Chapter 3 (Amoy sibuyas)

2 months later...

“MACEEEE!”

Muntikan nang matalisod sa keyboard ang mga daliri ni Maricel o Mace. Kasalukuyan siyang nasa chapter nine na ng isinusulat niyang nobela nang dumagundong sa loob ng bahay ng kanyang lola ang boses ni Paul aka Poppey.

Poppey is gay. Kapitbahay ito ng kaklase niya na si Kensi sa Miriam College High School. Naging mag-bestfriend silang tatlo. They remained best of friends for so long na kahit hindi i-ultrasound ay alam na nila ang liko ng bituka ng bawat isa kahit minsan na lang sila kung magkita.

Busy si Poppey sa clothing line nito na may boutique sa Greenhills from Monday to Sunday pero everytime na nakakaluwag ito sa schedule nito ay nakikipagkita ito sa kanila.

Nag-Cebu nga sila two months ago. Pumunta sila sa Temple of Leah dahil isa iyon sa setting sa kwento niyang sinusulat. Nag-stay sila sa resort na pagmamay-ari ng kaibigan ni Poppey.

At… napangiwi si Mace nang may naalala. Sa bakasyon nila na iyon nangyari ang mga importante pero nakakahiya na mga firsts sa buhay niya. She lost her virginity—no scratch that—she gained experience. Sa isang stranger. First time niya ring nakipag-one night stand.

She swallowed hard. Akala niya ay sa nobela lang iyon nangyayari. Sa totoong buhay rin pala!

Pagsusulat sana ang purpose ng trip na iyon pero naisip niyang pagkakataon na rin iyon para makaranas siya ng séx.

Twenty-seven years siyang prim and proper at sunod-sunuran sa kanyang lola. Pero nang gabing iyon, she decided to be a bad girl.

Mukha namang matino iyong lalaki na nakilala niya kaya nagdesisyon na siyang isakatuparan na ang ilang buwan na niyang pinag-isipan.

Napapikit siya nang mariin. Pinilit niyang iwinaksi sa isip ang nangyari. But it was something she couldn't get out of her head.

May plano silang magkaibigan na lumabas ngayon pero tinatamad siya. Sinabi niya naman iyon sa mga ito pero pinuntahan pa rin siya nina Poppey at Kensi sa bahay ng kanyang lola sa Pasay.

Dont be friends with gay people, she thought. Because they'll always ask you to go out.

Hay... Tumayo si Mace mula sa pagkaka-upo sa kama at binuksan ang pinto ng kanyang silid.

“Hey, girl! G?” Ang masayang aura ni Poppey ang bumungad sa kanya.

Naka-tube ito na kulay blue, may kaunting umbok ang dibdib dahil sa foam ng strapless bra, naka-square pants ng kulay puti at white sneakers. May malaking pulang ribbon na nakalagay sa buhok nito. Maiksi ang buhok nito pero may pa-swept side bangs na mahogany brown. May mga burluloy ang dalawang kamay nito.

“Ay, ang sexy, ha? Kanino mo ba ireregalo ang sarili mo?” tanong niya rito. Mukha kasi itong regalo.

Umupo si Poppey sa upuan sa harap ng dresser niya na pang-panahon pa ng Kastila ang disenyo dahil pagmamay-ari iyon ng kanyang lola at pinag-krus ang mga paa.

“Kung sino ang willing na tatanggap sa akin,” maarte nitong tugon.

“May unboxing bang mangyayari?”

Tumawa si Poppey. “Gusto mo bang makita kung paano ako i-unbox ng jowa ko?”

“Ew! Kadirí ka!” Kunwari siyang ngumiwi at umupo sa kama.

“Hindi ba talaga magbabago ang isip mo? Nasa baba na si Kensi, kausap ang lola mo na nagpapa-check ng blóod pressure.” Pasalampak na naupo si Poppey sa sofa na naroon sa loob ng kanyang silid.

“Tinatamad ako, eh,” mahina niyang tugon. “At may deadline ako sa sinusulat ko.”

