SIX

"TUMAWAG NA BA KAYO NG AMBULANSYA?!"

Nagkakagulo na ang lahat. Walang lumalapit at lahat ay hindi malaman ang gagawin. Lumakas ang tibok ng puso ni Czarina habang nakatingin sa may katandaan ng lalaki na nakahiga sa sahig. Bumilis ang paghinga niya at iniisip mabuti kung ano ang dapat niyang gawin sa ganoong sitwasyon.

Nag-aral ng medisina si Czarina, bagaman hindi na siya nag-take ng board exam at wala gaanong aktwal na experience sa paggagamot. Sa kabila no'n ay patuloy ang pag-aaral niya ng medisina, madalas siyang magbasa ng mga libro tungkol doon, manood ng medical films, at manood ng mga aktwal na operasyon.

Iritado siya na lumapit kay Mr. Freddie pero agad siyang hinarangan ng mga naroon.

"I'll check on him," aniya pero sa halip na palapitin ay mas lalo siyang hinarangan.

"Kaya mo? Alam naming lahat na galing ka sa pamilya ng mga doctor pero hindi ka doctor, Czarina. Wala kang alam sa mga ganitong bagay kaya 'wag ka nalang mangielam. 'Wag kang magmagaling."

Kinagat niya ang dila sa loob ng bibig. Bumibigat na lalo ang paghinga niya. Ayaw niyang patulan iyon dahil mas importante ang pasyente sa kanyang harapan.

Pero dinagdagan pa iyon ng mga boses sa kanyang likuran.

"Buhay ang nakasalalay rito, Miss Laude. Huwag ka dito magpasikat."

"Kaya mo bang ako-in ang responsibilidad? Of course, not. Idadaan niyo lang na naman sa pera kapag may nangyaring hindi maganda."

"Huwag niyong palapitin. We can't let Mr. Jao die in her hands."

Nanlulumong napapikit si Czarina. Gusto niya lang naman tingnan ang aktwal na sitwasyon ni Mr. Freddie Jao. Hindi naman siya gagawa ng aksyon na hindi niya sigurado.

"Ano ang gagawin natin?" naiinis na sabi niya sa mga naroon. "Hihintayin natin ang ambulansya? Tingin niyo ba ay aabot pa iyon?"

"Ano ang gusto mong gawin namin? Panoorin siyang mamatay sa mga kamay mo?" dinig niyang sabi ng isang babae.

Tila tinutusok ng kutsilyo ang puso ni Czarina sa mga naririnig. She wasn't used to being looked down. At ngayon na harap-harapan niyang naririnig ang mga bagay na iyon ay sobrang nasasaktan ang damdamin niya.

Napaatras siya ng dalawang beses, nanghihina ang buong katawan.

She graduated with flying colors in medicine. Ilang beses na rin siyang sumama sa mga volunteers sa paggagamot. How can someone question her ability like that?

"I'm a doctor!"

Ang boses na iyon ang umagaw ng atensyon ng lahat.

Hindi na kailangan pang lumingon ni Czarina dahil alam na alam niya kung kaninong boses iyon. It is the voice of her ex-bestfriend, Chloe.

"Padaanin niyo, that's Doctor Chloe Smith, a heart surgeon," sabi ng isang naroon.

Lahat ay namamangha at wala ni isang humarang sa babae.

Nag-squat si Chloe sa tabi ni Mr. Jao at agad naglabas ng gamot na nasa bulsa nito. Binuksan nito ang ilang butones ng damit ng matanda.

"Nandito ba ang pamilya ni Mr. Jao?" tanong ni Chloe at tumingin sa mga taong naroon. "May iba pa ba itong sakit maliban sa sakit sa puso?"

Walang sumagot kaagad.

"Assistant o kahit na sinong malapit sa kanya," dagdag ni Chloe.

"Hindi ma-contact ang assistant niya," sabi ng isang lalaki roon.

Hindi na nahintay ni Chloe ang sagot sa tanong niya. Agad niyang binigyan ng gamot ang matanda at nag-perform ng CPR.

Isang malaking event iyon, present sa araw na iyon ang malalaking mga tao, mga celebrities, politicians, at mga anak ng mga mayayamang businessman. Pagkakataon iyon ni Chloe para magpasikat at hindi niya hahayaang magkamali kahit kaunti.

Pasimple niyang nilingon ang gawi ni Zayden. Para bumagay sa lalaki, para maging katanggap-tanggap siya sa pamilya nito, ay kailangan niyang gumawa ng sariling pangalan. Pangalan na mas angat kaysa kay Czarina.

Lumipas ang ilang minuto pero walang nangyayari.

Nakatingin ang lahat maski si Zayden at Czarina.

Kinakabahan si Zayden habang nakatingin kay Chloe. May takot sa dibdib niya na baka magkamali ang babae at baka hindi nito kayanin ang posibleng masasakit na salita na maririnig niya mula sa mga tao roon.

Samantalang si Czarina ay walang pakielam kay Chloe at nakatuon ang buong atensyon kay Mr. Jao. Wala siyang pakielam kung si Chloe ang makakatulong dito, ang mahalaga ay maging ligtas ito.

"He's moving!" bulalas ng isang naroon.

Lahat ay natataranta na sa pagkakataong iyon, ang iba ay napahiyaw sa sobrang saya, at ang ilan ay tila nakahinga nang maayos pagkatapos magising ni Mr. Jao.

"Mr. Jao, kumusta ang pakiramdam mo? May masakit ba sa'yo?" tanong ni Chloe.

Hindi nagsalita ang lalaki, halatang hirap pa rin ito sa paghinga. Umangat ang kamay nito at inilagay sa kanyang dibdib.

"Malapit na ang ambulance, ligtas ka na," anunsyo ni Chloe.

Nagpalakpakan ang mga naroon at nagpaligo ng sandamakmak na papuri para sa babae.

"Kung wala ka, Ms. Smith, ay hindi na namin alam ang gagawin," sabi ng isang babae na nasa thirties na ang edad.

"Ganyan dapat, doctor at may alam, hindi yung nagfi-feeling lang na kaya niyang isalba ang isang tao kahit wala naman siyang alam," parinig ng isa roon.

Hindi na kailangan pang pangalanan, alam na ni Czarina kung sino ang tinutukoy nila.

"Magagaling na doctors ang pamilya niya pero nakapasok lang naman sa university dahil sa koneksyon at pera. At talagang gusto niya pang gamutin si Mr. Jao gayong wala naman siyang alam."