Chapter 5

Nakayuko habang naglalakad si Maliah. Magpahanggang ngayon ay hiyang-hiya pa rin siya sa nangyari. Hindi halos dalawin ng tulog sa nagdaang gabi, ayaw patahimikin ang isipan niya. Nagdalawang-isip din siya kung papasok ba ngayong araw. Pero kung hindi, tiyak na masesermunan siya ni Ma'am Patty.

"Hayst! Bakit ba hindi ko man lang tiningnan ang pinasukan kong restroom?" Napahinto siya sa paglalakad. Ang mukha ay parang iiyak na sa labis na pagkayamot. "What if tanggalin ako ng bagong CEO? Mukha pa naman siyang masungit. Huwag naman sana. Ang hirap pa namang maghanap ng trabaho ngayon. Bakit? Hindi ba puwedeng magkamali? Pero, hindi rin pala ako nag-lock ng pinto. Hayst! Kainis!" Nagpapadyak siya, animo'y batang musmos na iiwan ng ina.

Tiningala niya ang asul na kalangitan. Umaga pa lang ay mainit na ang panahon. Iwinaglit niya ang anumang nasa isipan at ipinagpatuloy ang paglalakad.

Bago sumapit ang opisina ng administrator ay may naraanan siyang mga kababaihan. Titig na titig ang mga ito sa kaniya, titig na may halong pangungutya. Bigla siyang kinutuban.

"May mali ba sa akin?" tanong ng isipan niya. Pasimple pang sinuri ang sarili.

Hindi pa man siya tuluyang makapasok ng office ay nakasalubong niya si Pamela, tulad kahapon ay may kasama na naman ito.

"Bodyguard ba nito ang babaing palaging kasama?" Hindi niya naiwasang tanungin ang sarili. Dati isa lang ang kasama nito, ngayon ay tatlo na. Mukhang masisira nga ang araw niya ngayon.

Hinarangan ang daraanan niya ng alipores ni Pamela. "Oy, nandito na pala ang best friend ko!"

Umikot ang itim ng kaniyang mata. Malamang na nandito siya dahil dito ang trabaho niya. "Kauumpisa pa lang ng araw ko, ikaw agad ang sumalubong sa akin. Ano na naman ba ang problema mo, Pamela?"

Ngumisi ito't humakbang palapit sa kaniya. Sinuri siya, from head to toe. "Wala naman. Gusto lang kitang batiin ng magandang umaga."

"Anong maganda sa umaga kung ikaw ang makikita ko?"

"Oh, highblood ka agad. Kaya ka ipinagpalit ni Jacob e. Palagi kang bad mood."

Sa pagkakataong 'yon ay siya naman ang ngumisi. Pumantay siya at taas-noong tumitig dito. "Kahit hindi yata ako palaging bad mood tulad ng sinasabi mo, wala pa rin akong panama sa isang tulad mong ahas." Hinawakan niya ang kuwelyo ng suot nito at kunwaring inayos. "Ahas na, linta pa! But wait, ano na naman pala ang ipinagpuputok ng butsi mo? Hindi ba't naagaw mo na sa akin si Jacob? Gumigiling ka pa nga sa ibabaw niya , hindi ba?" Hindi na niya nakontrol ang sarili. "Bakit ngayo'y parang ang bitter mo naman masyado?" Muli siyang ngumisi, saka'y nilampasan ito. Hindi pinansin ang titig at bulungan ng iba pang employee na naraanan niya.

"Good morning," bati niya nang marating ang mesa.

"Maliah..."

Nahinto siya sa akmang pag-upo. "Yes?"

Lumapit sa kaniya si Donna, isa sa kasamahan niya at tinaguriang dakilang tsismosa. "Nabasa mo na ba ang news?"

Nagsalpukan ang kilay niya. "Anong news?"

"May kumakalat na balita sa group chat," sabi nitong muli, parang binibitin pa siya.

"Ano nga kasi 'yon?"

