Chapter 3

Parang ang bilis ng mga pangyayari. Tatlong linggo lamang ang lumipas simula nang makilala ko si Marcus, malaman ko ang tungkol sa kasal, at makita kong ikasal si Yuan sa iba. Pakiramdam ko para lang akong nanaginip sa sobrang bilis ng mga pangyayari. Ngayon ay naghahanda na kami para sa kasal na magaganap sa susunod na linggo. Pakiramdam ko ay masyadong mabilis ang lahat, ngunit sabi ni Lola Felicia ayos lamang 'yon dahil wala rin talaga siyang balak na patagalin ang kasalan sa paggitang namin ni Marcus.

Noong una ay hirap pa rin akong makapaniwala. Nakakagulat naman kasi na si Marcus talaga ang papakasalan ko. Nalaman ko pa na sikat na CEO, billionaire, at engineer siya. Mayaman talaga siya kahit wala siya sa puder ng lola niya. Sikat pa siya dahil maraming successful projects ang mayroon si Marcus. Hanggang ngayon ay nahihiya pa rin ako dahil noong nakaraang linggo ay naalala ko na ang lahat ng nangyari sa amin sa bar.

"Ayaw mo ng pagkain?"

Napaangat ako ng tingin kay Marcus nang magtanong siya bigla. Lunch time ngayon at kakatapos lang naming sukatan ng gown at suit na susuotin namin. The wedding will be private kumpara sa naging kasal ng isa pang apo ni Lola Felicia. Bilang din ang pupunta lalo na't hiling din ni Marcus 'yun. Pabor din naman sa akin kaya hindi na ako nagreklamo.

"May gusto ka bang kainin?" tanong niya uli.

"Wala bang gulay?" tanong ko.

Ilang araw na yata kaming naka-steak. Kung hindi steak, puro laman o hindi kaya kung ano-anong karne. Nauumay na ako dahil sa probinsya, kahit ginisang gulay ay ayos na ayos na para sa akin.

"What do you want? I can cook for you—"

"Ah, hindi na," nahiya ako bigla. Magluluto pa siya? Huwag na lang. "Masarap naman ang steak—"

"I can cook for you, Monica. Anong gusto mo?" mariin niyang tanong sa akin. Suplado na naman.

"Ginataang kalabasa lang na may talong..." sagot ko na lamang dahil wala naman kasi akong laban sa kanya kung makikipagtalo ako.

Hindi siya sumagot. Mabilis siyang tumayo mula sa pagkakaupo sa harapan ko at nagtungo sa kusina. Dinig ko ang pagluluto nila mula sa upuan ko. Hiyang-hiya ako ngunit hindi naman papatalo si Marcus sa akin. Sa ilang linggo naming nagkakasama sa mansion ay pansin ko ang pagiging suplado niya, ngunit halatang may pakialam pa rin naman sa akin kaya kahit papaano ay natutuwa pa rin ako.

Halos wala pang kalahating oras ay nakabalik agad si Marcus. Napangiti ako nang makita at maamoy ang niluto niya. Gaya ng hiningi ko ay sinunod niya talaga 'yun!

"Wow..." mangha kong sabi. "Thank you!"

Tuwang-tuwa ako at tsaka mas ginanahan kumain. Wala naman akong narinig na reklamo sa kanya tsaka nagsimula na akong kumain. Halos maubos ko ang niluto niya ngunit wala naman siyang reklamo.

Tuloy hanggang sa matapos ang araw na 'yun ay ngiting-ngiti ako. Kaya ganoon na lamang ang kaba ko nang dumating ang araw na pinakahihintay ng karamihan. Sa isang pribadong simbahan naganap ang kasal namin. Wearing a white silk mermaid tube wedding dress, nakapusod lang ang natural kong buhok at naka-light makeup habang black suit naman ang kay Marcus, ay sabay kaming nanumpa sa Diyos para alagaan at samahan ang isa't isa sa hirap at ginhawa.

