Kabanata 5- The Contract Details

"Salamat naman at dumating ka na mars. Nag-alala na ako sa iyo. Hindi mo naman kasi sinasagot ang mga text at tawag ko. Akala ko napaano ka na. Kanina ka pa umalis ng bangko ah. Ba't ngayon ka lang?", tanong ni Faye sa kanya nang makarating na siya sa apartment na kanyang tinutuluyan. 

"O ba't ganyan ang mukha mo mars? Ano naman ang problema ba't nakasimangot ka? Nagkita ba kayo ni Ivan?", sunud-sunod na tanong nito. Hindi pa nga siya nakabihis ay inuulan na siya ng maraming mga tanong. Hanggang sa makapasok siya sa kanyang silid at nakasunod pa rin ito sa kanya.

Umupo ito sa kama habang naghihintay ng kanyang sasabihin. Tinitingnan lang siya nito habang nagbibihis. Nasanay naman kasi silang dalawa ng ganu'n at wala silang pakialam kahit nalalantad ang kanilang mga katawan dahil pareho naman silang babae. 

Matapos siyang makapagbihis, umupo siya sa tabi ng kanyang kaibigan.

"Kumain ka na ba? Nauna na akong kumain kasi nagutom na ako kanina. Tagal mo kasi eh", wika ni Faye.

"Mars, ano ba ang nangyayari sa iyo? May problema ba kayo ni Ivan? Ba't umiyak ka kanina sa trabaho?, tanong na naman nito. Para nga itong imbestigador kung makapagtanong. Hindi pa nga nasasagot ang isa may tanong na namang iba.

Huminga ng malalim si Valerie bago siya nagsimulang magkwento.

"Mars, wala na kami ni Ivan", panimulang sabi niya.

Nanlaki ang mga mata ni Faye nang marinig ang sinabi niya. Botong-boto pa naman ito doon sa boyfriend niyang manloloko. 

"Mars, bakit anong problema? Bakit biglaan?", nagtatakang tanong nito.

Hindi na niya kaya pang pigilan ang sakit na nararamdaman niya kaya humahagulgol siya ng iyak. Niyakap naman siya kaagad ng kanyang kaibigan at inaapuhap nito ang likod niya. 

"Sige mars, iiyak mo lang 'yan ha. Ilabas mo lahat ng sama ng loob mo at pagkatapos mag-usap tayo", sabi nito sa kanya.

Umiyak siya ng umiyak dahil talagang nasasaktan siya. Masakit na masakit ang puso niya dahil hindi niya iniexpect na dito lang pala magwawakas ang apat na taon nilang pinagsamahan ni Ivan. At nang matapos na niyang mailabas ang lahat ng sama ng loob niya, tumahan na rin siya sa pag-iyak at nagpunas ng kanyang mga luha. Tumayo naman agad si Faye para bigyan siya ng tubig.

"Mars, anong problema? Makikinig ako mars.", seryosong sabi nito.

Tumingin siya rito at nagsimulang magkwento.

"Mars, niloko ako ni Ivan. Hindi ko akalain na ako pala ang higit na masorpresa kahapon sa birthday niya. Nakita ko siya at ang babae sa banyo at gumawa ng kawalanghiyaan", aniya habang patuloy sa pagpahid ng kanyang mga luha.

"Ano??? Aba'y gago pala 'yong Ivan na 'yon ah!!!!", galit na wika ni Faye.

"Hindi ko nga akalaing magawa niyang lokohin ako mars, pagkatapos na maibigay ko sa kanya ang sarili ko", 

"Kaya ako naglasing kagabi sa restobar. Uminom ako ng dalawang boteng beer at nalasing ako, dahil masakit na masakit mars!!!",  muli na naman siyang napahagulgol ng iyak.

"Jusko mars, eh di sana'y tinawagan mo ako para masamahan kita. Eh, kung napaano ka doon? Marami pa namang masasamang taong nagkalat dito sa Maynila!"

Ipinaliwanag niya rito na gusto niyang mapag-isa kaya hindi na lamang niya ito tinawagan. Wala kasi siyang ibang maisip na gawin sa mga sandaling iyon kundi ang lunurin sa alak ang sarili niya at nang makalimutan saglit ang sakit na kanyang naramdaman.

"So, saan ka nakatulog kagabi? At--", tanong nito habang tiningnan ang kanyang suot.

"Kaninong blouse 'yan? Ngayon ko lang 'yan nakita ah!", tanong ulit nito. Hindi na yata nauubusan ng tanong itong kaibigan niya at naa-appreciate naman niya ito kahit papano. Nag-alala lang talaga ito sa kanya kaya hindi mapakali sa kakatanong.

