kayo ni Brix. Kukuha lang ako ng makakain ninyo."

"Thank you po, tita," nakangiting saad ni Brix. Nagtungo kami sa sala at naupo sa sofa.

"Estudyante lang kaya ang may gawa no'n?" tanong ko. Kung estudyante nga, ano namang naisip niya para gawin iyon?

"Maybe. But it can also be a threat."

Napatingin ako kay Brix dahil sa sinabi niya at napaisip din ako.

"Hindi rin naman imposible 'yon. Pero para kanino naman kaya ang threat na 'yon?"

Biglang may kumatok kaya napatayo ako.

"Wait, titignan ko muna kung sino 'yon," paalam ko. Lumapit ako sa pinto namin at binuksan 'yon.

"Oh, Mang Isko! Magandang hapon po," bati ko. Nakita kong may hawak siyang isang maliit na red envelope.

"Ano po 'yan?" tanong ko.

"Galing 'to sa mga tauhan ni Mayor, invitation daw." Nilahad niya sa 'kin 'yung isang envelope. "Ito ’yung para sa inyo."

"Salamat po." Pagkakuha ko ng envelope ay nagpaalam na rin si Mang Isko.

"What's that?" tanong ni Brix pagkabalik ko.

"Invitation daw," sagot ko.

Lumabas si mommy galing sa kusina, may dala-dala siyang mga pagkain.

"Ayan na ba 'yung invitation para sa homecoming?" tanong ni mommy.

"Homecoming?" sabay na tanong namin ni Brix.

"Last month ay nakausap ko si Serenity at sabi niya ay malapit na daw sila bumalik!" masayang sabi ni mommy.

Agad kong binuksan ang envelope para malaman kung totoo ang sinasabi niya.

You are cordially invited

To the Homecoming

Of Mayor Solomon Javier's Family!

November 25th

7 o'clock in the evening

Greenville Town Hall

"Totoo nga, mom! Sa November 25 daw gaganapin 'yung homecoming." Tuwang-tuwa si mommy. Bestfriend niya kasi si Tita Serenity at matagal na silang 'di nagkikita.

Finally! Makakasama na ulit ni Sofia ang pamilya niya.

Tinignan ko si Brix na biglang nanahimik. "Bakit ganyan mukha mo? Aren't you happy? Makakasama na ni Sofia ang pamilya niya!"

"Babalik na rin si Sander," saad niya. Nawala ang ngiti sa labi ko.

Masama nga pala loob nito kay Sander, ang kuya ni Sofia.

Gusto akong ligawan ni Sander dati pero masyado pa akong bata. He's too old for me. Para ko na nga siyang kuya, eh.

"It's been five years, Brix. Baka nga may girlfriend na 'yon. Saka kuya lang ang tingin ko kay Sander," sabi ko sa kaniya. Unti-unti ay may sumilay na ngiti sa labi niya.

"Eh, ano ako para sayo?" tanong niya. Agad akong umiwas ng tingin at ininom ang juice na dala ni mommy.

Wait! Si mommy!

Napatingin ako sa harap namin at nandoon pa nga si mommy na nakatingin sa 'min ni Brix.

"Baka gusto n'yo munang kumain," aniya at tinuro ang mga pagkain na nasa table. "Pahiram muna ng invitation para maipakita ko sa daddy mo mamaya."

Inabot ko sa kaniya 'yung invitation pagkatapos ay umakyat na siya sa taas.

"Hmm...anong oras ko kaya maririnig ang sagot mo?" Pagpaparinig ni Brix. Napairap na lang tuloy ako.

"Just eat, Brix! Baka gabihin ka pa," sabi ko.

Narinig ko na lang ang tawa niya na may halong pang-aasar.