Chapter 5

Kinabukasan ay sinimulan na ni Cherry Lou ang paghahanap ng trabaho. Isinabay siya ni aling Joyce sa pag alis hanggang sa makarating sila sa pinapasukan nitong kumpanya bilang janitress.

Dahil hindi siya allowed na makapasok sa building ay pinaglakad lakad na muna siya ng ginang sa labas at sinabing magkita na lang uli sila mamayang uwian para sabay na rin silang makabalik ng bahay.

Kinuha niya ang pagkakataon na iyon upang masimulan ang paghahanap ng trabaho. Tinandaan na lamang niya ang bawat kalsada na madaanan niya upang hindi siya maligaw sa pagbalik niya mamaya kay aling Joyce.

Lumipas ang oras na maghapon siyang naghanap pero wala siyang napala sa buong araw at dahil hapon na nga at ang alam niya ay ala singko ang labas ni aling Joyce ay bumalik na siya sa labas ng building kung saan siya iniwan kanina ng ginang.

Habang naglalakad na pabalik si Cherry ay hindi niya maiwasan ang mag isip unang araw pa lang ng paghahanap niya ng trabaho ay parang nahihirapan na siya.

Tinitipid niya ang pinabaong pera sa kanya ng kanyang inay. Kailangan niyang may pagkakitaan agad. Naisip niyang nakakahiya kina aling Joyce at Tinay kung titira siya sa bahay ng mga ito ng hindi man lang makapag abot sa magtiyahin.

Binuksan niya ang kanyang bag at kinuha ang kanyang pitaka, sinilip niya kung magkano na lang ang laman non ng dagli ay nabitiwan niya dahil sa pagkagulat.

Malakas na busina mula sa kanyang likuran ang nakapagpagulat sa kanya. Pagkaharap niya ay walang anu-ano ay pagalit niyang hinampas ang hood ng mamahaling sasakyan na nakatigil sa kanyang harapan.

"Hoy ikaw na reckless na driver ka. Akala mo sayo itong kalsada kung makabusina ka ay wagas ah! Papatayin mo ba ko sa gulat ha!?" singhal niya sa driver ng kotse habang pinupulot ang nahulog niyang pitaka.

Sa loob naman ng kotse ay abala si Anthony sa pagbabasa ng chats ng mga kaibigan niya. Nang bigla na lang malakas na nag preno ang kanyang driver na si Fred at nagbusina ng matagal.

"What the f*ck! Ano nangyare Fred?" tanong niya sa driver niya ng mapatingin siya sa harapan ng kotse na may babaeng nagdadadakdak sa labas ng kanyang sasakyan.

Napakamot naman sa batok si Fred ng lingunin siya nito. "Boss, muntikan ko na kaseng masagasaan yung babae ng bigla siyang tumawid. Buti na lang ay malakas ang preno ng kotse at hindi siya nahagip. Sorry boss!" hinging paumanhin ng driver niya sa kanya.

Napabuntong hininga si Anthony sa sinabi ng driver at muling sinulyapan ang babae sa labas na kinatok na ang salamin ng sasakyan.

Napatitig siya sa mukha ng babae at para siyang nabato balani. Bigla na lang ay nag slow motion sa paningin niya ang babae habang pabulyaw na kinakausap nito ang driver niya na si Fred at galit na umalis.

"Boss, okay na. Nakaalis na yung babae. Grabe ang tapang ng babaeng yon, ang ganda pa man din sana kaso mukhang amazona." natatawa pang sambit ng driver ni Anthony Buenavidez.

Nabaling ang tingin ni Anthony kay Fred at nang ibinalik niya ang tingin sa babae ay bigla na lamang itong nawala. Nakuha pa niyang lumabas ng sasakyan at nagbakasakaling matanaw pa niya ang babae ngunit nawala na lang itong parang bula.

Bagsak ang balikat na pumasok siya sa backseat ng kotse at nagmuwestra kay Fred na magpatuloy na sa pagmamaneho.

Nakabalik naman na si Cherry sa labas ng building na pinagtatrabahuhan ni aling Joyce at dahil malapit na mag alas singko ay hindi naman nagtagal ang paghihintay niya.

"Kumusta ang araw mo Cherry?" tanong ng ginang ng malapitan siya.

