Chapter 6

Sa loob ng isang sikat na mall sa Pasay City, marami ang napapalingon sa isang babaeng ipinanganak para maging sentro ng atensyon. 

Dahil sa puti ng kanyang balat at ganda ng mahaba niyang buhok, aakalain mo na isa siyang isang manika. Nakapatong sa ulo niya ang isang sunglasses na lalo pang nagbigay-diin sa kanyang magandang mukha. 

Matangos ang kanyang ilong at mapula naman ang kanyang labi na may natural na alindog. Suot niya ang isang simpleng above the knee na dress na hapit sa kanyang katawan. Mahahalata mo rito ang ganda ng kanyang pangangatawan, sa bawat hakbang niya nagmumukha siyang professional model.

May tinutulak siyang shopping cart. Nakaupo roon ang isang munting batang lalaki na may suot na baseball cap, denim overalls, at checkered na polo. Bagama’t natatakpan ng sumbrero ang halos kalahati ng mukha nito, sapat na ang mapupulang labi at maayos nitong panga para malaman ng kahit na sino na napaka gwapo ng bata. 

“Mommy, nakagawa na po si BabyJeff ng listahan ng lahat ng mga kailangan natin bilhin.” masayang sabi ng bata habang tumitingala sa magandang babae. 

Nang iangat ng bata ang ulo niya, mas lalong napalingon ang mga tao sa kanilang paligid. Para siyang isang prinsipe mula sa pelikula. Napakanatural ng kanyang mukha, malalaki ang maitim na mata, matangos ang ilong at mapupula rin ang labi.

Tanging ang maputla niyang balat ang bahagyang naiiba, ngunit lalo lamang iyong nagdagdag sa kanyang kakaibang kagandahan.

Hindi tuloy malaman ng mga tao kung mag-ina ba sila o magkapatid. Pareho kasing napakaganda ng lahi nila. Napangiti si Althea habang tinitingnan ang kanyang anak. 

"Ang galing talaga ng Baby Jeff ko." puri niya sa kanyang anak.

"Theaaaa! Babyyyy Jeff!"

Narinig nila ang isang masiglang boses.

Lumingon si Althea at nakita ang matalik niyang kaibigan na si Sofia, masayang kumakaway sa kanila.

"Mommy, si Ninang!" tuwang-tuwang sabi ni Jeff, kasabay ng isang napakatamis na ngiti.

Agad na tumakbo ang babae papalapit sa kanila at mahigpit na niyakap si Althea.

Tatlong taon silang naging magkatabi sa klase noong high school kaya napakalalim na ng kanilang pagkakaibigan. Kahit apat na taon silang hindi nagkita nang personal dahil nag-abroad si Althea, halos kada dalawang linggo naman silang nagvi-video call.

Kaya alam na ni Sofia ang tungkol kay Jeff. Pagkabitiw niya sa babae, agad niyang niyakap ang bata. 

"Ninang... hindi na ako makahinga," nakangiting reklamo ni Jeff.

Napahalakhak ang babae at agad siyang bumitiw. Pero hindi pa rin niya maalis ang tingin sa bata.

"Grabe, Thea! Ang ganda talaga ng genes ninyo! Pwede bang ipa-reserve ko na itong inaanak ko para sa magiging anak kong babae?"

Kumindat ang bata bago tumingin sa kanyang ina.

"Ninang, siguradong mas gwapo pa sa akin ang magiging boyfriend mo paglaki. At saka... si Mommy lang ang pinakamamahal ko."

Napahawak si Sofia sa dibdib. Para siyang tinamaan ng sampung libong critical hit. 

"Hay naku! Hindi lang gwapo ang anak mo, sobrang sweet at loyal pa! Naiinggit na talaga ako!"

Napatawa si Althea.

"Kung gusto mo, pwede mo naman siyang hiramin. Basta papayag si Baby Jeff."

Nagkunwaring nagtampo si Sofia.

"Hmph! Kayo na lang talaga ang mag-ina. Grabe kayong magpakilig."

Matapos mamili sa supermarket, iginiit ni Sofia na ilibre niya sina Althea at Jeff sa isang restaurant.

"Wala akong pakialam! Umuwi ka ng bansa nang hindi mo man lang ako sinabihan para sana nasundo kita sa airport. Nagagalit talaga ako, kaya ako ang manlilibre ngayon. Kapag hindi ka pumayag, hindi na kita kakausapin!"

Makalipas ang kalahating oras, nakarating na sila sa isang fine dining restaurant. Ngunit pagdating nila sa entrance, hinarang sila ng isang waiter.

"Sorry po pero nakabook ang buong restaurant ngayong gabi."

Natulala si Sofia.

“Grabe naman, sino naman kaya ang nag pareserve ng isang buong restaurant? Grabe naman ang yaman nun.”

Napansin ni Althea ang pagkadismaya ng kaibigan niya kaya ngumiti siya para mapagaan ang loob nito. 

“Ano ka ba, okay lang ‘yan. Marami pa namang ibang masasarap na restaurant na pwede natin puntahan.”

Napabuntong-hininga na lang ang babae, dahil matagal na niyang gusto kumain sa restaurant na iyon.

“Hays sige na nga, pero gusto ko talaga makita kung sino ang mayamang taong iyon.”

Wala silang nagawa kundi ang lumabas ng restaurant. Pagdating nila sa harap ng nasabing kainan, nagpaalam si Sofia. 

“Thea, hintayin n’yo muna ako rito ni Baby Jeff  kukunin ko lang ang sasakyan.

"Sige, hintayin ka na lang namin dito."

Tumayo ang mag-ina sa gilid ng entrance ng restaurant, tahimik silang naghihintay nang biglang tumunog ang cellphone ng babae. Lumayo siya ng kaunti upang sagutin ang tawag. Samantala, naupo naman sa sahig si Jeff. sa ilalim ng kanyang sumbrero, paikot-ikot ang kanyang mga malalaking mata na tila may kung anong iniisip. 

Maya-maya, may isang lalaki ang lumabas mula sa restaurant.

Agad siyang napansin ng bata.

Matangkad ito at nakasuot ng mahabang itim na coat. Napakaplantsado ng kanyang pantalon na bumagay sa mahahaba niyang binti. Maikli at maayos ang kanyang buhok, habang ang kanyang gwapong mukha ay tila inukit ng isang mahusay na iskultor.

Matalas ang kanyang mga mata at seryoso ang ekspresyon. Sa bawat hakbang niya ay lumalabas ang isang makapangyarihan at dominante niyang presensya.

Isa siyang lalaking imposibleng hindi mapansin... at imposibleng hindi katakutan. Natulala ang bata habang pinagmamasdan ang lalaki na lumabas mula sa nasabing restaurant.