Chapter Fourteen

YSMAEL Lance Madrigal is mine. Only mine! mariing sabi ni Bianca sa sarili habang nakatingin sa palayong sasakyan ng  lalaking buong puso niyang minamahal. Hindi niya tuloy napigilan ang mapangisi. Kani-kanina lang kasi ay damang-dama niya ang galit ni Lance na para bang gusto siyang itapon palabas ng kotse. 

Pero, hindi nito ginawa. 

Alam niya kung bakit. Kasi nga mahal din siya nito. Baka nahihiya pa lang itong aminin sa kanya pero alam niya, may gusto rin ito sa kanya.   

Ayaw niyang tanggapin kapag sinasabi nito sa kanyang hindi siya nito mahal dahil talagang hindi niya kayang paniwalaan iyon. O mas tamang sabihing tumatanggi siyang paniwalaan dahil alam naman niya sa sarili kung gaano siya kaganda. 

Bawat lalaki naman kasi ay ang panlabas na anyo lang ang tinitingnan kaya alam niyang walang sinuman ang hindi ang magmamahal sa kanya. 

Mula pa nga pagkabata ay alam niyang lahat ng gusto ng isang Bianca Francisco ay makukuha niya dahil mahal na mahal siya ng kanyang mga magulang at ipinanganak siyang may gintong kutsara sa bibig. Kaya, naman bata pa lang siya ay kinaiinggitan na siya. Biruin mo ba naman, mayaman na siya, maganda pa. Hindi lang maganda, super ganda. Marami nga ang nagsasabing pwede siyang ihanay sa Miss Universe. Iyon nga lang hindi Pinay ang beauty niya dahil mestiza siya. 

Kaya naman ng main-love siya ay inakala niyang forever na ang nararamdaman niya kay Jason. Mahal na mahal naman kasi niya ito at alam niyang ganoon din ito sa kanya. Nu'ng una. Ewan nga lang niya kung saan siya nagkamali at nagpasya itong makipagkalas sa kanya. Gayungipinakita naman niya rito kung gaano niya ito kamahal at walang sinumang babae ang maaaring umagaw rito buhat sa kanya. 

Ilang beses na nga rin siyang nakipagsabunutan dahil kay Jason. Hindi naman kasi siya papayag na may kung sinong babaeng lalandi rito. Ngunit, hindi sapat iyon para mapigilan niya si Jason na humanap ng iba. 

Sobrang sakit ang naramdaman niya ng ipagpalit siya nito sa babaeng hindi naman kagandahan pero hindi naman nalalayo sa antas ng kanyang pamumuhay. Pakiramdam niya tuloy ay fling lang ng ex niya ang babaeng iyon ngunit kahit na ilang taon na ang lumipas ay hindi pa rin naghihiwalay ang dalawa at balita niya ay ikakasal na. At wala na siyang pakialam doon. 

Maraming taon na rin naman kasi ang lumipas at ang pagmamahal niya ay nalipat na kay Lance kaya lahat ay ginawa niya para lang mapalapit dito. Iyon nga lang, kahit na todo ang pagpapaganda niya at halos maligo na siya ng pabango ay parang hindi siya nito nakikita bilang isang babae na kaakit-akit. Dahil doon, mas nagkakainteres siya rito at namalayan na lang niya na mahal na mahal na niya si Lance.

Kung dati'y inakala niya na hindi na niya makakaya pang magmahal muli, pwes nagkamali siya dahil ang pag-ibig niya ngayon para kay Lance ay doble pa sa naramdaman niya para sa kanyang ex. Kaya naman, hindi niya gugustuhin na may ibang babae itong pagtutuunan ng atensyon. 

Kaya naman nang makita niya kaninang may kausap itong babae ay parang gusto niyang magwala. Siya ang kasama ni Lance kaya sa kanya lang dapat ang atensyon nito. Ngunit, hindi na niya nabawi pa ang kanyang Lance nang sumakay ang mga ito sa ferris wheel kasama ang isang batang babae. 

