Kabanata 5: Ang Pangatlong Lalaki

“Siguro wala ng tututol sa ipapakilala ko na magiging kasama natin sa Board of Director ang papalit sa aking nawawalang anak na si Larry Evangelista, walang iba kundi si Nathan Capriano.”

Mas lalong nagulat si Atty. Rene sa ipinalit kay Larry, ang mismong kaibigan na si Nathan. Gustuhin man niyang kontrahin ay wala siyang magawa dahil alam niyang kokontrahin lang siya ng mga kapwa niya Board of Directors.

Malakas na palakpakan at sunod-sunod na pagbati ang sumalubong kay Nathan sa pagpasok niya sa Conference Area.

"Una po sa lahat maraming salamat po sa inyong mainit na pagtanggap. Maraming salamat po sa ating bagong CEO at President Madam Margareth Evangelista. Bago pa ialok sa akin ang posisyon na ito ay pinag-isipin ko muna kong karapat-dapat ba ako na ipalit sa magaling at mabait na matalik kong kaibigan na si Larry,” pagkukunwari ni Nathan na nalulungkot sa pagkawala ni Larry.

“Alam ko na may mga hindi sang-ayon at nabigla sa balitang ako ang uupo bilang bagong Board of Director,” sabay tingin kay Atty. Rene.

“Hindi ko naman sila masisisi dahil wala pa akong masyadong napapatunayan. Ang tanging mababago ko lamang ay patunayan sa kanila na mali ang pagkakakilala nila sa akin. Maraming salamat po.” Malakas na palakpakan muli ang sumunod na narinig pagkatapos magsalita ni Nathan.

“Kung wala na sigurong sasabihan ang kahit sino sa atin ay marapat na siguro nating tapusin ang meeting,” wika ng bagong CEO na si Donya Margareth.

Walang nagawa si Atty. Rene sa mabilis na pagdagdag ng bagong Board of Director kaya naman mabilis din na natapos ang meeting. Ngunit isang tanong ang nabuo sa isip ng abogado kung nagkataon lang ba na iisang tao ang papalit sa puwesto ni Larry at iyon din ang taong kasama nito noong nahulog sa bundok.

Isa-isang naglabas ang lahat ng mga Board of Directors kasama si Atty. Rene na tanging pailing-iling na lang ang nagawa. Tanging sila Donya Margareth at Mr. Nelson Aguilar ang naiwan sa Conference Area.

“Madam Margareth, binigla mo naman ako sa naging desisyon mo na ilagay si Nathan bilang pinakabagong Board of Director. Mabuti na lang ay pumayag agad ang iba kaya hindi na nakapaporma si Atty. Rene,” wika ni Mr. Nelson sa biglaang desisyon ni Donya Margareth.

“Mr. Nelson, pasensya ka na kung hindi man lang kita nasabihan. Sinadya ko kayong biglain para malaman ko kung sino ang tingin kong magiging problema ko sa kumpanyang ito,” sagot ni Donya Margareth.

“Andoon na tayo na napatunayan natin na magiging hadlang sa atin si Atty. Rene, pero kahit ano naman ang gawin niya ay wala pa rin siyang magagawa dahil wala namang papanig sa kanya sa mga Board of Directors. Ang sa akin lang ay maghinay-hinay ka naman sa mga mabilis mong desisyon, baka makahalata sila o magkaroon ng ideya kung bakit masyadong mabilis ang pag-angat ni Nathan sa Xyclone Mining Inc,” paliwanag ni Mr. Nelson Aguilar.

“Wala naman magagawa ang mga sumasalungat o sasalungat sa akin hanggang hawak natin ang majority vote ng Board of Directors. At iyan ang trabaho mo na panatilihin na nasa panig natin ang karamihan. Siguraduhin mong hindi tayo magkakaproblema sa kahit sino sa kanila kung ayaw mong sumunod kina Rafael at sa anak niyang si Larry,” sagot ni Donya Margareth habang nakatitig nang masama kay Mr. Nelson.

“Oo naman Madam, makakaasa ka sa akin tungkol sa ganyan.” Biglang nakaramdam ng takot kaya nagbago ang tono ng sagot ni Mr. Nelson nang makita niya kung paano siya tignan nang masama ni Donya Margareth.

***

Hinihintay nila Claire at Gilbert sa isang restaurant na hindi kalayuan sa opisina ng Xyclone Mining Inc. si Nathan habang tinatanggap nito ang promotion na nakuha sa nasabing kumpanya.

“Ano bang sinasabi mo Gilbert baka may makarinig pa sa iyo na ibang tao? Kalimutan mo na iyon dahil mga lasing lang tayo kaya nangyari iyon at hindi na iyon mauulit kahit kailan!” galit na wika ni Claire habang napatayo ito sa kinauupuan nito.