"May nagpapakalat na hindi mo raw matanggap na hiniwalayan ka ni Sir Jacob. Palagi mo raw ginugulo si sir at ang bago niya."

Napangiwi siya sa narinig. "Phew! Kailan pa ako naghabol sa sira-ulong 'yon? Dapat pala'y kinuhaan ko sila ng video para may ebidensiya ako sa kanilang kahalayang ginawa," angil niya sa sarili.

"Marami na ang nakabasa, galit na galit nga si Ma'am Patty. Kung anu-ano ang pinagsasabi sa iyo. Wala ka raw delikadesang babae."

Natampal niya ang sariling noo. Hinusgahan agad siya, hindi man lang tinanong ang side niya, sabagay, dati pa namang mainit ang ulo nito sa kaniya, at kahit anong gawin niyang mabuti, para rito ay mali. Ngayon ay nakahanap na ito ng mas ikagagalit sa kaniya, tiyak na katakot-takot na sermon ang aabutin niya. Naagaw ang pansin nila nang humahangos na pumasok si Yna. Sa table agad niya ito dumiretso.

"Nabasa mo na ba?"

"Hindi pa pero sinabi na ni Donna sa akin. Ang kapal ng pagmumukha nila. Kaya siguro iba ang tingin ng ibang kasamahan natin sa trabaho dahil sa maling balitang kumalat."

Hindi pa man nangangalahati ang araw at hindi pa nagsisimula ang trabaho ay sira na ang araw niya. Gusto niyang matahimik pero sadyang kaakibat yata niya ang magulong mundo dahil kay Pamela ay Jacob. Muling nagsalpukan ang kilay niya sa naiisip.

"Sino ang nagpapakalat ng news na iyan?"

Nagkatinginan si Yna at Donna. Magsasalita na sana ang huli nang may nagsalita sa may pinto.

"Nauna na palang dumating ang babaing walang delikadesa!"

"Ikaw nama'y palabentang--"

Maagap niyang siniko si Yna para pigilan sa pagsasalita, mabuti't mahina ang pagkakabigkas nito, hindi 'yon narinig ng ginang.

"Good morning, Ma'am Patty!" bati nilang lahat sa ginang.

"Anong maganda sa umaga?" singhal nito sa kanila. Lumalaki pa ang mata nitong nakatutok sa kaniya. "Ano 'yong nabasa ko sa group chat?"

"Ma'am, wala pong katotohanan ang nabasa mo sa--"

"Ikaw ba ang tinatanong ko?" asik nito kay Yna.

Hinawakan niya ang kamay ng katabi, at nagkatitigan silang dalawa. Pino siyang ngumit, nagpapahiwatig na okay lang siya at siya na ang magpapaliwanag sa ginang.

"Hindi ka na nahiya kay Sir Jacob, ang kapal talaga ng mukha mo!" bulyaw nito.

Hindi na niya nakontrol ang sarili. Pakiramdam niya'y umakyat sa ulo ang dugo niya. "Huwag po kayong one sided, Ma'am."

"Aba't--"

"Let me explain, Ma'am Patty." Hindi niya hinayaang muli siya nitong sermunan at ipahiya sa harap ng kaniyang mga katrabaho. Hindi siya papayag na alipustain ng sinuman. "Totoong hiwalay na kami ni Sir Jacob." Nakarinig siya ng bulungan, pero hindi niya pinansin, nagpatuloy siya sa pagsasalita. "Nahuli ko po siyang may kaulayaw na babae sa condo niya kaya ko siya hiniwalayan, hindi siya ang nakipag-break at may palagay ako na ang itinuring kong matalik na kaibigan ang nagpakalat ng maling balita, dahil siya lang naman ang babae ng dati kong kasintahan. And never akong nanikluhod para lang makipagbalikan sa kaniya. Now, na-explain ko na po sa inyong lahat, maari na po ba tayong magtrabaho at huwag nang pag-usapan pa ang personal kong buhay. Nag-mo-move on na po ako sa sakit na idinulot nilang dalawa. Okay na po ba?"