Chapter 9

Agad na ipinara ni Seb sa gilid ng kalsada ang kaniyang pulang Ferrari. Nakababa ang bubong niyon kaya tumatama ang malamig na hangin sa kaniyang mukha. Ipinatong niya sa kaniyang ulo ang sun glasses para maipit ang mahaba niyang buhok na tumatabing sa kaniyang mukha. Huminga nang malalim si Seb at ngumiti.

“Here I come, Mercedes,” ani niya. Tinitigan niya nang mariin ang karatula ng lungsod na kaniyang pupuntahan. Ang lugar kung saan siya lumaki at nagkausap. Ang lugar kung saan din nangyari ang pinaka masakit na pangyayari ng kaniyang buhay.

Walang sino man ang nakakaalam na paparating si Seb sa lungsod. Sigurado siya na makikilala siya ng mga kababayan. Na malaking benipisyo sa kaniya para sa kaniyang plano. Habang nagmamaneho si Seb ay natanaw niya ang isang sasakyan na nakaparada sa gilid ng kalsada. Lalagpasan niya lang sana ito ngunit bigla siyang napapreno noong mapagtanto kung sino ang nakatayong dalaga sa tabi niyon. Agad na ibinalik ni Seb ang kotse at pumara sa tapat nito.