Muli siyang nagpahid ng luha at t'saka nagsimulang magsalaysay sa kaibigan niya kung paano siya napunta sa bahay ni Lester at kung gaano ito kasungit sa kanya. Patuloy lang na nakikinig si Faye sa kanya at nang banggitin niya ang buong pangalan ng lalaki ay napanganga itong bigla.

"Lester Montefalcon? 'Yon bang naghatid sa iyo kanina sa bangko?Ayyyy...ang gwapo niya pala sa personal!!!", tumayo ito at biglang napatili.

Naku, mars alam mo ba kung sino siya???", tanong na naman ulit ni Faye.

Palakad-lakad ito na parang na-eexcite ng hindi niya mawari.

Bigla siyang napatitig sa kaibigan niya na halatang kinikilig mula nu'ng banggitin niya ang pangalan ng lalaki.

"Hindi ko alam, at wala akong pakialam sa bakulaw na iyon. Tinawag pa naman akong Miss Suka Girl. At saka ang sungit niya ha, walang modo!", naiinis na wika niya.

Tumingin lang si Faye sa kanya at ngumingiti-ngiti pa ito at saka muli itong naupo sa tabi niya.

"Alam mo ba kung gaano kayaman si Lester Montefalcon? Jusko, anak ng isang bilyonaryo mars!! at nag-iisang tagapagmana ng malaking pabrika ng sapatos sa Marikina!!!", bulalas nito.

Nanlaki ang mga mata niya sa kanyang narinig. Hindi niya akalain na si Lester pala ang anak ng may-ari ng malaking pagawaan ng sapatos sa Marikina. Kaya pala hindi man lang ito nag-atubiling alukin siya ng sampung milyon pumayag lang siya sa isang kasunduan. Napakayaman pala ng mokong na iyon, sa isip niya. Ngunit ang ipinagtataka niya kung bakit kailangan pa nitong magbayad ng malaki para magkaroon ng magiging bride na ipapakilala sa lola nito. Imposible namang wala itong girlfriend kung ganito naman ito kayaman, at saka gwapo naman ito kung tutuusin. Kaya lang magaspang ang ugali nito at mainitin ang ulo.

"Mars, anong iniisip mo?", tanong ni Faye nang mapansin nitong hindi siya umimik.

Binsnggit niya rito ang tungkol sa isang kasunduan na inalok sa kanya ni Lester kapalit ng isang malaking halaga. Sinabi niyang ito ang dahilan kung bakit natagalan siya sa pag-uwi sa apartment dahil dinala pa siya sa isang restaurant. Matamang nakikinig lang si Faye sa bawat sinasabi niya.

"Uhm, kaya pala nagmadali kang lumabas ng bangko kanina, dahil ayaw mong maabutan ka ni Lester!"

"Oo syempre. Ayaw kong makaharap ang mokong na iyon. Wala na kasing ibang nalalaman ang lalaking iyon kundi ang asarin ako. Nakakagigil nga! Sumasabay pa sa sakit ng ulo ko. Niloko na nga ako ng hayop na Ivan na iyon, eh dumagdag pa iyong bakulaw na iyon!!!", nakasimangot na tugon niya.

Tawa ng tawa lang si Faye sa mga kwento niya na parang nag-eenjoy pa ito habang nakikinig sa kanya.

"Oy, mars baka si Lester nga ang nakatadhana sa iyo. Kaya siguro nawala si Ivan dahil may panibagong darating. Tanggapin mo na ang inalok niya mars!!!", pangungumbinsing wika nito.

Inirapan lang niya ang kanyang kaibigan dahil sa isip niya nakapaka-imposibleng mangyari iyon. Hindi naman niya type si Lester dahil sa kagaspangan ng ugali nito. At t'saka wala na siyang planong magka love life ulit pagkatapos ng pinagdaanan niya. Ayaw na niyang magtiwala at masaktan kaya ibubuhos na lang niya ang kanyang panahon sa kanyang pamilya. Nais niyang mabigyan ng magandang buhay ang kanyang pamilya sa probinsya at maipagaling din ang kanyang amang maysakit sa puso. 

"Tumigil ka na dyan sa pangiti-ngiti mo mars, hindi ko gusto si Lester kaya imposible yang mga iniisip mo", seryosong sabi niya.

Buti na lang at hindi na ito nag-insist pa. Kilala naman siya nito at alam nitong hindi siya basta-basta nagtitiwala. Umabot nga sila ng apat na taon ni Ivan bago niya ipinagkaloob ang sarili sa lalaki, sayang nga lang at niloko siya nito.

