Chapter 7

"I think, she's inggit sa 'yo."

Sinulyapan ni Maliah ang nagsalitang si Missy. Slang kung magsalita at may kaya sa buhay, kaya may kaartehang taglay. Bago lang ito sa company. Maganda, mas mataas sa kaniya at slim ang katawan. Madalas niya itong titigan dahil na-a-amaze siya sa katawan nito.

"Oo nga, Maliah," sang-ayon ni Donna, may hawak na namang chichirya. "Feel ko rin 'yon."

"Pero, bakit?"

"We don't know e. But I feel it, Maliah. Ganyan din kasi ang nangyari sa friend ko."

"Pero best friend ko siya." Hindi niya matanggap na nang dahil sa inggit ay nagawa siyang traydorin.

"Mas marami nga ang ahas sa magkakaibigan, Maliah," kumento ni Yna.

Naghihimutok pa rin ang kaniyang kalooban, ayaw tanggapin ng sistema niya. Since pagkabata ay magkaibigan na sila ni Pamela, ito ang tagapaligtas nito sa nambu-bully sa kaniya nang sila ay nasa elementary pa lamang. Lampa siya noon, mahina, kaya malimit ay inaalipusta ng mga kaklase. Hindi niya matanggap na ang dating tagapagligtas, ngayon ay kaaway na niya. Hindi lang basta kaaway, kinatalo pa siya. Inagawan ng pag-ibig at ngayon ay sinisira sa mata ng marami.

"You know what, mabuti na rin na nangyari sa iyo 'yan, kasi dati, hindi ka namin malapitan. Ilag kami sa iyo, feeling namin ay ang taas-taas mo dahil boyfriend mo si Sir Jacob."

"Agree ako sa iyo, Donna." Nag-thumbs si Missy sa dalaga.

"Yeah! You're right, Missy," segunda rin ni Yna. "Huwag kang manghihinayang sa taong tulad ni Pamela at Jacob, hindi sila nararapat na mahalin mo dahil mga ahas sila. Tandaan mo ring kapag may umalis, may darating at isa na kami roon. Kami ang mga bago mong kaibigan," puno ng siglang pahayag nito, idinipa pa ang braso.

Nangingiting umiling siya. Ramdam din niya 'yon dati. Walang gasinong lumalapit sa kaniya ay dahil boyfriend niya si Jacob, kaya nga siguro galit na galit sa kaniya si Ma'am Patty.

"Oh, start na ng work." Napasulyap siya sa relong nakasabit sa wall. "Let's go na sa office," yaya niya sa mga ito.

Sabay silang nagtungo sa office, kalakip ang malaking ngiti. Napag-isip-isip niyang tama ang kaniyang mga kasama. Kapag may umalis ay may darating at para kay Pamela, siguro nga'y nahalina lang ito sa nakitang pagmamahal na inalay ni Jacob sa kaniya. Pero kailan man ay hinding-hindi na mabubura ang kanilang pinagsamahan. Iingatan niya ang maganda nilang nakaraan. At para sa nakita sa condo at sa kaalamang inagaw nito ang ex-boyfriend niya, ipapagsa-Diyos na lang niya ang lahat. At kung tunay na nagmamahalan silang dalawa, she will be happy for them.

Pagkapasok sa office ay naging busy na sila, ang lahat ay nakatutok sa computer. Malapit nang sumapit ang ika-lima ng hapon, pinatawag si Ma'am Patty sa head's office. Mahigit isang oras itong wala. Ang katabi niyang si Yna ay maya't maya ang tanong.

"Marites ka na rin ngayon," biro niya rito.

"Curious lang ako 'no! Paano kung mamaya pa bumalik si Ma'am? Meaning, mamaya pa rin tayo uuwi?"

Napaisip din siya. May patakaran ang administrative manager nila na kapag hindi pa ito lumalabas— ganoon din sila. Sabay silang napabuga ng hangin ni Yna.

"Nag-promise pa naman ako sa 'king bulinggit na maaga akong uuwi." Sumimangot ito.

"Ngayon pa lang ay mag-chat ka na sa nanay mo, ipaalam mo na mali-late ka ng uwi."

"Ano pa nga ba ang gagawin ko?" Inapuhap nito ang phone at nagsimulang magtipa. "Ibibili ko na lang siguro ng suhol ang bulinggit ko."

Natawa siya na ang mata ay nakatutok sa computer. "Bilihan mo na lang ng doughnut."

"Pinagbabawalan ng doktor na kumain iyon ng masyadong matamis."

"Bakit?" Napasulyap siya sa katabi. Ibinaba na nito ang phone sa mesa. Kita niya ang picture ng anak nito. And he's so cute.

"Nagiging hyper kasi."

"Ah," naitugon na lamang niya at muling itinutok ang paningin sa computer.

Ilang sandali pa ay naging busy na muling sila. Sumapit ang ika-anim, pero wala pa rin si Ma'am Patty. Natapos na niyang isa-isahin ang document na ipinasa sa kaniya. Pito silang nasa record keeping, kasama na ang intern na si Missy. They're organizing and maintaining documents, files, and databases of the company.

"Hay, salamat, natapos na rin!" Inunat niya ang dalawang braso. "Sakit sa likod."

"Me, too," segunda ni Missy, bahagyang hinilot pa nito ang likod. "I need masahe."

"Guys, gusto niyo bang mag-happy-happy. Tara, gimik naman tayo!" biglang singit ni Carmen, kasama nila sa office administration.

"Bet ko 'yan." Tumili si Donna. Nag-aayos na rin ito ng mga gamit, mukhang tapos na rin sa gawain.

"Now ba?"

"Sa Friday," sagot agad ni Carmen. "Ano? Game ba kayo?"

"Go ako." Nag-thumbs up si Donna. "Gimik na gimik na ako."

"Ikaw, Maliah?"

"Pag-iisipan ko pa."

"Alam niyo na siguro ang sagot ko," matamlay na tugon ni Yna.

"Hindi ka puwede, dahil may bulinggit ka!" Halos nagkasabay pa sila sa pagsagot. Mayamaya pa ay sabay na nagkatawanan. Tumikom lang ang kanilang bibig nang pumasok si Ma'am Patty.

"Tapos na ba kayo?"

"Yes, Ma'am!" panabay nilang tugon.

"Good. Pero bago kayo umuwi, may importante muna akong sasabihin. About ito sa new policy ng bagong CEO."

Nagsimulang dumagundong ang dibdib ni Maliah. "Hindi kaya 'yon ang naganap n'ong nakaraang gabi?" kausap niya sa sarili.

"Hindi naman siguro," sagot ng kabilang sulok ng isipan niya.

Hindi na halos siya humihinga habang naghihintay sa sasabihin ng ginang. Baka ipinagkalat ng bagong CEO ang panty niya.

"Nakakahiya!" Pikit-matang tinampal niya ang sariling noo. "Bakit ba kasi hindi ko muna tiningnan ang pinasukan ko?"