Banggaan ng Tadhana

Naiwan mag-isa si Katarina sa loob ng silid. Tahimik niyang pinagmasdan ang paligid habang paulit-ulit na tumatakbo sa isip niya ang sinabi ni Selene Kingswell. Pakiramdam niya ay may mali. Hindi niya alam kung bakit pero parang may tinatago ang ginang. Hindi niya rin maintindihan kung bakit alam nito ang mga bagay tungkol sa kanya na kahit ang ibang tao ay hindi alam. kung ito na mismo ang nagsabi na hindi nila inaalam o pinapakialaman ang pribadong impormasyon ng mga tao.

“Dalawa lang ang posibleng dahilan,” bulong niya habang nakatingin sa sahig. “Nagsisinungaling siya o may kailangan siya sa akin.”

Napabuntong-hininga siya.

Hindi niya alam kung matatakot ba siya o matutuwa dahil sa alok ni Selene. Mula pagkabata, pangarap na niya ang makaalis sa mababang estado ng buhay nila. Ngunit hindi siya tanga para basta magtiwala sa mga Kingswell. Lalong hindi sa isang pamilyang kilala sa kapangyarihan at karahasan.

Tumayo siya mula sa couch at marahang lumabas ng silid. Habang naglalakad siya sa sa hallway ay malalim pa rin ang iniisip niya. “Pero wala naman silang makukuha sa akin—Aray!”

Napaigtad siya nang may biglang makabangga sa kanya. Napahawak agad siya sa braso dahil may matalim na hapding dumaan doon.

“I’m sorry, miss.”

Napataas siya ng tingin at halos mapatigil siya sa nakita.

Matangkad ang lalaki at matipuno ang katawan. Itim na itim ang buhok nito na maayos tingnan kahit may ilang hiblang nakalaylay sa noo. Ang kulay pulot nitong mga mata ay tila matalim kung tumitig. Matangos ang ilong. Matalim ang jawline. Nakasuot ito ng mamahaling black suit habang may Rolex na relo sa kaliwang pulsuhan. Kahit simpleng pagtayo lang nito ay halatang may mataas na estado sa buhay.

Ito yung tipo ng lalaking kayang magpahinto ng tibok ng puso ng kahit sinong babae. Ngunit higit sa lahat, ang pinaka napansin ni Katarina ay ang aura nitong malamig at matalim na mga tingin. Katulad ng kay Selene.

“Hindi kaya...”

“You’re bleeding.”

Hindi na siya nakapagsalita nang hawakan agad ng lalaki ang braso niya. Napatingin siya roon at nakitang may sugat nga. Mukhang natamaan ng matulis na singsing nito ang balat niya.

Bigla nitong pinilas ang laylayan ng bestida niya dahilan para mapasinghap siya. “Hoy! Bastos!”

“Kalma,” simpleng sagot nito. “Itatali ko lang.”

“Kailangan talaga yung damit ko pa?”

“Alangan naman yung damit ko.”

Napairap si Katarina. “Eh kung tumitingin ka kasi sa dinadaanan mo, hindi sana ako nasugatan niyang singsing mo. May singsing bang ganyan? Parang gusto mo lagi pumatay,” aniya nang mapansin ang singsing na may matalas na pigurang disenyo.

Hindi man lang natinag ang lalaki. “You got it right.” Diretso itong tumingin sa kanya. “Para doon nga ito.”

Napangiwi siya. Hindi niya inaasahang sasagutin nito nang seryoso ang biro niya. “Baliw ka ba?”

“What?” Nanlaki ang mata nito. “Did you just call me baliw?”

“Wait... bingi ka rin?” taas-kilay niyang sabi. “Ang lala mo naman.”

“Aba’t—”

“Lucien, andiyan ka na pala?”

Pareho silang napalingon nang marinig ang boses ni Selene.

Palapit ito sa kanilang dalawa habang may halong pagtataka ang mukha. Bahagya ring tumaas ang kilay nito nang makita ang hawak ni Lucien sa braso ni Katarina.

“Anong nangyayari rito?”

