Chapter 16

Hila-hila ko ang kamay ni Lucas habang naglalakad kami papunta sa playground na sinasabi ko. Hindi naman talaga ‘to bukas para sa lahat noon, pero dahil inabanduna nung may-ari, ‘yung mga tao na lang dito ang nag-aalaga at gumagamit.

Nang makarating kami ron ay agad akong umupo sa duyan bago ko nahuli ang palihim na pag ngiti ni Lucas.

“Bata pa lang ako, nakatayo na ‘tong playground na ‘to dito. Noon kasi, may malaking bahay sa tabi nito noon. Giniba at binenta ang lupa. Tapos may bumili, pinatayuan ng bahay at apartment,” kwento ko kay Lucas bago ko nginuso sa kanya ‘yung dalawang bahay na nasa tabi ng playground. “Pinagawa raw nung asawang lalaki ‘tong playground para sa anak niya pero dahil hindi siya nagawang bigyan ng asawa niya, madalas na raw nag-aaway ‘yung mag-asawa hanggang sa napag desisyunan na maghiwalay. Pinatibag ‘yung mansion at binenta ang lupa, pero hinayaan nilang nakatayo itong playground na ‘to rito.” Dagdag ko habang dinuduyan ang sarili.

“Ang sakit naman nun,”