Chapter 6

Pagdating ni Zion sa boy’s dormitory ay naroon na ang isa sa mga kaibigan niyang si Earl, maliit at payat ito kaya hindi masyadong pansinin ng babae.

“Sino yung kausap mo kanina?” Tanong ni Earl kay Zion na kapapasok lang at kasalukuyang inilalapag ang mga dalang gamit.

“Schoolmate lang na nanghihingi ng social media account ko, gusto raw magkaroon ng maraming kaibigan.” Inosenteng sagot ni Zion, habang nanlumo at nakaramdam ng bahagyang inggit si earl.

Dalawang taon na siyang nasa Montessori University pero ni minsan ay wala pang lumapit sa kanyang babae at kinuha ang social media account niya.

“Grabe na talaga ang standard ng mga tao ngayon. Panalo talaga ang mga may itsura,” naiiling na kumento nito.

Naguguluhang tiningnan naman ito ni Zion, ngayon lamang kasi niya narinig ang kaibigan na nagsalita ng gano’n.

“Anong problema? Na-basted ka ba ng nililigawan mo?” Pabirong tanong ni Zion, naupo ito sa tabi ni Earl.

“Iyon na nga ang nakakatawa, wala pa man akong ginagawa ay nilalayuan na ako. Para akong may nakakadiring germs sa katawan kung tingnan ng mga babae sa school natin, kasalanan ‘to nitong balat ko. Kung bakit kasi para akong pinaglihi sa uling,” mahabang litanya ni Earl.

Hindi naman magawang matawa ni Zion, alam niya kasing totoo na ang rant ng kaibigan. Hindi tulad dati na ginagawa lang nitong biro ang kapintasan nito.

“Walang mali sa ‘yo, yung mata ng mga nakakakita ang mali. Gwapo ka naman kahit maitim ka, mahahanap mo rin yung makakakita no’n.” Tinapik ni Zion ang balikat ni Earl na nanlulumo pa rin, mukhang hindi epetibo ang pagpapalakas ng loob niya dito.

“Good morning!” Masiglang bati ni Gabriel pagkadating na pagkadating sa dorm nila, kasama nito si Liam na tahimik lang na nakasunod sa lalaki.

Pang-apat na tao ang dormitory nila, at dahil sila ang tinadhanang magkakasama sa iisang room, hindi nagtagal ay naging magkakaibigan na rin sila.

“Anong meron? Bakit parang ang lungkot ng atmosphere ngayon dito?” Nagtatakang tanong ni Gabriel nang walang sumagot sa masayang pagbati nito ng good morning.

Isinenyas ni Zion ang direksyon ni Earl na agad namang nakuha ng dalawang kaibigan pa nila.

“Na-basted?” Mahinang tanong ni Liam kay Zion, magkakadikit silang tatlo habang nag-uusap usap tungkol kay Earl. 

“Tinamaan ng insecurity sa katawan dahil sa mga babae,” sagot ni Zion.

Lumapit si Gabriel kay Earl at inakbayan ito. Si Zion at Liam ay nanatili sa kanilang pwesto habang pinapanood ang dalawa.

“Alam mo, bro, ang mga babae hindi sineseryoso ang mga ‘yan. Lalo na yang mga babaeng bumabase sa itsura at puti, hindi worth it mga ‘yan.”

Huminga ng malalim si Earl at tumingin kay Gabriel na sinusubukang palakasin ang loob niya.

“Madali lang sa iyong sabihin ‘yan kasi maputi ka at mayaman. Marami pa ring gustong magpapansin sa iyo, eh ako? Wala ni isang maipagmamalaki.” Hindi pa rin natitinag na wika ni Earl.

“Bakit ba kasi iniisip mong pangit ka? Dude, maitim ka lang pero hindi ka pangit. Kulang ka lang ng skin care at sampung paligo.” Sinubukan na rin ni Liam na tulungan si Gabriel sa pagpapagaan ng loob ni Earl.

