Chapter 6: Spy Camera

"HINIHINGI NIYANG pakasalan mo siya?!" halos sabay na sigaw ni Mira at Hannah sa loob ng café.

Muntik pang mabitiwan ni Mira ang tasa ng kape, habang si Hannah ay nanlaki ang mga mata na para bang may nasaksihan na malaking iskandalo.

Halos lahat ng tao sa loob ay napalingon sa kanila.

"Pakihinaan n'yo nga ang boses ninyo," mabilis na awat ni Selestina, sabay pilit na ngumiti sa mga taong nakatingin at nagbubulungan.

"Unang-una, sinundan ka niya kung saan-saan," mariing banggit ni Hannah habang itinuturo ang isa-isa, "tapos kung anu-anong kalokohan ang ginawa sa 'yo sa gabi, pinatawag ka sa bahay niya, may ginawa na naman… tapos ngayon, inalok ka pang magpakasal?!" Halatang hindi ito makapaniwala.

"My dream guy," biglang sambit ni Mira na nakatitig sa kawalan, para bang iniimagine na ito ang bida sa isang romantic movie. Pero hindi pa nakakalayo sa daydream si Mira nang dapuan ito ng mabilis na palo sa ulo mula kay Hannah.

"Ano ba?! Wala namang masama sa babaeng gusto ang isang lalaki!" reklamo ni Mira habang hinihimas ang ulo nito.

"Mayro'n, kung obsessed psycho ang tinutukoy mo," sagot ni Hannah na may diin. At gaya ng nakasanayan, nagsimula na naman silang magbangayan.

Samantala, tulala si Selestina, nakalubog sa sariling mundo habang unti-unting bumabalik sa isip niya ang mga salitang binitiwan ni Rogue.

"Siguro tatanggapin ko ang alok," mahina ngunit malinaw niyang sabi, dahilan para biglang tumigil sa pagtatalo ang dalawa.

"Ano?!" sabay nilang tanong, parehong malaki ang mga mata na nakatingin sa kanya.

"Hindi ito para sa akin," mariing sambit ni Selestina. "College na si Calliz, marami ng bayarin. Para rin hindi na mahihirapan si Mama sa pagbabayad ng utang. Malapit na rin kaming mapalayas kapag hindi pa namin nababayaran ang renta. Ginagawa ko ‘to para sa pamilya."

Nagkatinginan si Hannah at Mira, at kahit may bahid ng pag-aalala ang kanilang mga mukha, unti-unti rin itong napalitan ng pag-unawa.

"Anumang desisyon mo, susuportahan ka namin," sabi ni Hannah na puno ng sinseridad.

Sumang-ayon si Mira at tumango.

"Salamat… kayong dalawa ang the best," ngiti ni Selestina bago siya tumayo mula sa mesa.

"Uuwi ka na?" tanong ni Mira.

Tumango siya, bahagyang dumidila sa tuyo niyang labi. "Oo, pagod na rin."

Kumaway siya sa dalawa bago tuluyang lumabas ng café.

Pagkalipas ng ilang minutong paglalakad, nakarating siya sa bahay, at napahinto sa gulat. Wala na ang mga reporter na kanina lang ay nagkukumpulan sa labas.

Tinupad niya nga ang sinabi niya, tahimik niyang naisip, isang mahabang buntong-hininga ang lumabas bago siya pumasok.

"Ma, nandito na ako," anunsyo niya.

Lumabas mula sa kusina si Helena, may hawak pang sandok na nakalimutan nitong bitawan.

"Ang aga mo yata? Hindi ka ba pumunta sa Café?"

"Dumaan lang ako saglit," sagot niya.

Napatango ang si Helene.

"Uh... Ma, pwede ba tayong mag-usap?" seryosong tanong ni Selestina.

Napansin ni Helena ang bigat sa tinig ng anak, kaya tumango ito, bumalik muna sa kusina para ibaba ang sandok, at pagkatapos ay umupo sa sofa sa sala.