Dati naman kahit may deadline siya, nakakasama pa rin siya sa gimik nilang tatlo. Pero ngayon, pakiramdam ni Mace ay pagod na pagod siya kahit isang buwan na siyang hindi lumalabas sa bahay ng lola niya.

Graduate si Mace ng Bachelor of Science in Radiologic Technology. Pagka-graduate niya ay pumasok siya sa isang private hospital kung saan nagtatrabaho din ang tita ni Kensi na isang ob-gyn. Anim na taon din siyang nagtrabaho doon bago siya nagpasya na tumigil dahil na-stroke ang kanyang lola. Siya ang nag-alaga rito at medyo okay na naman ito ngayon. Nakakalakad na nga at itinigil na nila ang therapy nito.

Sa ngayon ay wala siyang balak na maghanap ng trabaho. Nagsusulat na lang siya ng mga nobela at ipinapasa iyon sa isang publishing company kung saan isa siyang contract writer.

First year college pa lang siya ay may published novel na siya. Hindi niya iyon inaasahan dahil ang habol lang naman niya noon ay ang critique ng editor. Na-publish ang libro niya pero hindi na iyon nasundan dahil naging busy na siya sa pag-aaral at trabaho.

Ngayon lang siya naging libre at hawak na niya ang kanyang oras.

“Bukas mo na lang tapusin `yang sinusulat mo.” Tumayo si Poppey at lumapit sa kanya. Nanuot sa ilong niya ang Issey Miyake na perfume nito.

Mabilis na tinakpan ni Mace ang kanyang ilong.

“Tse! Grabe ka, ha? Naligo naman ako sa pabango bakit ganyan ka?” Inamoy ni Poppey ang kaliwa at kanan na kilikili nito.

“Nagbago ka ba ng perfume? Bakit ganyan ang amoy mo? Amoy sibuyas na bulok.”

“What bulok?” Hinampas ni Poppey ang braso niya. “Baka amoy-maganda.”

“Doon ka nga.” Pagtataboy niya rito. Hindi niya talaga kayang singhutin ang amoy nito.

Noon naman pumasok si Kensi sa silid niya. Ipininid nito ang pinto. “Taralets?”

“Ay, girl, amuyin mo nga ako.” Lumapit si Poppey kay Kensi. “Amoy-dolyar ako, `di ba?”

“Why? Did I miss something?” tanong ni Kensi.

Umikot ang eyeballs ni Poppey. “Amoy-bulok daw ako sabi ni Mace. Naku!”

“Promise, masama talaga ang amoy mo.” Tinakpan niya ang kanyang bibig dahil parang nasusuka siya.

“Oy, okay ka lang?” Nilapitan siya ni Kensi. “Namumutla ka.”

“Ang totoo, masama ang pakiramdam ko nang maamoy ko si Poppey,” pag-amin niya.

“Baka na-usog ka!” bulalas ni Kensi. Inangat nito ang laylayan ng suot niyang T-shirt. Bumaling ito kay Poppey. “Lawayan mo ang tiyan niya. I-krus mo ang laway mo.”

“Ano? Nurse ka, nagpapaniwala ka sa mga ganoon?” Nakatikwas ang mga daliri ni Poppey na halatang hindi gusto ang ipinapagawa ni Kensi.

“Bilisan mo na kasi! Nanlalamig na si Mace!” sigaw ni Kensi.

Nataranta ang bakla. Nataranta din si Mace. Naduduwal siya. Tumakbo siya papasok sa banyo. Pagdating sa loob ay kaagad niyang inilabas ang laman ng kanyang tiyan.

“God! Okay ka lang?” tanong ni Kensi na sumunod sa kanya. Hinagod nito ang likod niya.

“Lord! Tatawag ba ako ng ambulansiya?” natataranta pa ring tanong ni Poppey.

“Okay lang ako.” Kumuha si Mace ng tissue. Napakapit siya nang mahigpit sa lababo. Parang nahihilo siya.