Kabanata 4

Mas lalo lang na nandagdagan ang kuryosidad ni Garett tungol sa kasal ng kanyang kapatid nang hindi makasagot si Graciella sa mga katanungan niya.

"Hayaan mo na ang kapatid mo, Garett. Malaki na yan at alam na niya ang ginagawa niya sa buhay," singit ni Cherry, ang asawa ng kanyang Kuya Garett.

"Tama si Ate Cherry, Kuya, kaya huwag ka ng masyadong mag-alala sakin," sang-ayon niya sa kanyang hipag.

"Pero sa kabilang banda, dapat parin na nagpaalam ka kay Mama Thelma tungkol sa biglaan mong pagpapakasal para mapag-usapan ninyong mabuti kung tama ba ang desisyon mo o hindi," bigla nitong kambyo sa nauna nitong pahayag.

Lihim siyang napaingos. Ano bang dapat nilang pag-usapan? Para hindi siya nito payagan at tuluyan siyang ipakasal sa matandang lalaki na gusto nito para sa kanya kapalit ng pera?

"Alam mo kasi tayong mga babae, ilang taon lang tayong bata at kapag nagkaedad tayo, wala na… Hindi katulad ng mga lalaki, habang pataas ng pataas ang edad, pataas din ng pataas ang value nila. Isa pa, sabi ni Mama Thelma, mayaman daw ang lalaking nais niyang ipakasal sayo. Dapat ay yun nalang. Sigurado akong magiging marangya pa ang buhay mo," pagpapatuloy pa ni Cherry.

Pinili nalang niyang hindi sumagot at makipag-argumento. Simula ng maliit pa sila, ang kanyang ina ang boses ng bahay nila. At ang lalaking anak ang paborito ng mga magulang nila dahil ito ang nagdadala ng apelyido ng buong angkan habang ang mga babaeng kagaya niya ay ibebenta lang rin sa ibang pamilya sa murang halaga.

Akala niya ay may nagawa siyang mali sa kanyang ina noon kaya naman ginawa niya ang lahat para maipagmalaki siya nito na hindi naman nangyari. Pagkatapos niya ng high school ay pinilit siya nitong magtrabaho sa factory.

Nang hindi siya pumayag ay pinalayas siya nito sa bahay nila. Naranasan niyang tumira sa lansangan hanggang sa makahanap siya ng extrang trabaho sa karinderya para may pangkain siya. Muntik na siyang matigil sa pag-aaral niya sa college, mabuti nalang at may tiyahin siyang umampon sa kanya sa loob ng dalawang taon habang pasikreto siyang binibigyan ng kanyang kapatid ng pera na inipon nito.

Mabuti nalang at nakakuha siya ng scholarship kaya't nakapagpatuloy siya sa pag-aaral hanggang sa makagraduate siya at nakahanap ng maayos na trabaho.

Naalala pa niya kung paano nainggit ang mga kaibigan niya sa katawan niya dahil kahit anong kain niya, hindi siya tumataba. Ang hindi nila alam, payat siya dahil sa malnutrisyon. Tapos ngayon, balak pa talaga siyang ipakasal dahil lang sa pera.

Mukhang wala na talagang pag-asa na magbago ang kanyang ina.

Kaya naman ang kapatid niya lang itinuturing niyang pamilya. Sumusuporta parin naman siya sa mga magulang niya dahil kahit papaano, tumatanaw siya ng utang na loob dito. Kung hindi dahil sa mga ito, wala siya sa mundong ibabaw ngayon. Pero hangga't doon lang ang kaya niya at hindi niya kayang sundin ang iba pang kagustuhan ng mga ito.

Nang mapagtanto ni Cherry na hindi niya makukumbinsi si Graciella na magpakasal ay naiinis siyang umalis sa salas at iniwan ang magkapatid.

Pagkaalis ni Cherry ay agad na ginagap ni Garett ang kamay ni Graciella. "Huwag mo ng pansinin ang sinabi ng Ate Cherry mo."

Tipid namang ngumiti si Graciella sa kapatid. "Don't worry, Kuya. Kasal narin naman ako. Wala na silang magagawa pa tungkol doon."

Tiningnan ni Garett si Graciella bago ang marriage certificate nito. Bumuntong hininga ito bago may kinugot ba card mula sa pitaka nito at iniabot sa kanya.

"Kuya…"

"May laman na kaunting pera yan Graciella. Inipon ko talaga yan bago ako nag-asawa. Para sayo yan. Hinanda ko yan sakaling darating ang araw na mag-aasawa ka na para may magamit ka. Isipin mo nalang na regalo ko iyan sayo," masuyo nitong bigkas.

Mabilis siyang umiling at akmang isasauli niya kay Garett ang ATM card pero hindi nito iyon tinanggap. 

"Kunin mo na yan. Mas magandang may extra kang pera ngayong nag-asawa ka na. Hindi man yan ganun kalaki pero mas mainam parin na may mahuhugot ka kung may nais kang bilhin."

Agad na namuo ang luha sa kanyang mga mata. Ang bait-bait talaga ng kuya niya.

"Huwag mo narin dalasan ang pagbibigay ng pera kay Mama. Mag-ipon karin ng para sayo. Ako na ang bahala sa kanya kapag may kailangan siya. May pamilya ka na. Baka hindi magustuhan ng asawa mo kapag lagi kang nagpapalabas ng pera lalo't bagong kasal lang kayo at marami pang gastusin," pagpapatuloy nito.

Hindi na siya nakatiis pa at yumakap na sa kanyang kapatid. "Thank you so much Kuya…"

Napangiti naman si Garett. Halos lahat ng pera sa pamilya nila ay sa kanya napunta at walang ibinigay ni isang kusing kay Graciella. Hindi niya maatim na ipagkait sa kapatid niya ang parte nito.

Tinapik nito ang kanyang likuran at hinaplos ang kanyang buhok. "Sana magiging masaya ka sa bago mong pamilya, Graciella. Wala akong ibang hiling kundi ang kaligayahan mo."

Tuluyan ng napaluha si Graciella. Alam niyang nagsikap din ang kapatid niya para may magandang buhay itong maibibigay sa pamilya nito kaya naman noong nagkaroon na siya ng trabaho, hindi niya nakakaligtaan na bigyan din ito ng pera bilang pagtanaw ng utang na loob sa kusang pag-aalaga at pagsuporta nito sa kanya.

Hindi niya aakalain na ngayong nagpakasal siya, may itinabi itong pera para sa kanya. Hindi man siya maswerte sa mga magulang, sobrang swerte naman niya sa kapatid niya…