“Relax ka lang Beautiful, kalma at maupo ka lang,” pang-aasar ni Gilbert habang nakatawa pa ito kay Claire.

“Gilbert, please lang sana huling pag-uusap na natin ito tungkol sa bagay na ito at ibaon na natin sa limot kung anuman ang nangyari noong gabing iyon,” mahinahong pakiusap ni Claire sa muling pagbalik nito sa pagkakaupo.

“Alam mo Claire sa ganda mong iyan ay hindi ka basta madaling kalimutan ng kahit sinong lalaki. Ang iba nga diyan pumatay pa para lang makuha ang gandang iyan.” Hinawakan ni Gilbert ang kamay ni Claire at balak sanang halikan, ngunit tumanggi ang magandang babae at biglang hinila ang kamay.

“Hindi ka ba talaga mapakiusapan?” tanong ni Claire.

“Kung sabihin ko sa iyong hindi ako madaling pakiusapan,” sagot ni Gilbert habang nakangiti ito sa harapan ni Claire.

“Ano bang gusto mong gawin ko para lang tumigil at kalimutan na natin itong usapan na ito?” tanong ni Claire.

“Madali lang,” sagot ni Gilbert sabay hawak sa makinis na braso ni Claire. “Gusto ko ulit na makasama ka nang isang gabi sa aking condo at kapag pumayag ka doon ko lang sisimulan kalimutan ang iyong alindog,” sagot ni Gilbert at muling hinawakan ang kamay ni Claire at tinangkang halikan ulit ito. Sa pagkakataong ito ay hindi na tumutol si Claire.

“Kung sakaling hindi ako pumayag anong gagawin mo?” paghahamon ni Claire.

“Baka pagsisihan mo, sasabihin ko kay Nathan na may nangyari sa atin katunayan ipapadala ko pa sa kanya ang video na magkasama tayo sa aking kama. At kung sakaling tanggap niya na naging kahati ako sa katawan mo dahil sanay naman siya sa ganoon noong kayo pa ni Larry,” pananakot ni Gilbert.

“Hayop ka Gilbert! Kahit naman malaman niya ang nangyari sa atin sigurado naman akong hindi ako hihiwalayan noon,” pagmamalaki ni Claire dahil alam niya kung gaano siya kamahal ni Nathan.

“Sabagay patay na patay nga pala sa iyo ang kaibigan kong traydor. Kung ganoon siya na lang ang isusumbong ko na maykagagawan sa pagpatay kay Larry.” Hindi agad nakasagot si Claire sa sinabi ni Gilbert dahil alam niyang hindi ito nagbabanta lang o nagbibiro at kaya nitong gawin ang sinasabi niya na isusumbong niya talaga sa mga pulis si Nathan.

Medyo napatigil Sila sa kanilang usapan ng mapansin ni Gilbert na parating na si Nathan nang mapansin nito na papasok na ito sa restaurant.

“Parating na si Nathan gusto ko nang marinig kung payag ka na ba sa gusto ko?” tanong ni Gilbert.

“Oo na pumapayag na ako, siguraduhin mo lang na tutupad ka sa usapan natin.” Pumayag din si Claire sa takot na baka mapahamak si Nathan.

“Hihintayin kita mamayang gabi sa condo,” mahinang salita ni Gilbert dahil ilang hakbang na lang si Nathan sa table nila.

“Pasensya na kayo kung pinaghintay ko kayo, nainip ba kayo?” tanong ni Nathan at masayang humalik kay Claire habang nakipag-fist bump naman kay Gilbert.

“Hindi naman Pre, katunayan hindi nga namin napansin ni Claire ang oras dahil sa napakagandang napagkuwentuhan namin,” nakangiting wika ni Gilbert habang nakatingin kay Claire.

Nairita si Claire sa sinabi ni Gilbert sa hindi inaasahan ay napansin iyon ni Nathan. “Bakit parang malungkot ka Honey akala ko ba maganda ung napagkuwentuhan ninyo?” tanong ni Nathan kay Claire sabay upo sa tabi ni Claire.

“Hindi naman Hon, napagod lang ako sa ginawa ko kaganina sa office,” pagsisinungaling ni Claire.

“May nakalimutan akong gawin, kailangan ko na palang magpaalam sa inyo. Pasensya na kayo hindi ko na kayo masasamahan sa pagse-celebrate sa promotion na nakuha mo,” pagpapaalam ni Gilbert sabay sulyap ulit kay Claire na parang nagpapahiwatig na huwag kalimutan ang kanilang napag-usapan.

Sa pag-alis ni Gilbert ay masayang ikinuwento ni Nathan ang nangyari sa meeting ng mga Board of Directors, kung paano siya ipinaglaban ni Donya Margareth sa pagtutol ni Atty. Rene. Pinilit na makinig ni Claire upang hindi siya mapansin ni Nathan at hindi magduda tungkol sa kanilang dalawa ni Gilbert.