“Skin care? Yun ba yung araw araw mong ipinapahid sa mukha at katawan mo?” Tanong ni Earl na ikinatawa ni Gabriel at Zion. Tuwing umaga’t gabi kasi ay may routine si Liam, marami itong pinapahid sa katawan na pampaputi at pampakinis. Effective naman dahil talagang makinis at maputi ito, kung hindi nga lang sa boses at adams apple nito ay mapagkakamalan nila itong babae. Kabaliktaran ng itsura ni Zion. Kung si Liam ay feminine ang kagwapuhan, si Zion naman ay masculine, kaya parehong habulin ng babae.

“Exactly! Magsabi ka lang kung gusto mo ng recommendation,” alok ni Liam kay Earl.

Nalukot ang mukha ni Earl.

“Sobrang mahal ng mga yun eh, madalas na nga akong kinakapos sa allowance at sinasalo niyo. Tapos mag-i-skin care pa ako?” Natahimik naman ang tatlo sa sinabi ni Earl, hindi lingid sa kaalaman nila ang estado sa buhay ng lalaki. Kaya nga kapag may extra sila at nanghihiram ito ay mabilis silang naglalabas ng pera, hindi rin nila ito pini-pressure na magbayad. Ang totoo ay wala na rin silang planong singilin ito, itinuturing nalang nilang tulong iyon sa kaibigan, pero hindi nila sinasabi ng diretso kay Earl dahil ayaw nilang manliit ito sa sarili.

“Ako na ang sasagot sa pagpapaputi mo,” suhestiyon ni Gabriel na hindi kailanman naging problema ang pera. Sobrang yaman ng pamilya nito at sobrang spoiled ito, pati nga silang magkakaibigan ay damay minsan.

“Ayan may sponsor kana, operation paputiin si Earl in just one month!” Segunda ni Liam. Tumingin ang mga ito kay Zion na hindi pa rin nakukuha ang gusto ng mga kaibigan.

“What?” Maang na tanong  niya, nag-ilingan ang tatlong lalaki pagkatapos ay nagtawanan.

“Hindi pa rin unfair ang mundo,” kumento ni Gabriel. “Nakita mo yan, Earl? Gwapo nga pero slow naman, habang ikaw ang advantage mo ay yang talino mo. Kaya huwag kanang malungkot dyan.”

Sa wakas ay ngumiti na rin si Earl, tila bumalik na ang kumpiyansan nito sa sarili. Kaya naudlot ang inis ni Zion, at least kahit nagmukha siyang slow at pinagtawanan ng mga kaibigan ay nakatulong naman iyon sa sitwasyon.

“Excuse me.”

Pare-pareho silang natigilan nang may bigla nalang sumulpot sa nakabukas na pinto ng dorm nila, matangkad na babae at sobrang kinis at puti.

“Yes, miss? May kailangan ka?” Tanong ni Earl, pero hindi man lang ito tinapunan ng tingin ng babae. Nanatili itong nakatingin kay Liam na nakatayo sa gilid ng pintuan.

“Nakita lang kita habang naglalakad ako, what’s your name? Can I get your social media account? Naghahanap kasi kami ng model para sa school festival, at nakita kong perfect ka sa hinahanap namin.”

Nagkatinginan kaming tatlo nang makita ang muling paglungkot ni Earl.

“Ikaw rin. What’s your name?” Baling pa ng babae kay Zion.

“Sorry, miss. Wala kaming interest sa modeling o kahit anong fashion show.” Mariing tanggi ni Liam. Hindi na kami nagulat, kahit pa part-time model ito sa ilang kilalang brand at passion talaga ang modeling, hindi ito magda-dalawang isip tanggihan ang offer ng isang tao na walang respeto sa kaibigan nila.

“Same with me, miss. Hindi ako interesado sa mga taong pinipili lang ang ire-respeto, naunang nagtanong ang kaibigan ko, sana man lang sinagot mo ito at hindi inignore lang.” Kumpara sa sagot ni Liam na pinili ang mga salita para hindi makasakit ng damdamin, si Zion ay prangka at walang pinipili basta alam niyang nasa tama siya. Kaya nga siguro nag-click silang apat, dahil magkakaiba man ang personality nila ay mga totoo silang tao.