"May problema ba, anak?" tanong nito kay Selestina.

"Inalok niya ako ng kasal, Ma."

"Ano?!" Kaagad na napatayo ang ina.

"Gusto niyang magpakasal kami—"

"Hindi, Selestina." Matalim ang tingin nito sa kanya. "Hindi kita pababayaan na pumasok sa kasal na alam kong hindi para sa 'yo. Alam ko ang ugali ng lalaking ‘yon, may nabasa ako, at mapanganib ang mundo niya. Hindi kita pinalaki para lang ipahulog sa kamay ng lalaking 'yon."

"Pero Ma, hindi mo alam ang buong kwento—"

"Alam ko ang sapat para tumanggi," putol nito, sabay lapit sa kanya. "Alam ko kung paano siya makitungo sa tao. Alam ko ang reputasyon niya. At higit sa lahat, alam ko kung gaano kabilis niyang pwedeng durugin ang buhay mo kapag nagsawa na siya."

Namilog ang mga mata ni Selestina, pilit na pinipigilan ang panginginig ng labi.

"Ma, hindi mo naiintindihan. Hindi ito basta kasal lang. May mga bagay—"

"Mga bagay na hindi sapat para ipagsapalaran ang puso mo at kaligtasan mo!" madiin na sabi ni Helena.

Huminga nang malalim si Helena, bago nagsalita nang mas mabagal.

"Selestina, anak kita. At kung may isang bagay akong natutunan sa buhay, ‘yon ay huwag mag-asawa dahil lang sa pangangailangan, kasunduan, o awa. Kailangan mo ng kasal na may pagmamahal at respeto, hindi transaksyon."

Bumigat ang dibdib ni Selestina. Hindi niya masabi sa ina ang tunay na dahilan kung bakit halos napapayag na siya, dahil may parte sa kanya na natatakot, pero may parte ring umaasang baka si Rogue ang sagot sa mga problemang matagal na niyang pinapasan.

"Mama, makakabuti ito para sa atin," mahinahong tugon ni Selestina kahit mabigat ang dibdib. "Limang taon na at ni kalahati ng utang, hindi pa natin nababayaran. Si Calliz, kolehiyo na at walang pag-asang makatapos. Panandalian lang ito, Ma… pwede naman kaming maghiwalay balang araw."

Huminga nang malalim si Helena, bahagyang bumaba ang tono, bago muling umupo.

"Ito ba talaga ang gusto mo?" tanong nito, mas kalmado na ngayon.

"Ang gusto ko ay ang makakabuti para sa pamilya," sagot ni Selestina, halos pabulong ngunit matatag.

Napabuntong-hininga si Helena, parang tinatanggap ang hindi nito mapipigilan.

"Sige," mariin nitong sabi. "Pero gusto kong makita ng personal ang lalaking 'yan," sabi nito bago m tumayo at bumalik sa kusina para ipagpatuloy ang pagluluto.

Napabuga ng hangin si Selestina.

"Para sa pamilya…" bulong niya.

Tumayo siya at nagtungo sa silid, nagsimula nang maghubad ng suot ang dalaga nang maalala niya ang isang bagay, may nilagay si Rogue na camera dito noon.

Agad siyang naghanap. Kinuha niya ang maliit na bangkito at itinapat sa gitna ng kwarto, saka siya umakyat at tinitigan ang kisame. Napasingkit siya nang mapansin ang maliit na kumikislap na bagay doon.

Napasinghap siya nang mapagtanto kung ano iyon, isa sa mga maliliit na spy camera na nakikita lang niya sa mga pelikula.

Itinaas niya ang kamay at binigyan ito ng malinaw na 'fvck you sign', saka walang pag-aalinlangang kinuha at binagsak sa sahig. Pagkababa niya mula sa bangkito, mariin niya itong tinapakan hanggang sa marinig ang tunog ng pagkabasag.