"Monica Celestine Alcantara, isuot mo ang singsing na ito bilang patunay ng aking pagmamahal, pagiging tapat, at ng aking walang hanggang pangako na ikaw lamang ang iibigin ko sa bawat bukas na darating. Sa hirap man o sa ginhawa, sakop ng liwanag o ng dilim, hinding-hindi ko bibitawan ang iyong mga kamay," determinadong sabi ni Marcus. Dahan-dahan niyang isinuot ang singsing sa daliri ko.

"Sa kapangyarihang ipinagkaloob sa akin, ipinapahayag ko kayo bilang mag-asawa. Ang pinagbuklod ng Diyos ay huwag papakialaman o paghihiwalayin ng tao," tumingin si Father kay Marcus. "You may now kiss the bride."

Dahan-dahang itinaas ni Marcus ang suot kong belo at walang kahirap-hirap na hinawakan ang magkabilang pisngi ko tsaka ako hinalikan sa labi. Napapikit ako at dinama ang labi niya.

Ngayong kasal na kaming dalawa, siguradong wala na akong kawala sa kanya. Anuman ang mangyari ay gagawin ko ang lahat upang maging mabuting asawa kay Marcus.

Matapos ng kasal namin sa simbahan ay dumeretso kami sa bahay na ibinigay sa amin ni Lola Felicia. Malaki iyon para sa dalawang tao—malawak at dalawang palapag. Tahimik ito at kung pagkakatitigan ay medyo nakakatakot para sa akin.

Huwag mong sabihing madalas ako maiiwan mag-isa dito?

"Okay ka na?" tanong ni Marcus sa akin.

Bihis na siya. Simpleng black polo shirt at khaki pants ang suot niya kasabay ng brown leather shoes. May relo sa pulsuhan na inaayos niya ngayon.

"May dinner tayo sa mansion. Sinabi ko kay Lola na ayaw natin ng celebration kaya nagpahanda na lamang siya ng dinner," aniya.

"Oo, nakapagpalit na ako," sagot ko at tumayo mula sa pagkakaupo sa kama.

Simpleng puff sleeve strawberry white dress ang suot ko na lampas sa tuhod at nagsuot na lang din ako ng wedge heels. Naka-half-down and half-up naman ang buhok ko para kita pa rin ang kulot doon.

Tumango si Marcus at naunang naglakad sa akin palabas ng kwarto. Nakanguso akong sumunod sa kanya. Suplado. Akala mo naman hindi niya ako asawa. Tahimik lang kami sa buong byahe hanggang sa makarating kami sa mansion. Gusto ko mang makipag-usap ngunit wala na rin akong enerhiya dahil pagod din ako galing sa kasal.

Nang makapasok kami sa loob ay agad kaming sinalubong ng iilan niyang mga kamag-anak. Nangunguna si Lola Felicia pati ang ama at ina ni Marcus.

"You are so pretty, hija!" malaki ang ngiti na puri sa akin ni Mommy Mariel, ang Mama ni Marcus. Sa tabi nito ay si Daddy Marco. "I am so happy na ikaw ang naging asawa ng anak ko!"

"Hija, come here. Ipapakilala kita sa isa ko pang apo!" tawag sa akin ni Lola Felicia kaya agad akong nagpunta doon.

Naramdaman ko naman na sumunod sa akin si Marcus kaya hindi na ako nagreklamo. Malaki ang ngiti ko sa labi nang makalapit ako kay Lola ngunit agad napawi iyon nang makita ko ang mukha ng apong tinutukoy niya, na ngayon ay gulat ding nakatingin sa akin.

"Monica, apo. This is Yuan Zapanta, my other grandson. Half-brother siya ni Marcus sa ama," malaki ang ngiti na pakilala ni Lola Felicia.

Hindi ko magawang gumalaw. Gulat na gulat ako sa nalaman. Kapatid ni Marcus si Yuan? Kapatid ng asawa ko ang lalaking nanloko sa akin?!