Kung maaari lang ay magwala siya, ginawa na sana niya. Kaya lang, alam niyang hindi iyon magugustuhan ni Lance. Ayaw niyang nagagalit ito sa kanya. At natatakot din siyang iwanan ito. Ngayon pa nga lang na nai-imagine na niyang aalis ito sa kanyang tabi ay nadudurog na ang kanyang puso. Kaya, tiyak niyang mamamatay siya kapag si Lance ang nang-iwan sa kanya. 

Siya, mamamatay? 

Oh, hindi niya ma-imagine ang sarili na nakahiga sa casket. Kaya lang sa imahinasyon niya ay nakita niyang nakahimlay sa itim na casket ang babaeng iyon. Sa kaisipang iyon, hindi niya napigilan ang mapangisi. 

Kung ang ex niya ay hinayaan niyang mapunta pa sa iba, hindi niya hahayaang maulit iyon ngayon. Binuo ni Lance ang kanyang puso kaya hindi na niya hahayaan pang madurog iyon. 

"So, who is she?" kunwa'y hindi interesado niyang tanong nang lumapit na sa kanya si Lance. Gayunman, hindi pa rin niya inaalis ang masamang tingin sa babaing iyon na parang gusto niyang isipin na magiging karibal niya. 

"Mind your business," inis nitong sabi sa kanya. 

Parang gustong madurog ng puso niya dahil nagawa siyang pagtaasan ng boses ng kanyang mahal dahil sa babaeng iyon. Kanina kasing kasama nito ang babaeng iyon ay abot tenga ang ngiti nito, pati nga ang mga mata nito ay nakatawa pero nang bumalik na ito sa kanya ay wala na ang kasiyahang nakikita niya kanina sa guwapo nitong mukha. 

"Mag-ina sila, hindi ba?" tanong niya sa halip. 

"Yes."

"At sure akong hindi ikaw ang ama ng bata," wika niya kahit hindi siya sigurado sa sinabi. Kahit hindi naman kamukha ni Lance ang bata ay para pa ring nakikita niya si Lance dito. Kaya, natawa siya. Para kasing ang gulo ng kanyang isip. Kasing gulo ng utak niyang parang gustong mabaliw sa selos.

Nang makita niya kasi ang mga ito kanina ay parang isang buong pamilya ngunit isang bahagi naman ng isipan niya ang tumatanggi. Ang alam niya'y single at walang anak si Lance. 

"Shut up!" wika nitong hindi naman talaga galit. Kung pagbabasehan niya ang hitsura nito'y alam niyang nasaktan ito. 

Tumahimik naman siya pero ang isip niya ay hindi na tumigil sa paggana lalo na nu'ng aminin sa kanya ni Lance na mahal nito ang babaeng iyon kahit na mayroon na itong sariling pamilya. Para tuloy gusto na niyang patayin ang babaeng iyon para makasigurado siyang hindi na nito maaagaw sa kanya si Lance.

Ahhh, talagang hindi na siya papayag na may lalaki na namang mawawala dahil sa ibang babae. 

Ngunit kahit gusto na niyang maghanap ng hired killer ay ipinilig niya ang kanyang ulo. Kung ngayon kasi siya kikilos ay alam niyang mapagdududahan lang siya ni Lance at hindi niya gugustuhing magalit ito sa kanya. 

So, ang kailangan niyang gawin sa ngayon ay huminto at mag-isip. Walang mangyayaring maganda kung magpapadalus-dalos lang siya. Sa pagkakataon kasing ito ay kailangan niyang gamitin ang kanyang utak. Gayunman, kailangan niyang malaman ang lahat tungkol sa kanyang kalaban. 

At hindi mahirap gawin iyon lalo na kung ikaw ay may perang maibibigay sa mga taong magagawa ang lahat ng paraan para malaman niya ang lahat ng detalye tungkol sa babaeng alam niyang banta sa pag-ibig niya kay Ysmael Lance Madrigal.