Love beyond the gilded cage

Solana

“May nakakita sa asawa mo, may kasamang ibang babae sa bar!”

Ito agad ang bumungad sa akin nang sagutin ko ang tawag ni Mikha na kaibigan ko. Halata sa kanyang boses ang pagpipigil ng inis. 

“Hayaan mo na, sa akin pa rin naman siya uuwi,” matamlay na sagot ko sa kanya. Hindi na ito bago sa akin. Madalas pumunta ang kaibigan ko sa bar kaya nakakasagap siya ng balita tungkol sa aking asawa.

Narinig ko ang makina ng kotse sa labas kasunod ang pagpasok nito sa garahe. Tanda ito na dumating na ang aking asawa. Nang tingnan ko kung anong oras na ay pasado alas sais na ng umaga. Bakit ngayon lang siya?

“Syempre uuwi ‘yan sayo kasi may silbi ka pa sa kanya. Hangga’t hindi pa niya tuluyang nakukuha ang mana ay uuwi talaga yan–” 

Alam ko na kung ano ang susunod niyang sasabihin kaya inunahan ko na siya. “Nandito na siya, Miks. Next time na lang tayo mag usap." 

Bago ko pa mababa ang tawag ay narinig ko pa ang kanyang hinaing. “Kita mo na Solana, ni hindi nga umuwi kagabi. Siguro kasama niya yung babaeng–”

Lumabas ako ng kwarto para salubungin si Edward, ang aking asawa.

“Honey, ba’t ngayon ka lang? Umaga na ah."

Lumapit ako sa kanya para halikan siya sa pisngi. Hindi pa man dumadampi ang aking labi ay pansin ko ang kanyang pag iwas ng mukha. Napatigil ako. Naaamoy ko ang isang pambabaeng pabango mula sa kanya. Tumikhim ako at tinulungan na lang siya na hubarin ang kanyang coat at necktie. Hindi man lang niya ako tinapunan ng tingin nang sumagot siya, "Overtime. Daming paperworks na aasikasuhin.”

Liar! Nasa bar ka kagabi at may kasamang iba!

“Talaga ba…” nasabi ko na lang.

“Mag sho-shower lang ako, then babalik na ako sa office. Eat your breakfast now.” 

Imbis na kumain ng agahan ay sinundan ko siya sa kwarto. Hawak ko pa rin ang kanyang coat at necktie. Ilalagay ko na sana ang mga ito sa basket nang mahagip ng aking mga mata ang mantsa ng lipstick na nakadikit sa necktie. Kumirot ang aking dibdib. Kahit na narinig kong may kasama siyang ibang babae kagabi ay hindi ko naman inaasahan na aabot sa ganito. Ayoko mang isipin na may nangyari sa kanila ng babae na iyon pero mismong ebidensya na ang pumipilit. 

Nangilid ang aking mga luha. Sa loob ng aming limang taon na pagsasama bilang mag asawa, ni hindi ko naramdaman ang kanyang pagmamahal sa akin. Magkasama nga kami sa iisang bahay ngunit tila ba magkalayo kami sa isa't isa. At heto ako ngayon, umaasa na magbabago pa rin siya para sa magiging anak namin. Yes, I'm 3 months pregnant now. 

Pumikit ako at huminga ng malalim. Hindi dapat ako ma-stress. Kailangan ko lang kalimutan ang narinig ko kaninang umaga at ang nakita ko sa kanyang necktie, then all is good. Hindi dapat ako magpaapekto. Kailangan ko lang mag doble sikap para mahalin ako pabalik ni Edward. 

Naupo ako sa kama at hinintay siyang matapos sa pagligo. Napakagat ako sa aking daliri sa kaba. 

Bakit ako kinakabahan? Just tell him, Solana! Na gusto mo siyang makasama.

Minsan lamang siya pumayag sa mga request ko. At ipinagdadasal ko na sana ay pagbigyan niya ako ngayon. Narinig ko ang pag tunog ng pinto kaya agad akong napatayo. Lumabas siya na nakatuwalya lamang ang kanyang ibabang bahagi ng katawan. Ang kanyang magulong buhok ay basang basa pa at tumutulo ito sa kanyang katawan, adding more hotness to his body. He's a muscular man. Kahit sino ay magugustuhan siya dahil sa kanyang itsura at katawan. And that's why my young heart fell for him. 

“Pwede ka bang mag day off ngayon, honey? Para naman magka-quality time tayo.” Pauna kong sabi habang hinahaplos ang aking puson. Nakita kong bumaba ang kanyang tingin sa aking puson ngunit agad ring inalis. 

"Hindi pwede. Masyadong busy sa kompanya lalo na’t tatlong buwan na rin busy ang daddy mo. Mula nang naging chairman siya ng Kingwood Corporation ay ako na ang nag aasikaso ng kompanya niyo.”

“Pero sabado ngayon–” napatigil ako nang sumabat siya.

“Para naman sa kompanya ang ginagawa ko. Just focus on your own thing.” Huminto siya saglit at kumunot ang kanyang noo. Tinapunan niya ng malamig na tingin ang aking puson bago nagpatuloy sa pagsasalita. “Pwede kang mag exercise o mag bakasyon para naman naka focus ka sa anak mo. Hindi ‘yung trabaho ko ang dinidisturbo mo.”

Dire-diretso ang kanyang pananalita. Wala siyang konsiderasyon sa mararamdaman ko. Hindi ko lang naman anak ‘to, anak natin ito! Nag init ang aking ulo at nawalan ng kontrol. Sa sobrang frustration ko ay nakapag salita ako na hindi ko na dapat pa sinabi dahil nauwi ito sa matinding away. 

“YOU KNEW VERY WELL NA ARRANGED MARRIAGE TAYO! Pumayag lamang ako para makuha ang mana. Kaya huwag mo akong sisihin kung ganito ako.” Sigaw na reklamo niya. 

“AH KAYA PALA MAY KASAMA KANG IBANG BABAE SA BAR!? DAHIL ARRANGED MARRIAGE TAYO, GANON?” I screamed at the top of my lungs. Mabigat at mabilis ang aking paghinga. Sa huli, ang plano kong kalimutan ang isyung ito ay naibubulas ko lang rin. 

Tumaas ang kanyang dalawang kilay, na para bang nagtatanong kung may problema sa sinabi ko. He scoffed, “Heh, alam mo.” 

Lumakad siya palapit sa akin. Mabigat ngunit mabagal ang kanyang mga hakbang. Kusang napahakbang ako paatras. Hanggang sa tumama ang aking likod sa dingding at wala na akong maatrasan. Nang nasa harapan ko na siya ay nilapit niya ang kanyang bibig sa aking tainga at bumulong. 

“Sigurado hindi kumpleto ang nalalaman mo. Gusto mo bang ako mismo ang magkwento kung ano ang mga ginawa namin sa–”

Sinampal ko siya ng malakas. Ramdam ko ang basa sa aking pisngi. Walang tigil sa pagtulo ang aking mga luha. Nanghihina ako. 

“Bakit… bakit,” hindi ko na naituloy ang aking sasabihin dahil umikot bigla ang aking paningin kasabay ng pagsakit ng aking puson.

Few seconds later, I felt blood dripping down my legs.