“Mommy, may konting misunderstanding lang po.”

“Mommy?!” halos mapasigaw si Katarina.

“Yes, mommy ko,” sagot ng lalaki. “Bakit?”

Biglang nanlaki ang mata ni Katarina. Hindi siya maaaring magkamali. Posibleng siya nga ang nag-iisang Lucien Kingswell. Ang pinaka kinatatakutang miyembro ng Prime Dominion brothers.

Napangiti naman si Selene habang pinagmamasdan sila.

“Well, I guess hindi pa kayo officially nagpapakilala sa isa’t isa.”

“Kailangan po ba kilala ko ang antipatiko na ito?” agad na sabi ni Katarina habang nakaturo kay Lucien.

“Antipatiko?” ulit ni Lucien. “Babae, wala pang nakakatawag sa akin niyan sa buong buhay ko.”

“Then you’re welcome.” Pilyo siyang ngumiti. “First time mo maka-experience.”

Tahimik na pinagmamasdan lamang sila ni Selene. Halatang natutuwa ito sa bangayan nilang dalawa.

Samantalang si Lucien ay tila hindi makapaniwala na may taong kayang sumagot-sagot sa kanya nang ganoon lang kadali. “You know what?” Lumapit ito nang bahagya. “Konti na lang papatayin na kita.”

Biglang napataas ang kilay ni Selene. Kilalang maikli ang pasensiya ng panganay niyang anak kaya agad siyang naging alerto. “Itigil niyo na—”

“Edi uunahan na kita.” Tinaasan siya ng kilay ni Katarina. “Ang sabi nila, ang puro salita lang, duwag.”

Natahimik si Lucien.

“Mafia king ka pa naman pero kaunting asar lang, pikon ka agad. Para kang bata.”

Maging si Selene ay bahagyang natigilan. Hindi dahil bastos si Katarina kundi dahil sa tapang nito. Kahit alam nitong si Lucien Kingswell ang kaharap niya, wala man lang bakas ng takot sa mukha nito.

“Oo na,” dagdag pa ni Katarina. “Mababang antas lang ako ng tagapaglingkod dito pero hindi ako pinalaki ng mga magulang ko na magpatalo na lang lagi. It’s either gaganti ako o uunahan kita.”

Napabuga ng hangin si Lucien habang pilit kinakalma ang sarili.

Sa buong buhay niya, ngayon lang may babaeng nagsalita sa kanya nang ganoon. At ang mas nakakainis? Hindi niya alam kung bakit hindi niya magawang magalit nang tuluyan.

“Tse. Diyan ka na nga.” Tinalikuran siya ni Katarina at naglakad palayo habang taas-noong umaalis.

Habang naiwan namang nakatayo sina Selene at Lucien.

“Narinig niyo ‘yon, mommy?” hindi makapaniwalang sabi ni Lucien. “Grabe!”

Ngunit imbis na kampihan siya ay hinampas siya ni Selene sa balikat.

“Aray!” reklamo niya. “Bakit ako?”

“Ikaw na bata ka.” Pinandilatan siya nito. “Kailan ka pa natutong pumatol sa babae? At ano yung ‘papatayin’? Nahihibang ka na ba?”

“Mommy naman.” Napailing siya. “Hindi ko naman siya sasaktan. Siya lang talaga nauna.”

Tumingin siya sa direksyong nilakaran ni Katarina bago muling nagsalita. “At nakita niyo naman mukha niya? Parang dragon na nagbubuga ng apoy. Hindi mo malaman kung galit o may regla. Tsk. Mga babae nga naman.”

“Lucien Kingswell.”

“Ano po?”

Hinampas na naman siya ni Selene dahilan para mapangiwi siya.

“Baka nakakalimutan mong babae rin ang nagluwal sayo.”

“Eh hindi naman po kayo yung—”

“Hay naku.”

Tumalikod si Selene at naglakad palayo.

“Mommy! Mommy!” habol niya pero hindi siya nito nilingon. Napabuntong-hininga siya bago ibinulsa ang mga kamay. “Mga babae nga naman.”