Chapter 3

Nagising ako sa sinag ng araw na tumatama sa aking balat. Pumasok ang ihip ng hangin sa nakabukas na bintana ng aming kwarto kaya napahinga ako ng malalim. Kinapa ko ang aking tabi ngunit napakunot lamang ang aking noo dahil wala akong matamaan. Nang tingnan ko ay totoo ngang wala na si Edward sa aking tabi. Hindi niya man lang ako ginising!

Nakakalungkot lang isipin. Matapos may mangyari sa amin kagabi ay hindi man lang niya ako ginising para sabay kaming kumain ng agahan. Dahil sa pagod ng katawan ay hindi ko namalayan ang pag alis ni Edward. At kung hindi pa dahil sa init ng araw ay baka abutin ako ng tanghaling tapat sa aming kama. 

Maingat akong tumayo at pumunta sa banyo. Ramdam ko ang hapdi sa aking gitna kaya naman dahan-dahan lamang ako sa paglalakad. Sigurado akong nagulat ang aking asawa nang magising siya at makita ang aming hubad na katawan. Usually, kapag nalalasing siya ay hindi niya alam ang kanyang ginagawa. Sana lang ay hindi niya pinagsisihan ang nangyari sa amin kagabi. 

Maya maya pa’y tumawag si mommy sa phone. Pinapapunta niya kami ni Edward mamayang gabi para sa dinner. Last week lamang ay pumalit sa posisyon ang aking daddy bilang chairman ng Kingwood Corporation. Sa sobrang busy ay ngayon pa lamang kami makakapag celebrate.

Matapos mag ayos ay bumaba na rin ako para kumain. Nakita ko mula sa bintana si Manang na nasa gate at may kinakausap na lalaki. Natatabunan ni manang ang lalaki kaya hindi ko makita ang kanyang itsura.

“Magandang umaga ho, Ma'am Sol.” Masiglang bati sa akin ni Shiela habang naglilinis siya ng kabinet. Dalawa lamang ang kasambahay namin sa bahay, si Shiela at si Manang. Mayroon kaming driver pero nitong isang buwan lamang ay nag retire na rin siya.

Bumati ako pabalik sa kanya at nagtanong, “Anong oras nakaalis ng bahay si Edward?” 

“Kanina pa po nakaalis si Sir Edward may aasikasuhin daw po sa kompanya.” Parang nag aalangan niyang sagot.

“Nga pala Ma'am Sol, ibinilin po ni Sir Edward na kayo raw muna mag asikaso sa bagong driver na magsisimula ngayon. Baka po nandito na siya sa mga oras na ito.” Dagdag niya pa. Sakto naman ay bumukas ang pinto at pumasok si Manang at ang kausap niyang lalaki kanina.

“Oh! Ayan na po ata ma'am ang bagong driver." 

Naglakad ako palapit sa kanila. Wala akong ideya na kumuha na pala ng bagong driver si Edward. Ni hindi niya ako kinausap tungkol dito kaya hindi ko alam kung nahihirapan na siya papuntang building. Siguro nga’y hassle na para sa kanya ang mag drive dahil may kalayuan ang bahay namin sa building ng aming kompanya.

“Magandang umaga, ma'am." Bati ng nasa harapan ko at munting yumuko. Nakatingin lamang ako sa kanya. Nakasuot siya ng kulay itim na polo at slacks. 

“Iha, siya ang bagong driver na nahanap ng asawa mo. Simula ngayon ay siya na ang maghahatid-sundo sainyo.” Saad ni Manang at nag senyal pa siya sa lalaki na ipakilala ang sarili sa akin. Narinig ko ang kanyang pagtikhim bago binuka ang bibig.

“Ako si Keith Aveline at 30 years old na ako. Nalaman ko na naghahanap si Sir Edward ng driver noong isang araw kaya agaran akong nag apply.” Pagpapakilala niya sa kanyang malalim na boses. May munting ngiti sa kanyang labi ngunit hindi ako ngumiti pabalik at tumango na lamang. 

Nakita ko na pinasadahan niya ako ng tingin mula ulo hanggang paa. Hindi ko alam kung guni-guni ko lamang ba ito pero pakiramdam ko ay madilim ang kanyang ekspresyon. Tila ba ay may galit siya ngunit gayunpaman ay hindi maipagkakaila na siya ay nagtataglay ng kakisigan at gwapohan. Kumunot ang aking noo dahil masyadong overwhelming ang kanyang presensya para sa isang driver lamang. Dumagdag pa na parang may something sa kanya gaya ng kanyang awra na sumisigaw ng awtoridad. Maaliwalas at malinis man tingnan ang kanyang mukha ngunit ang kanyang kilay na medyo nakakunot ay sumasalungat. 

“Alam mo ba na stay-in ka dito? Nasabi na ba sayo ni Edward ang mga kailangan mong gawin?” Tanong ko sa kanya dahil baka mamaya ay wala siyang kaalam alam sa kanyang magiging trabaho.

“Napag-usapan na namin ma'am ang tungkol sa bagay na iyan.”

Natikom ko ang aking bibig. Nakatitig lamang ako sa kanya ngunit nang bahagya niyang itaas ang isang kilay ay tumikhim ako bago tumawag ng kasambahay. 

“Bakit ho ma'am Sol?" Agad na lumapit si Shiela. 

"Ituro mo sa kanya ang kanyang matutuluyan. At Manang, ikaw na ang bahala sa ibang bagay.” Pagkatapos ay umalis na ako sa harapan nila at pumunta sa kusina para ipagpatuloy ang pagkain.

Wala akong trabaho. O mas tamang sabihin na hindi ako pinayagan ng aking asawa na mag trabaho. Matapos ko mag graduate sa kolehiyo ay ikinasal na ako kay Edward. At ang gusto ni Edward ay dito lamang ako sa bahay at siya na raw bahala sa kompanya.

Nang pumatak ala sais ng gabi ay sakto namang dumating si Edward kaya hindi rin nagtagal at gumayak na kami sa bahay ng mga magulang ko.

“Saan ba tayo liliko, sir?" Narinig ko ang pag tanong ng driver sa asawa ko. Ako lamang ang nasa back seat dahil umupo si Edward sa unahan katabi ng driver.

“Sa kanan. Tandaan mo na ang daan na ito dahil madalas kami dito bumisita.” Saad ni Edward at lumingon siya sa akin kaya ngumiti ako sa kanya. Tumango lamang siya at muling bumaling sa harapan. 

Hindi pa namin napag-uusapan ang tungkol sa nangyari kagabi. Pero sa tingin ko ay hindi na namin mapag-uusapan pa iyon kaya mananatili na lang akong tahimik.

Nang makarating ay sinalubong kami ng isang kasambahay at giniya sa hardin. Hindi pa man kami nakakalayo ay lumingon ako sa likod. Nakita kong tumagal ang tingin ng driver sa aking asawa bago lumipat sa akin. Napaigtad ako ng bigla siyang ngumiti sa akin. Ramdam kong bumilis ang tibok ng aking puso kaya napa iwas ako ng tingin at napahawak sa dibdib.

Kalma, Solana!