"Hindi po maganda eh! Muntik pa po akong mabundol ng sasakyan kanina." nanlalambot niyang sagot.

"Naku mabuti at hindi ka nasaktan! Sa susunod magdodoble ingat ka na Cherry ha. Halika na at dadaan pa tayo sa palengke." pag aaya na ng ginang sa kanya.

Araw pala ng sweldo ni aling Joyce kaya namili sila ng ilang grocery para sa bahay at bigas at ulam na rin nila. Ibinili rin siya nito ng plastic cabinet na lagayan niya ng mga gamit niya.

Siya naman ay bumili ng pang hygene niya tulad ng napkin, shampoo, toothpaste at toothbrush na rin pati sabon niya sa katawan. Kumuha na rin siya ng deodorant at face powder. Kailangan niya yun upang kahit na paano ay presentable naman siyang tignan sa mga ina-apply-an niyang trabaho.

Nang nasa counter na sila ay si aling Joyce ang nagbayad ng lahat ng pinamili niya.

"Ako na ang magbabayad. Kapag may trabaho ka na at nakasweldo at kapag nakaluwag ka na ay saka mo na lamang bayaran sa akin." nakangiting wika pa sa kanya ng ginang.

"Salamat po, Tiyang." naluluha niyang sabi.

"Sus na bata ka! Wag kang umiyak. Alam kong hindi malaking halaga ang pinabaon sayo ng iyong inay at tinitipid mo yon, kaya nauunawaan kita. Tiis ka pa muna at kapag nag disi otso ka na ay ipapasok kita sa agency namin. Maraming tulad mo na working student sa agency. Trabaho sa araw, aral sa gabi ang ginagawa nila. Gayahin mo yun ha. Makakapagtapos ka na ng pag aaral makakatulong ka pa sa pamilya mo. Sipagan mo lang talaga." litanya pa ni aling Joyce sa kanya.

Tumango si Cherry at malawak na ngumiti sa ginang. "Opo Tiyang, susundin ko po ang payo n'yo."

Pagkauwi nila ay agad nilang inayos ang mga pinamili. Nagluto si aling Joyce habang siya ay inaassemble ang lagayan niya ng mga damit.

Nang gabi ding iyon ay kinausap siya ni Tinay. Tinatanong siya kung nakapag isip na ba siya sa alok nitong mamasukan siya bilang waitres sa club na pinapasukan nito.

Waitress sa gabi si Tinay sa tanghali naman ay nasa parlor ito nagmamanikurista na dagdag kita rin daw kaysa maghihiga maghapon at tumambay at makipagtsismisan sa kapitbahay wala naman daw income.

Yun ang sabi sa kanya ni Tinay. Nagbibigay din kase ito ng pera sa ama na pinang iinom lang naman daw at ibinibigay sa madrasta niya ang sabi ni aling Joyce.

Kapatid ni aling Joyce ang ama ni Tinay. Kinuha si Tinay ng tiyahin dahil sinasaktan raw ito ng pangalawang asawa ng ama nito.

"Sure kang safe ako dun, Tinay?" tanong niya.

"Oo naman, mabait ang manager namin don. Hindi ako tatagal sa pagtatrabaho doon Cherry kung hindi. Alam kong kating kati ka ng magkaroon ng pagkakakitaan kaya inaalok kitang mag waitres. Andun naman ako, magkasama tayo. Wala kang dapat na ipangamba, Trust me." Panghihikayat muli sa kanya ni Tinay.

Napatango si Cherry sa kausap. Indikasyon na pumapayag na siya. Naisip niyang habang hinihintay niyang mag disiotso siya ay pansamantala na muna siyang mamasukan bilang waitress. Dalawang buwan na lang naman at magdedebut na rin siya.

Pinaalalahanan siya ni aling Joyce at ginarintiyahan din naman ng ginang na mabait nga ang manager ni Tinay dahil nakilala na nito ang boss ng pamangkin at ilang katrabaho ni Tinay sa club.

Ang bilin lang sa kanya ng mga ito ay wag magpapasilaw sa pera dahil maraming mayayaman na costumer sa club na kapag may natipuhan ay aalukin ng malaking halaga.

Tumango-tango siya sa mag tiyahin at lakas loob na sumama kay Tinay sa club.

