0006

“Ember wants divorce,” wika ni Cassian bago pa naupo sa harap ng mga kaibigan. 

Wala sana siyang plano lumabas ng bahay dahil hinihintay niya si Ember umuwi pero makulit si Mathias at may kailangan daw kay Vito kaya sinamahan na niya. Sina Mathias at Vito ay pareho niyang mga kaibigan mula pa noong college sila. At dahil si Mathias ay bihira lang magpakita sa kanila ni Vito ay pumayag na rin siyang maabala ng mga ito.

“Divorce?” tanong ni Vito sabay lapag sa harap nila ni Mathias ng maiinom. “Nagpapatawa ba ‘yang asawa mo?” 

Umiling si Cassian. “Paggising ko kanina ay wala na siya. Nilayasan na nga ako. Akala niya ay gusto kong balikan si Lauren.”

“Hindi ba?” tanong ni Vito na natawa. “She’s back, Cassian. Nagpapansin na nga. At dahil hindi ka naman seryoso panindigan ang kasal niyo ni Ember ay bakit hindi mo na nga lang balikan si Lauren?”

“Hindi niyan babalikan si Lauren,” ani Mathias kay Vito at tiningnan si Cassian. “Hindi ka pa rin naman bobo siguro, Cassian, kaya pupusta ako na hindi mo babalikan si Lauren.”

“Pusta ako na babalikan niya…” ani Vito kay Mathias. Naniniwala siyang si Lauren ang mahal ng kaibigan kaya kahit anong mangyari ay babalikan ito ni Cassian. 

“Okay, magkano pusta mo?” tanong niya kay Vito.

“Five million.”

“In Philippine Peso?” pagkaklaro ni Mathias. “Make it ten. Masyadong mababa. Naghihirap ka na ba?” pang-asar na tanong ni Mathias kay Vito. “At sama natin si Austin sa pustahan. I’ll message him.”

“Si Austin?” tanong ni Cassian dahil matagal na niyang hindi nakita ang isa. In fact, simula nang magising siya sa comatose two years ago ay hindi pa ito nagpakita sa kaniya.

“Nasa California siya ngayon. Magkikita nga kami bukas.”

Tumango na lang si Cassian. Nagpatuloy ang dalawa sa pag-uusap at asaran, nanatili naman siyang nakaabang sa kahit anong message mula kay Ember. Lumipas na lang ang isang oras ay wala pa ring message si Ember kahit isa. 

“Mukhang seryoso ang babaeng ito i-divorce ako…” ani Cassian at sumandal bago asar na inilapag ang phone sa coffee table. 

“Then, divorce her…” tinatamad na wika ni Mathias. “Mula nang magising ka ay inirereklamo mo na ang ginawa sa ‘yo ng magkapatid na Ember at Lauren, now Ember wants to divorce ay pagkakataon mo na para kumawala sa sabi mo nga ay walang kuwenta ninyong pagsasama.”

“Akala ko ba pupusta ka na hindi niya babalikan si Lauren?” tanong ni Vito kay Mathias.

“Oo, ‘yon nga ang pusta ko,” tugon ni Mathias. “Wala naman kinalaman ‘yon sa divorce nila ni Ember sakali.”

Huminga ng malalim si Cassian, hindi lang siya umiimik pero kanina niya pa inaanalisa ang mga sinasabi ng dalwa. Si Vito ang pinakalaging nangangantiyaw sa kaniya na si Ember ang napangasawa niya imbes na ang kapatid nito na si Lauren. Sa ganda ni Lauren at kasimplehan ni Ember ay normal na para kay Vito sabihin lagi na nalugi siya sa babaeng pinakasalan.

Si Mathias ay noon pa walang pakialam kung si Ember ang pinakasalan niya. Ang sabi lang ni Mathias ay kung dahil sa itsura ni Ember kaya hindi niya ito magustuhan ay iparetoke na lang niya at gawin niyang mas maganda pa kay Lauren. Nakaganti na siya sa ex ay nainis niya pa dahil hindi niya hinihiwalayan ang kapatid nito.

Si Austin ang walang opinyon kahit kailan. Hindi niya pa ito nakikita ng personal pero nakakausap naman niya paminsan-minsan thru video call. Abala si Austin lagi pero simula noon pa man ay abala na ito lagi. Kahit noong mga college pa sila ay goal-oriented na ito.

