Chapter Fifteen

"FINAL question. Are you sure?" marahang tanong sa kanya ni Mark Wayne. 

Tiyak niyang mahal siya ni Mark Wayne kaya naman kahit alam nitong makabubuti ang pagpunta niya sa Channel 26 ay parang nag-aalangan ito. Sino ba naman kasing mister ang gugustuhin na makatrabaho ang ex-boyfriend ng asawa. At hindi rin lingid sa kaalaman ng kanyang mister na may damdamin pa siya kay Lance kahit hindi niya aminin dito. 

"Sure na sure," mariing sabi ni Jillian sa kanyang asawa ngunit hindi niya ito nilingon o sinulyapan man lang sa salamin. Sa halip ay ipinagpatuloy lang niya ang kanyang pagmi-make up. Ito kasi ang unang araw na tatapak siya sa Channel 26 para tuparin ang kondisyon na hinihingi ni Lance. 

Marahas na buntunghininga ang pinawalan ni Mark Wayne. Para tuloy gusto na niya itong pagtawanan. Ngunit, pagkaraan, pinagalitan niya ang sarili. Alam kasi niyang wala na itong magagawa para pigilan siya. Bukod sa hindi naman siya ang taong nagpapaawat kapag nakapagdesisyon na siya. Alam din ni Mark Wayne na importanteng hindi isipin ni Lance na i-withdraw ang lahat ng pera nito sa Mabuhay Bank. 

"Kaya, huwag mo na akong masyadong alalahanin."

"Pwede ba naman iyon, eh, asawa kita."

Ang pagbanggit nito sa katagang 'asawa kita' ay talagang mayroong diin. Siguro ay iniisip nitong walang ibang may karapatan sa kanya kundi ito lang. Well, totoo naman iyon. Nais niyang ialay dito ang buong buhay niya. Kay Mark Wayne at kay Apple. 

Napabuntunghininga lang siya dahil sa isipan niya ay parang napapalitan ang mukha ni Mark Wayne. Talaga kasing malaki ang epekto sa kanya nu'ng nakasama nila ni Apple  si Lance sa pagsakay sa ferris wheel ngunit alam niyang hindi tama iyon kaya't ang eksena ay pilit niyang binubura sa kanyang isipan. 

"I love you," wika ni Mark Wayne. 

"Love you too," hindi niya napigilang sabihin. Ewan nga lang niya kung sinabi niya ang ang mga salitang iyon dahil totoo sa loob niya o baka naman dahil alam niyang responsibilidad niya bilang asawa na sabihin ang mga katagang iyon. 

Kahit naman kasi matagal niyang pinangarap ang pag-ibig ni Mark Wayne noon, biglang nagbago ang lahat nang pumasok sa buhay niya si Lance. Ipina- realize kasi nito sa kanya na walang-wala ang pag-ibig na naramdaman niya noon kay Mark Wayne. Iyon nga lang, nagawa pa rin niya itong iwanan dahil hindi niya makayang magamit para masaktan ang kanyang matalik na kaibigan. 

"Kung hindi na kita mapipigilan pa. Okay lang naman siguro kung ihatid kita, hindi ba?" masuyong tanong nito sa kanya. 

Malungkot na malungkot ang mga mata nito kaya alam niyang natatakot din ito sa kung ano ang mangyayari dahil sa pagsasama nila ni Lance sa isang kumpanya. Ngunit, kahit na sabihing may nararamdaman pa siya sa kanyang ex-boyfriend, hindi naman niya hahayaan na maging daan iyon para masira ang relasyon nila ni Mark Wayne. 

At iyon ang kailangan niyang ipaintindi dito ng paulit-ulit. Kung hindi nito kayang pagkatiwalaan si Lance, siya ang dapat na pagkatiwalaan nito ng lubos dahil mahal niya ito at hindi kailanman sasaktan. Mas importante ang kanilang pinagsamahan kaysa sa kung ano ang sinasabi ng puso niyang maaaring maging dahilan pa para siya ay mapahamak. 

"Siyempre naman," wika niya saka ito nilingon. "Okay na ba ang hitsura ko?"

"Ikaw ang pinakamagandang nilalang sa buong mundo para sa akin," nakangiting sabi ni Mark Wayne pero halata naman ang kasiyahan ay hindi umaabot sa mga mata nito. 

Matalik niyang kaibigan si Mark Wayne kaya naman alam na alam niya kung anong nararamdaman nito ng mga sandaling iyon -- matinding pag-aalala at takot na rin. Alam kasi nito kung gaano niya minahal si Lance kaya hindi nakapagtataka kung binabalot man ng matinding takot ang puso nito ng mga sandaling iyon. 

