CHAPTER ELEVEN

"I'LL go ahead now, sir Jolo and Miss Shella," saad ni Lawrence at mabilis na yumuko. Hindi ko tuloy alam kung yuyuko din ako. Sa huli ay isang naiilang na ngiti lamang ang nagawa ko.

Tumango lang si Jolo at pagkatapos n'on ay mabilis nang sumakay sa isang naghihintay na itim na sasakyan si Lawrence. Ilang minuto lamang ang hinintay namin bago namin napagdesisyunan nang bumalik sa kubo.

"Tara na?" tanong ng binata kaya naman mabilis akong tumango. 

Hindi ko alam kung dapat ba akong maging masaya na hanggang ngayon ay nandito pa rin siya at kasama namin. Hindi pa rin maalis sa isipan ko na mayaman si Jolo at nagmamay-ari ng isang malaking kompanya. Kung siya ang may-ari n'on, hindi ba dapat nandoon siya para pamahalaan ito? Para tuloy ang makasarili ko dahil ayoko sa loob ko na umalis at bumalik ang binata sa kanila. 

"Hey Shella, may problema ba? Bakit parang ang lalim ng iniisip mo?" napailing naman ako ng mabilis nang marinig ang tanong nito.