Well, lahat naman sila naging abala na sa mga negosyo nila. Si Vito lang ang hindi abala masyado gaya nila dahil mas gusto talaga nito magpakasaya lang lagi kaysa magseryoso. Ang katwiran pa ni Vito ay hindi naman sila pabata kaya dapat habang kaya pa ay i-enjoy lang nila dapat ang buhay. 

I-enjoy ang buhay. Gano’n din naman si Cassian noon. In fact, sa kanilang apat ay sila Cassian at Vito talaga ang laging magkasama dahil sila ang mas maraming oras sa goodtime kaysa business. Iba sina Mathias at Austin na kahit nag-aaral pa sila ay nakatutok na sa negosyo ang mga atensyon ng mga ito. Pareho rin nag-asawa agad ang dalawa. Pareho na rin nabyudo. 

At ngayon siya ay magiging diborsyado. 

Tunog mula sa phone ang umagaw ng atensyon ni Cassian. Agad niyang kinuha ang phone sa isip na si Ember iyon at gusto nang umuwi. Baka nagso-sorry na. 

Pero walang message mula kay Ember. Ang message ay mula sa bangko at—Napakunot ang noo niya sa nabasa, ang card number? Iyon ang card na gamit ni Ember na himala at ginamit na nito sa wakas. 

“Si Ember na ‘yan, ‘no?” tanong ni Vito. “Nagpapasundo na?” natawang dagdag niya. “Sabihin mong gusto niyang lumayas ay matuto siyang umuwi mag-isa.”

Umiling si Cassian. “No. It’s my bank.” Cassian smirked. “Mukhang nagsa-shopping na sa kauna-unahang pagkakataon ang asawa ko.”

Nagkatinginan sina Vito at Mathias. Hindi maitatago sa kanila ang kakaibang pagkakasabi ng kaibigan nila ng ‘asawa ko’ pantukoy kay Ember. Napakunot ang noo ni Vito dahil noon pa ito pumupusta na maghihiwalay ang dalawa at hindi magtatagal. Si Mathias ay natawa na lang sa siguradong panalo sa pustahan nila ni Vito.

Pagkatapos ng unang message ng bangko kay Cassian ay may mga sumunod pa. Sunod-sunod. Bag, damit, sapatos, alahas… Kung saan-saang branded store ang mga nagmi-message kay Cassian na balewala lang sa kaniya, dahil ang naglalaro sa isip ay kung ginagamit ni Ember ang card na bigay niya ay isa lang ang posibilidad, nagbago na ang isip nito sa divorce. 

Naisip niyang i-message si Ember, sasabihin niyang pupuntahan niya ito sa kung saan ito nagsa-shopping. Pag-open niya ng messaging app ay natigilan siya sa nakitang last message na naroon, that was yesterday, bago siya umuwi para sa birthday celebration niya sana. 

Birthday celebration na wala siyang naabutan kasi nagliligpit na ang isa. 

“I better go…” paalam niya sa dalawa. Pupuntahan niya ang asawa para makausap. 

“Sabay na ako,” sabi ni Mathias at tumayo na rin. 

“Sa Red Veil pala ako maya,” imporma ni Vito sa kanila. “Baka gusto niyo mag-enjoy. May mga bisita ako sa club na mga kasama sa cast ng bagong pelikulang gagawin ko next month.”

“Hindi ako makakapunta,” ani Cassian. Tumayo at umalis na agad. Hindi na rin nag-abala pang magpaalam dahil kailangan niyang mahanap si Ember. 

“Pupunta ako,” sabi ni Mathias. “Kawawa ka naman kung hindi ako darating,” pang-asar na dagdag nito. “Sagot ko na rin ang gastos mo. Alam ko naman na mawawalan ka ng twenty million kaya ako na.”

“Twenty million?” takang-tanong ni Vito. Ten million lang naman ang pustahan nila pero bakit naging twenty million?

Ipinakita ni Mathias ang reply ni Austin sa tanong niya kung saan ito pupusta. “See?” pang-asar niya pa kay Vito. “Austin with me kaya handa mo na ang panalo namin.”

“Hindi pa tapos ang pustahan, Mathias.”

“Kahit pagbigyan kita ng isang taon, Vito, matatalo ka pa rin. Bulag ka ba? Hindi na gusto ni Cassian si Lauren. Kung ikaw tanga babalikan ang ex mo pagkatapos kang iwan at sumama sa iba ay ikaw ‘yon. Not Cassian.”