May mga pagkakataon tuloy na sinasabi nito palagi sa kanya na pinagsisisihan nito ng labis ang pag-iwas nito sa kanya noon at ang pananadya nitong saktan siya sa pamamagitan ng pakikipaghalikan sa ibang babae. Ang gusto daw kasi nito talaga ay makahanap siya ng iba na magiging karapat-dapat sa kanyang pagmamahal dahil alam nito na hindi siya nito mapapaligaya at mabibigyan ng pamilya. 

Ngunit, mariin nitong sinabi sa kanya na bata pa lang sila ay mahal na mahal na siya nito. Kaya, nga daw mas gusto na nitong magsakripisyo para sa kanya. Kaya nga lang ay hindi nangyari ang gusto nito ng hiwalayan niya si Lance at mabuntis siya. Minabuti na nitong alukin siya ng kasal. 

Kahit na tumatanggi ang kanyang puso ay minabuti niyang pumayag. Una, ibig niyang magkaroon ng ama si Apple. Pangalawa, gusto niyang matulungan si Mark Wayne para maitago sa lahat ang tungkol sa 'kapansanan' nito. 

"Sa paningin mo ba, ako ang pinakapoging nilalang?" malambing na tanong nito. 

"Siyempre naman," mabilis niyang sabi. 

"Good to know," sabi na lamang nito nang malalayan siya palabas ng bahay at pasakay ng kotse. Hindi na sila nagpakita pa kay Apple dahil alam niyang magwawala ito kapag nakita silang umalis. 

Okay lang naman kay Apple na makita silang umalis ng bahay ng hindi magkasama. Kapag kasi nakita nitong magkasama sila ang agad na pumapasok sa isip ng kanilang anak ay mayroon silang date at ayaw na nila itong makasama kaya kalimitan ay nagwawala. Mabuti na lang at kahit na ala siyete na ay natutulog pa ito. Siguro ay hindi pa talaga nakakapag-adjust ang body clock nito o marahil ay masyado lang itong napagod sa pamamasyal nila. 

Hindi nga lang niya maiwasan ang mapangiwi dahil ang piakamasayang bahagi raw ng pamamasyal ng anak ay iyong pagsakay nito sa ferris wheel. Ibig sabihin, mas tumatak sa isipan ni Apple ang sandaling kasama nito si Lance kaysa kay Mark Wayne, na alam niyang bahagyang nagdamdam dahil sa pananahimik nito. 

Kaya naman palagi niyang hinahawakan ang kamay ni Mark Wayne at niyayakap dahil gusto niyang maiparamdam dito ang kanyang pagmamahal. Ang problema lang, may guilt din siyang nararamdaman dahil masaya din siya na nakasama si Lance. 

Ibig lang niyang isipin na dahil lang iyon kay Apple. Sapagkat kasi sa isang saglit ay naging isa silang pamilya. Ngunit, hindi dapat niya pansinin ang pagbilis ng tibok ng kanyang puso. At ang pinakaepektibong paraan para makalimutan niya iyon ay iyong ipaalala niya palagi sa kanyang sarili ang kasamaang nagawa nito sa kanya. 

"Masyado ka namang tahimik diyan," hindi niya napigilang sabihin dahil mula pa nang sumakay sila ni Mark Wayne ay wala na itong kibo. Ang naisip niya tuloy niya ay nagdadalawang isip na itong ihatid siya sa Channel 26. 

Kung sabagay, siya rin naman ay ganoon ang nararamdaman. Kahit na sinabi ni Lance na trabaho ang gagawin niya sa kumpanya nito ay may oras pa rin na magkikita at magkakasama sila. Gayunman, pilit niya iyong itinaktak sa kanyang isipan. Wala namankasing mangyayari kung siya'y magpapadaig sa takot. 

"Para kasing mali itong gagawin natin. Alright, malaki ang tiwala ko sa'yo pero wala akong tiwala kay Lance. Alam kong may plano siyang maghiganti sa atin kaya niya ito ginagawa."

Hindi niya napigilang mapalunok sa sinabi ni Mark Wayne. Alam naman kasi niyang may punto ang kanyang My Wayne sa sinasabi nito. Hindi niya tuloy ito napigilang titigan kahit na nasa daan ang buong atensyon nito. 

"At natatakot ako na maagaw ka niya sa akin."

"Hindi mangyayari iyon," mariin niyang sabi. 

Sinulyapan lang siya nito at binigyan ng matipid na ngiti. Alam niyang gusto nitong maniwala sa kanyang sinasabi ngunit parang nagdududa. Para tuloy gusto niyang magalit. Hindi dahil sa pakiramdam nito ay hindi siya dapat pagkatiwalaan kundi dahil sa alam niyang may katwiran naman itong mangamba dahil habang palapit siya ng palapit sa Channel 26 ay talagang kinakabahan siya na muli silang magkakaharap ni Lance.