Chapter 6.1

Marahang kinurot ni Maki ang pisngi ni Irene. Ramdam ng dalaga ang maliliit na kalyo sa payat na daliri nito, animoy sanay ito sa mga bagay-bagay at lubos na mapanganib.

"U-Uncle! Kailangan mong tumupad sa usapan. Huwag kang sinungaling!" nakakunot ang noong sambit ni Irene.

Sinubukan ni Irene na muling igalaw ang katawan, ngunit wala pa rin itong nagawa. Masiyadong malakas ang hawak ni Maki sa kanya, dahilan upang hindi siya makatakas.

Tinapunan ni Irene ng masamang tingin si Maki, animoy sinasabing hindi siya magpapatinag sa lakas ng binata. Nang makita iyon ni Maki, sandali siyang napangisi, saka marahang binitiwan ang katawan ni Irene.

"Huwag kang mag-alala, hindi naman ako interesado sa mga batang tulad mo," sambit ni Maki.

Sandaling nakahinga nang maluwag si Irene, saka tumawa.

"Mabuti naman! Kasi hindi ko rin type ang mga gaya mong matanda," pilyang tugon ng dalaga na nagpataas ng kilay ni Maki.

Hindi nakatugon ang lalaki at nanatiling kunot ang noo habang nakatingin kay Irene.

Tinaas ni Irene ang kanyang kamay. Gamit ang hintuturong daliri, pinindot niya ang dibdib ni Maki.

"Uncle, pwede ka nang umalis kasi matutulog na ko. Kailangan ko munang mag-shower bago matulog," sambit ng dalaga sa kanya.

Walang pakundangang pagpapalayas sa isang kagalang-galang na lalaki.

Malamig na tiningnan lamang ni Maki si Irene. Hindi ito gumalaw o umalis sa kinaroroonan. Napabuntonghininga na lang ang dalaga. Umikot na lang ito at sa kabilang bahagi dumaan patungo sa shower.

Taas noo pa si Irene habang suot ang mabigat na wedding dress sa kanyang katawan. Makalipas ang ilang minuto, narinig ni Maki ang paglagaslas ng tubig mula sa shower.

Matapos mag-shower at lumabas sa loob ng bathtub, noon lang napagtanto ni Irene na wala nga pala siyang dalang pamalit na damit. Napahagod na lang ng sentido ang dalaga, saka tumama ang tingin sa suot na wedding dress kanina.

Masiyado itong mabigat at hindi siya komportable. Sumilip siya sa labas ng pinto at nakitang nandoon pa rin si Maki sa kama, hawak nito ang cellphone and slowly browsing the internet.

Mariing napalunok si Irene at pasimpleng nagsalita.

"Ahem! Uncle, pwede mo bang iabot sa akin 'yung suot kong damit kanina?" nahihiyang utos ni Irene sa lalaking may malamig na mata.

Marahang tumaas ang ulo ni Maki at dumapo ang tingin sa dalaga.

"Tinapon ko na," maiksing tugon ni Maki.

"T-Tinapon mo?" gulat namang sambit ni Irene. Nagsimula na naman uminit ang bunbunan ni Irene dahil sa inis. "K-Kung ganoon, bigyan mo ko ng malinis na damit na pwede kong suotin," naiinis na sambit ng dalaga.

Tumaas ang kilay ni Maki saka sumingkit ang mga mata nang marinig ang tono ng pananalita nito.

"Ganyan ba ang ugali ng isang taong humihingi ng pabor?"

"Ha? Ano ba dapat ang ugali ko?"

"Beg me."

Malakas na sinarado ni Irene ang pinto ng banyo.

"Forget it! Susuotin ko na lang ulit ang wedding dress na sinuot ko. Bahala na!" iritableng sambit ng dalaga sa kanyang sarili.

Inis na kinuha ni Irene ang wedding dress na nakapatong malapit sa kanya. Isusuot palang sana niya ito nang marinig niya ang sunod-sunod na pagkatok sa pinto ng banyo.

Bahagya niyang binuksan ang pinto at nakita si Maki na nakatayo roon.

"Ano na naman?" walang ganang sambit ni Irene.

Sa pagsilip ni Irene sa maliit na uwang ng pinto, kumalat ang halimuyak ng shower gel mula sa loob ng shower-room. Pumapatak ang ilang butil ng tubig mula sa buhok ng dalaga, at kitang-kita ang collarbone niya dahil sa nakatapis lang siya ng tuwalya.

Mariing napalunok si Maki habang minamasdan ang mala porselanang kutis ng babae. Sadyang nakakaakit ang ganda nito.

Bago pa siya lamunin ng init na nararamdaman, inabot ni Maki ang hawak niyang panlalaking pajama kay Irene. Sandali namang natigilan si Irene nang makita ang hawak ni Maki.

Ngunit nang akmang hahawakan na ni Irene at kukunin ang pajama, agad na tinaas ito ni Maki.

"Hindi ka ba manlang magpapasalamat?" aniya.

"Thank you, uncle!"

Isang malaking pilit na ngiti ang binigay ni Irene, saka hinablot ang damit na hawak ng lalaki.

Matapos iyon, agad niyang sinara ang pinto ng banyo. Muli na namang naging malamig ang mukha ni Maki. Kung hindi niya na-alis agad ang kamay sa pinto ng banyo, baka naputol ang kanyang daliri dahil sa lakas ng pagkakasara nito.

"What an ungrateful little girl," inis na sambit ng binata.