"O siya, magpahinga ka na mars. At please h'wag mo ng isipin iyong ex-boyfriend mong gago. He doesn't deserve you! Sabihan mo nalang ako kung anong magiging desisyon mo tungkol sa kasunduan na inalok ni Lester. Kung ako ang tatanungin mo mars, okay sa akin 'yan, tutal trabaho lang naman at walang personalan", wika ni Faye at saka ito lumabas ng kwarto.

Magkaiba ang silid nilang dalawa dahil hindi sanay ang kaibigan niya na may katabi sa pagtulog. Ayaw din niya itong katabi sa higaan dahil masyadong malikot ito at malakas humilik. Dalawa lang silang umuupa sa apartment kaya pinaghahatian nila ang mga bayarin at gastusin. Medyo malaki-laki nga lang dahil dalawa lang silang naghahati, pero okay na rin iyon kaysa doon sa maraming okupante. 

Nang mapag-isa na lamang siya, bigla niyang naalala ang papel na ibinigay sa kanya ni Lester. Kinuha niya iyon sa bag niya upang basahin. Hanggang ngayon ay hindi pa rin niya lubos na maisip kung bakit sa dinami-dami ng pwedeng alukin ng ganito ng lalaki, ay siya pa ang napili nito. Umiiling-iling siya at sinimulang basahin ang mga nakasulat sa papel. 

Nakasaad doon na magpapanggap siya bilang fiancee ni Lester, at ipapakilala siya nito sa lola ng lalaki. Pagkatapos ay itatakda ang kanilang pekeng kasal. Magiging bride siya, pero hindi magiging asawa dahil hindi sila magsisiping ng lalaki. Kunyari magsasama sila sa loob ng isang silid ngunit lingid sa kaalaman ng lahat may pintuan sa loob na konektado sa isa pang silid at doon matutulog si Lester. Walang anumang dapat na mamagitan sa kanilang dalawa kundi gagawin lang kung ano ang nasa kasunduan. Nakasaad din doon na matatanggap niya ang paunang bayad na limang milyon pag nakapirma na siya sa kasunduan at ang natitirang bayad ay matatanggap niya pagkatapos ng anim na buwan. 

Nang matapos basaahin ni Valerie ang lahat ng mga nakasulat sa papel, napabuntung-hininga siya. Hindi naman mahirap ang mga kondisyon doon, total gagawin lang naman niya ito sa loob ng anim na buwan. At pagkatapos noon, magiging malaya na siya at hindi na siya guguluhin pa ng lalaki. Iniisip niya, ang napakalaking halaga na kanyang makukuha. Makakatulong na ito ng malaki para sa operasyon ng kanyang ama sa puso. Mabibigyan na rin niya ng puhunan ang kanyang ina para sa pagpapatayo ng maliit na negosyo. Matutustusan na niya ang mga pangangailangan ng kanyang mga kapatid sa kanilang pag-aaral at magbabago na rin ang kanyang buhay.

Sumagi na naman sa isip niya ang panlolokong ginawa ni Ivan. Gusto niyang makaganti rito at sa pamamagitan ng perang makukuha niya mula kay Lester, makakabili na siya ng mga bagong gamit pati na rin ng kotse at makakapasok na rin sa mundo ng mga mayayaman. Naisip niya kaya siguro siya nagawang lokohin ni Ivan dahil mahirap lang siya, at ang babaeng kaulayaw nito ay nabibilang din sa alta sosyedad. Kahit pa man ganu'n masakit pa rin sa puso niya ang ginawa nito. Alam ng Diyos kung gaano niya ito kamahal. Buong puso niyang ipinagkaloob dito ang kanyang sarili, ang lahat sa kanya, ngunit nagkamali siya. Pumatak na naman ang mga luha sa kanyang mga mata. Hindi niya talaga mapipigilan ang kanyang mga luha sa tuwing maiisip niya ito. Kaya kung ang pagtanggap sa inaalok ni Lester ang magiging daan para tuluyan na niya itong makalimutan, nakahanda siyang gawin ito ngunit sa papel lang. Dahil hinding-hindi na niya maaari pang buksan ang puso niya para sa iba. 

Labag man sa kalooban niya ang kanyang gagawin ngunit kailangan niyang magiging praktikal para sa kanyang pamilya. Hindi na rin biro ang limang milyong piso bilang paunang bayad. Mahirap kayang makakuha ng ganoong halaga, kahit pa yata ibuhos niya ng buong-buo ang kanyang panahon sa pagtatrabaho sa bangko hindi pa rin niya makukuha ang ganoon kalaking pera. 

Bukas ay sasabihin niya ito kay Faye dahil may karapatan naman itong malaman ang mga plano niya. Matalik niya itong kaibigan at ito ang naging karamay niya sa tuwa, lungkot at saya kaya nararapat lang na ipapaalam niya rito ang desisyon niya.