KABANATA 34

Tinulungan niya ang mommy niya at ina ni Sky sa pagbitbit ng mga dala ng mga ito. Niyakap naman agad siya ng dalawa na para bang ang tagal nilang hindi nagkita.

Si Audrey ay nakatayo sa may pinto nila na nakahalukipkip. Nakita niya ang pagsulpot ni Sky na preskong-presko na ang mukha.

Nakikipaghuntahan pa ang mga ina nila sa pasilyo ng condo na puro ngiti lang ang sagot niya. Ang mga mata niya naman ay nakapagkit sa dalawa.

Lumingon si Audrey kay Sky. Kitang-kita niya nang matigilan si Sky pagkakita sa babae.

Bigla ay parang gusto niyang pumagitna sa dalawa at hawakan sa braso si Sky. Gusto niyang ipamukha sa pinsan na kanya na talaga ang lalaki.

Pinag-aralan niya ang mukha ni Sky pero kumunot lang ang noo nito. Hindi nito pinansin si Audrey. Dumiretso ito sa kanila at saka lang ngumiti nang salubungin ang mga ina nila. Hinalikan muna nito sa pisngi ang mommy niya saka sumunod naman ang Mama nito.

"Naku, parang nawiwili kayo sa buhay mag-asawa ninyo, ah!" Masayang pansin ng Mama nit