chapter 4 (Kumpirmado)

“Kukuha ako ng tubig,” sabi ni Kensi. “Doon ka muna sa kama.” Inalalayan siya nito palabas sa banyo.

“Huwag mong sasabihin kay Lola,” bilin niya rito.

“Eh, bakit ka naman nagsusuka?” Sinalubong sila ni Poppey at magkatulong ang dalawa na ihiniga siya sa kama. Sinalat nito ang noo niya. “Wala ka namang lagnat.”

Hindi nagsalita si Mace. Kahit nakahiga na siya sa kama ay umiikot pa rin ang paningin niya.

Nang makabalik si Kensi sa room niya at may dala na itong isang baso ng tubig.

“Ano ba kasi ang nangyayari sa `yo?” Binigay nito sa kanya ang tubig at ininom niya iyon.

Sinipat siya nito mula ulo hanggang paa. Pagkatapos ay tumaas ang isang kilay nito kasabay ng pagpameywang nito. “Wait a minute. Are you pregnant?”

Nabitin ang paglapag niya ng baso sa bedside table. Naalala niya. Hindi pa siya nagkaka-period. Kinabahan siya.

“P-pregnant? Ano’ng pinagsasabi mo?” Inilapag niya ang baso sa mesa at umaktong relaxed na.

Sigurado siyang may sinuot na proteksiyon iyong lalaki na nakilala niya sa Cebu. Nakita niyang kinuha nito iyon sa bag nito.

Pero... hindi naman lahat ng gumagamit ng proteksiyon ay safe na! Napag-aralan niya iyon sa eskwelahan.

Ginawa ng lalaki na iyon ang part nito, dapat ay nag-follow up siya ng pills. Pero masyado siyang naging kampante.

“Truelalo ba itey? Jontesils ka?” impit na sigaw ni Poppey. “I’m going to be a godmother?”

Napaismid si Mace pero parang nagkabuhol-buhol na ang superior vena cava, ang left at right brachiocephalic veins sa kanyang puso.

Sa sobrang focus niya sa pagsusulat ay hindi na niya namalayan na ilang buwan na pala siyang delayed.

“Buntis ka nga!” deklara ni Kensi.

“Doctor ka ba? Nagpa-check ba ako sa `yo bakit dinideklara mong buntis ako?” pagmamaldita niya kay Kensi.

Pumadyak si Kensi na nakapamaywang pa rin. “OB ang tita ko at nagtatrabaho rin ako sa ospital. Ang dami ko nang nakitang buntis. And you look like one of them.”

“You mean, you slept with Trevor?” tanong ni Poppey na ang tinutukoy ay ang kanyang ex-boyfriend.

“Of course not! At saka hindi nga ako buntis.” Pinilit ni Mace na maupo. “Baka may nakain lang ako na hindi nagustuhan ng sikmura ko.”

Tama. Baka false alarm lang. Baka na-delay lang ang menstruation niya. Nangyari na kasi iyon dati. Noong fourteen years old siya, three months din na hindi dumating ang menstruation niya.

“Liar! Magsabi ka sa amin ng totoo! Kung hindi isusumbong kita sa lola mo, sige ka!” pananakot ni Poppey.

Napasinghap si Mace. Hindi siya makapagsalita.

“Tatawagan ko si Trevor. Kailangang panagutan ka niya!” Kinuha ni Kensi ang cell phone nito.

“Hindi si Trevor ang ama!” Napataas ang boses ni Mace. Muntikan pa niyang agawin ang cell phone ni Kensi.

Natahimik ang buong silid at dalawang pares ng mga mata ang nakatutok agad sa kanya.

“So, confirmed na buntis ka nga talaga,” sabi ni Poppey na unang nahimasmasan.

She felt sick with shame and fear. “I don’t know.”

“Eh, teka nga lang. Kakasabi mo lang na hindi ang h*******k mong ex ang ama. So, may iba ka pang boyfriend? And hindi namin alam? Akala ko ba friends tayo?” nagdududa na tila nagtatampo na sabi ni Kensi.

Parang maiiyak na si Mace. “Honestly… ” Halos hindi niya alam kung paano sasabihin sa mga kaibigan ang lahat.

“Spill it. We’re waiting.” Tumunghay sa kanya ang dalawa.

“I… I had one-night stand two months ago,” nakayuko niyang pag-amin.

“What?” sabay na react ng dalawa.

“Shhh. Sa Cebu,” mahinang sabi ni Mace. “Pero nag-con...dom naman siya so baka hindi ako buntis.”

Parang gusto niya na lang magpalamon sa kutson. Nakakahiya. Bakit kasi naisipan niyang isuko na ang kanyang bataan?

“Kasalanan n’yo `to. Kung dumating sana kayo nang mas maaga, hindi sana ako nag-iisa doon,” paninisi niya sa dalawa para pagtakpan ang kasalanan na nagawa.

“Gaga ka!” Sinabunutan siya ni Poppey pero hindi naman masakit. “Ako lang dapat sa atin ang pariwara dahil ako lang ang walang matres.” Binitawan nito ang buhok niya. “So, sino ang nakabuntis sa `yo?”

“Hindi ko kilala. Parang Clark ang name.”

Muntikan na naman siyang masabunutan ni Poppey kung hindi ito sinaway ni Kensi.

“Tell us about it,” sabi ni Kensi at naupo ang mga ito sa kama niya.

Sinimulan niya ang kuwento. Tahimik namang nakikinig ang dalawa na tila chika of the year ang nangyari sa kanya.

“Pogi naman pala. No wonder, bumukaka ka kaagad,” komento ni Poppey at inirapan pa siya. “Well, need natin na ipa-check ka sa doktor para makasigurado tayo. Then hanapin natin ang ama ng dinadala mo.”

“Paano si Lola?” Halos maiyak na siya.

Noon niya na-realize na napakalaking kasalanan ang ginawa niya. Old-fashioned ang kanyang lola at kapag nalaman nito ang nangyari sa kanya ay baka atakehin na naman ito sa sakit nito sa puso. Ninety three years old na rin ito.

“Saka na natin problemahin iyon kung sure na talaga na buntis ka. Baka false alarm lang. Magbihis ka na at hihintayin ka namin sa baba. No choice ka ngayon,” sabi ni Kensi.

Wala sa sariling nagbihis si Mace.

Nasa ospital na sila nang mapansin niyang naiwan niya ang kanyang cell phone. Kahit wallet niya ay hindi niya dala.

Ang tita pa ni Kensi ang nag-check sa kanya at kumpirmado, buntis siya!

Ayaw niyang umiyak pero hindi niya makontrol ang paglabas ng kanyang mga luha.

“Tama na `yan. Naku! Baka paglabas ng anak mo maging writer `yan ng mga trahedya at walang happy ending,” exaggerated na sabi ni Poppey.