Chapter 19: A cat getting curious

Alas syete palang ng gabi pero sobrang tahimik na sa loob ng mansyon. Nakabukas naman ang lahat ng ilaw pero walang mga tao. Wala kang ingay na maririnig. Si Simon lang ang kasama ko ngayon mula pa kanina. Nagluluto siya ng pagkain ngayong dinner.

Si Rowan nagpaalam sa akin na aalis. Himala at hindi sila nagtalo ni Simon. Samantalang si Nelia naman kanina pa hindi umuuwi. Si Tito Luciano hindi ko alam kung nasaan. Nakakapanibago. Parang mababaliw na ako sa mga naiisip ko–ayaw kong maghinala pero parang hindi ako matatahimik hanggat hindi nalalaman ang totoo.

Naiihi na ako. Gusto kong magpasama sa kanya pero nahihiya ako. Tsaka busy naman siya sa pagluluto kaya hindi ko na siya aabalahin pa.

Kung aakyat ako sa itaas baka mawalan ako ng balanse at gumulong. Ayaw ko ng bumalik sa hospital. Minabuti ko nalang maghanap ng cr. Ilang kwarto na ang napasukan ko at mukhang kwarto yun ng mga katulong at guest. Nang may isang silid na pumukaw sa atensyon ko–palabas ng mansyon.