Kabanata 3

Naging mabilis lang ang pangyayari. Sa halos sampung minutong lumipas ay narehistro na agad ang kasal nilang dalawa. Ang problema niya nga lang ay ang nakasimangot na mukha ng lalaki. 

Nagduda tuloy ang mga staff sa loob ng ahensyang iyon na napilitan lang ito na pakasalan siya. O hindi nga ba? Ilang beses pa itong tinanong ng mga staffs kung sigurado ba talaga ang lalaki sa desisyon nito.

Habang lihim niyang pinagmamasdan ang mukha nito ay hindi niya maiwasang itanong sa sarili niya.

Hindi ba talaga ito marunong ngumiti?

Pero lumipas ang ilang sandali ay nawala ang atensyon niya dito lalo pa ng makita niya ang makulimlim na kalangitan sa itaas. Naalala niyang may paparating palang bagyo sa lugar nila. Kailangan na niyang umuwi para iligpit ang mga sinampay niya.

"Sir may importante pa pala akong pupuntahan. Mag-usap nalang po tayo through chat kung may tanong kayo. Add friend nalang po kita."

Hindi naman ito nag-atubili at nakipagpalitan ng account name sa kanya. Ngayon niya lang napagtanto na hindi niya pa pala alam ang buong pangalan ng napangasawa niya! Wala din naman kasi doon ang atensyon niya kanina.

"Drake Levin Yoshida, your husband…" anito nang mapansin ang pagkunot ng kanyang noo habang binabasa ang pangalan nito.

Lihim siyang napapitlag nang maramdaman ang tila mabilis na pagtibok ng puso niya lalo na nang masalubong niya ang medyo singkit at itim nitong mga mata. "O—kay. Tatawagin nalang kitang Mr.Yoshida mula ngayon."

Mr.Yoshida?

Playing hard to get huh?

Naniniwala talaga si Drake na nagpapanggap lang si Graciella sa mga ikinikilos nito. "Marami pa akong gagawin kaya hindi kita maihahatid," masungit niyang turan.

"Naku, ayos lang po. Huwag mo na akong alalahanin. Sapat na sakin na nagpunta ka dito ngayon," masigla nitong sagot at sumakay na sa electric scooter nito.

"Goodbye Mr.Yoshida," nakangiting kumaway ang babae at tuluyan ng umalis.

Sinundan ng tingin ni Drake ang papalayong bulto ni Graciella. Inaasahan niyang lalabas na ang totoong kulay nito sa oras na makasal sila—hihingi ito ng pera o kung anu-ano pang bagay mula sa kanya pero ang ipinagtaka niya ay tanging marriage certificate lang ang tinangay nito at wala ng iba.

Unti-unting nagsalubong ang kanyang makapal na kilay. Hindi niya maipaliwanag pero pakiramdam niya ay ginamit lang siya ng babae.

Iyon ba ang paraan nito para akitin siya?

Nasa kalagitnaan siya ng pag-iisip nang tumawag ang kanyang secretary para ipaalam ang importanteng meeting na kailangan niyang puntahan. Agad na nagseryoso ang kanyang mukha at ibinalik sa kanyang bulsa ang kanyang cellphone.

As the CEO of Dynamic Group of Companies, bata palang siya ay sinanay na siya bilang tagapagmana ng kumpanya kaya naman nasanay siya na halos lahat ng tao ay sumusunod sa kanya. Pero iba ang nangyari ngayong araw. Bigla nalang dumating si Graciella at sa ilang sandali lang ay nakasal agad sila.

Siguraduhin lang talaga ng babae na wala itong binabalak na hindi maganda dahil sisiguraduhin di  niyang ililibing niya talaga ito ng buhay.

Pagdating ni Graciella sa bahay ay malakas na ang hangin sa labas. Agad niyang iniligpit ang mga danit para hindi tangayin ng hangin.

Tahimik ang buong bahay. Agad na sumagi sa isipan niya ang kanyang ina. Mula pagkabata ay hindi ito kailanman nagbibigay ng pera sa kanya kaya naman nagsumikap siyang magtinda ng prutas at gulay na nakukuha niya sa bukirin kahit pa halos masunog na ang balat niya sa mainit na sikat ng araw para lang may pambili siya ng libro na gagamitin sa pag-aaral niya at iba pang gastusin sa eskwelahan. 

Kaya habang lumalaki siya, tumatak sa isipan niya kung gaano kahirap ang buhay kung wala kang pera. Natuto siyang magtipid. Bawat piso ay mahalaga.

Pagkatapos niyang ayusin ang mga damit niya ay napasulyap siya sa kanyang cellphone.

Twenty missed calls…

Lahat galing sa kapatid niya. Kaya man niyang suwayin ang kanyang ina pero hindi ang kanyang nakakatandang kapatid. Malaki ang respeto niya sa lalaki kaya hinanda na niya ang marriage certificate para ipakita dito.

Habang sa kabilang banda ay halos hindi naman mapakali si Garett. Kilala niya ang kapatid niya. Kahit na marami itong manliligaw ay wala itong sinagot ni isa. Mukha ngang walang balak mag-asawa ang dalaga kaya nakapagtataka kung paano nito nasabi sa kanya na nagdadalantao ito at nagbabalak ng magpakasal!

Hindi talaga kapani-paniwala.

Pero nang ibigay ni Graciella sa kanya ang marriage certificate nito kinabukasan ay mas lalo lang siyang nagimbal. Hindi iyon peke! Totoo ngang nagpakasal ang kapatid niya!

Katabi ng kanyang kapatid sa larawan ang isang lalaki na hindi niya kilala subalit kapansin-pansin ang malamig at nakasimangot nitong aura.

Dahil sa takot na baka mahalata ni Garett na hindi dahil sa pagmamahal ang pagpapakasal nila ni Drake ay agad niyang binawi ang litrato nilang dalawa at pilit na ngumiti.

"Siguro naman ngayon naniniwala ka na na hindi ako nagbibiro sa sinabi ko," aniya bago sumandal sa balikat ng kanyang kapatid. "Huwag kang mag-alala Kuya, mabait si Drake at mahal na mahal namin ang isa't-isa."

Pero hindi parin kumbinsido si Garett sa desisyon ni Graciella. Paano nalang kung aapihin ng lalaking ito ang kapatid niya?

"Pero dapat sinabi mo parin sakin ang bagay na'to bago ka nagpakasal sa kanya. Sigurado ka ba talaga na tatratuhin ka ng tama ng lalaking yan? Itsura pa lang niyan mukha ng may galit sa mundo eh. Ilang taon na ba siya at saan siya nakatira?"

Napakurap-kurap si Graciella sa tanong ni Garett.

Ilang taon na nga ba si Drake?

Mabilis niyang sinulyapan ang marriage certificate bago sumagot. "Twenty nine years old na siya at taga-dito lang din sa syudad."

"Eh yung pamilya niya? Mabait ba? May sarili na bang bahay yan?" Dagdag katanungan nito.

Natameme na zi Graciella sa mga tanong ni Garett. Ano nga bang isasagot niya sa kapatid niya gayong hindi niya lubos na kilala ang lalaking pinakasalan niya?