Sa likod sila dumaan ni Tinay at pagkapasok nila ay kusina pala ng mismong club ang napasukan nila.

Bumati si Tinay sa mga kakilala nito at ipinakilala siya. Bago sila umalis ng bahay sinabi ni Tinay na kapag tinanong siya kung ilang taon na ay sabihin na disi otso na siya. Sumang ayon naman siya rito.

"May kasama ka Cristina, ano yan bagong recruit mo? Ang ganda ha! Pasok na pasok sa banga. Ganyan na ganyan mga tipo ng mga mayayaman na costumer." wika ng isang lalaking tauhan sa kusina.

"Hep, hindi siya magpopokpok dito sa club. Ipapasok ko lang siya bilang waitress. Kayo ha, baka mamaya matakot itong si Cherry mag back out pa, mga loko kayo. Kailangan niya ng matinong trabaho." singhal ni Tinay sa lalaking nagsalita kanina.

"Ay ganun ba! Sorry Tinay, Cherry. Akala ko kase papasok kang dancer o g.r.o dito sa club." hinging paumanhin nito sa kanila.

"Mang Rolly, pakiplasteran nga ang bibig ni Alvin." sinamaan pa ng tingin ni Tinay yung Alvin.

"Sige diyan na kayo at ipapakilala ko pa si Cherry kay Madam Leah." paalam pa ni Tinay at hinila na siya palalabas ng kitchen at dinala siya sa managers room.

"Dito na tayo. Yung bilin ko sayo ha!" paalala muna ni Tinay sa kanya bago kumatok.

"Bukas yan, pasok." sagot ng nasa loob.

Pinihit ni Tinay ang seradura ng pintuan at kiming pumasok na hila-hila ang kamay ni Cherry.

"Madam Leah, kaibigan ko po si Cherry." pakilala sa kanya ni Tinay. Tinitigan siya ng isang babaeng sopistikada, maganda at sexy pa rin ito kahit na mahahalata na rin na nasa edad mid thirties o forties na ang babae.

"Mag a apply ba siya Tinay?" maawtoridad na tanong ng manager.

Kinakabahan na kanina pa si Cherry pero mas lalo siyang kinabahan ng makaharap na ang manager nila Tinay, na napansin naman nito sa kanya.

"Looks young and innocent. Galing probinsiya?" komento ng Madam Leah na sa kanya nakatingin.

"Yes madam Leah, galing pong probinsiya si Cherry kakaluwas lang kahapon at sa amin po siya ngayon nakikitira. Gusto po sanang magtrabaho bilang waitress dito sa club madam." wika ni Tinay na ikinatango tango niya sa harapan ng manager nila Tinay.

"Ilang taon ka na Cherry? At bakit gusto mong mag waitress sa club?" seryosong tanong ng babae sa kanya.

"Eighteen na po madam. Nahihirapan po kase akong makahanap ng ibang trabaho dahil high school graduate pa lang po ako. Inalok po ako ni Tinay na mamasukan dito bilang waitress. Ang sabi naman po niya ay mababait kayo rito kaya po narito ako ngayon, dahil gusto ko pong makatulong sa mga magulang ko." sagot niya sa tanong nito sa kanya.

"Alam mo bang masyado kang maganda para maging isang waitress lang sa club? Kapag naayusan ka at suotan ng sexy na damit ay maraming maglalaway sayo at pag aagawan ka sa labas." litanya ni madam Leah sa kanya.

"W-waitress po madam ang inaaapply-an kong trabaho rito hindi po pagiging g.r.o. Kung hindi po ako pasado aalis na po ako." prangka niyang sagot sa babae.

"I like you Cherry. Nakikita kong may paninindigan ka! Okay tanggap ka na. Tinay ikaw na ang bahala sa kaibigan mo. Bigyan mo siya ng uniporme ninyo at ikaw na ang magturo sa kanya ng gagawin." saad ng manager at utos pa nito.

Hinawakan ni Tinay ang kamay ni Cherry na nanlalamig at namamawis. Nagkatinginan sila at nagkangitian.

"Thank you Madam Leah, lalabas na po kami ni Cherry." wika ni Tinay.

"Salamat po, Madam." segunda naman na saad ni Cherry na yumukod pa atsaka nagpahila na kay Tinay palabas ng manager's room.