Kabanata 2.1

Malapit na ang birthday party ni Marianna Adams, ang lola ni Caroline sa father side. Lahat sila ay dadalo sa birthday party. Tiningnan ni Caroline ang itsura ni Caleb at sa itsura nito baka hindi siya payagang pumasok sa Adams Mansion. Ipinatawag ni Caroline ang designer at glam team niya. Mabilis namang dumating ang mga ito at may dala-dala na silang mga bagong suit ng panlalaki.

“Anong gagawin natin?” kuryosong tanong ni Caleb nang paupuin siya ni Caroline.

“Kailangan lang natin ng kaunting make-over. Gugupitan natin ang mahaba mong buhok, lilinisin natin ang bigote mo at mamimili tayo ng isusuot mo for my grandma’s birthday.” Anas niya, mabilis namang tumayo si Caleb.

“Wala kayong babaguhin sa itsura ko, pwede mong palitan ang mga damit ko pero huwag mong pakikialamanan ang itsura ko.” Seryoso at malamig na wika ni Caleb na bahagya pang ikinagulat ni Caroline.

“Pero sa itsura mo I’m sure pagtatawanan ka at huhusgahan ng mga bisita ni Lola.” Wika ni Caroline pero hindi pa rin pumayag si Caleb.

“Yun lang ba talaga ang iniisip mo o nahihiya ka lang dahil ganito ang itsura ko?” seryoso pa ring saad ni Caleb. Napapahilot na lang si Caroline sa sintido niya nang umalis si Caleb. Ayaw ni Caleb na baguhin ang sarili niya dahil oras na may nakakita sa kaniya sa birthday party ni Marianna Adams at nakilala siya, posibleng ipasundo na siya ng kaniyang ina.

Nang makaalis ang designer at glam team ni Caroline ay hinanap niya kaagad si Caleb. Nakita niya naman ito sa hardin at nakaupo sa duyan habang nakatingin sa kawalan. Naupo si Caroline sa bahaging dulo ng duyan saka niya tiningnan si Caleb.

“Bakit ayaw mong gupitan ang buhok mo at linisin ang bigote mo? 28 ka pa lang at hindi nagkakalayo ang edad nating dalawa pero sa itsura mo mas matanda ka pang tingnan sa mga 40 years old.” Mahinahon na saad ni Caroline.

“I have my own reasons,” tanging sagot ni Caleb.

“May tinataguan ka ba? May malaki ka bang utang, sangkot sa droga, may kasalanan sa batas? Anong dahilan para pahabain mo ng ganiyan kahaba ang buhok at bigote mo?” napalunok si Caroline nang masama siyang tiningnan ni Caleb. Mabilis niyang iniwas ang paningin niya dahil para bang papatayin na siya ni Caleb sa paraan ng pagtingin nito sa kaniya.

“Alam mo, akala ko pa naman naiiba ka sa pamilya mo. Hindi ka tumitingin sa panlabas na kaanyuan ng isang tao pero sa mga tanong mo, para bang sinasabi mong isa akong kriminal na nagtatago. Huwag kang mag-alala, hindi ako katulad ng iniisip mo. Mayaman naman ang pamilya mo diba? Kayang kaya nila akong ipakulong.” Masungit na sagot sa kaniya ni Caleb. Naguilty naman si Caroline sa mga sinabi niya. Hindi niya lang maiwasan na hindi mag-isip ng hindi maganda tungkol kay Caleb dahil hindi niya naman ito kilala.

“Where’s your family?” pag-iiba ni Caroline ng tanong. “You’re my husband now, gusto lang kitang makilala.”

“Ako na lang ang meron ako.” Tipid na sagot ni Caleb, naiinis naman si Caroline dahil napakasungit ni Caleb sumagot sa kaniya pero kinalma niya na lang ang sarili niya kesa mag-away sila ni Caleb.

“Wala ka ng pamilya?” tanong pa ni Caroline kaya masama siyang tiningnan ni Caleb. Nakagat na lang ni Caroline ang pang-ibaba niyang labi saka siya tumango-tango. Hindi pa ba naging malinaw ang sagot ni Caleb?

Sumapit na ang birthday party ng lola Marianna nila at gaganapin ito sa Adams mansion. Isang malalim na buntong hininga ang pinakawalan ni Caroline dahil hanggang ngayon hindi niya nakukumbinsi si Caleb na pagupitan ang buhok niya at linisin ang mga bigote niya.

Ayaw sana isama ni Caroline si Caleb pero huli na ang lahat dahil nalaman na ng lola Marianna niya ang pagpapakasal niya. Binigyan ni Caroline ng suit si Caleb pero hindi nagbago ang itsura nito. Mahaba at gulo-gulo pa rin ang buhok ni Caleb, mahaba rin ang mga bigote niya.

“Kailangan ko ba talagang sumama sa party? Hindi ba pwedeng maiwan na ako rito?” ani ni Caleb habang inaayos ang necktie niya.

“Nalaman na ni Lola Marianna ang pagpapakasal ko kaya wala na akong magagawa kundi ang isama ka. Ito lang ang pakiusap ko sayo, huwag kang gagawa ng gulo at huwag kang lalayo sa akin.” Habilin ni Caroline.

Nang maging handa na silang lahat ay sabay-sabay na silang umalis ng bahay nila sakay ng magkakaibang sasakyan. Nauna nang pumasok ang pamilya ng Daddy niya, sumunod naman silang dalawa ni Caleb. Masayang sinalubong ng ibang bisita ang pamilya nina Caroline pero ng makita nila ang kasama ni Caroline ay gumuhit sa mga mukha nila ang panghuhusga.

“Who is he?” kuryosong tanong ng isang matandang babae kay Winston. Tiningnan naman nila si Caleb na walang pakialam.

“He’s Caroline husband, senorita.” Nakangiting sagot ni Aubrey sa matanda. Nagulat naman sila dahil hindi nila inaasahan na ikinasal na pala ang isang anak ni Winston sa lalaking tila wala pang pinag-aralan.

“Are you okay, mija? Sabihin mo lang sa amin kung tinatakot ka ng lalaking yan.” Ani ng isang matanda kay Caroline. Tiningnan nila si Caleb na blangko lang na nakatingin sa kanila tila ba walang pakialam kahit husgahan pa siya.

“Winston, mijo,” masayang saad ni Marianna, ang ina ni Winston saka niya ito hinalikan sa pisngi. Isa-isa ring nginitian ni Marianna ang pamilya ni Winston hanggang sa makita niya si Caroline at ang lalaking katabi nito. 

“Security, bakit niyo hinayaan na may makapasok na pulubi rito? Get him out.” Utos ni Marianna sa mga security niya.

“No, please, stop. He’s not a beggar, he’s my husband grandma.” Wika ni Caroline saka niya itinago sa likod niya si Caleb. Narinig naman yun ng ibang bisita ni Marianna. Hindi pa man nagsisimula ang program pero tila ba nasira na ang gabi ni Marianna. Tiningnan ni Marianna ang mapanghusgang mga mata ng mga bisita niya at pinagtatawanan na rin sila ng mga ito.

Sa kahihiyang naramdaman ni Marianna ay pinapasok niya sa loob ng bahay ang pamilya niya.

“Who is he, Caroline?! Siya ba ang ipinagpalit mo kay Isaac? What are you thinking?!” galit na galit na sigaw sa kaniya ng lola niya. Napapayuko na lang si Caroline habang kunot noong pinagmasdan ni Caleb ang pamilya ni Caroline. Tila ba lahat ng pamilya ni Caroline ay walang ibang nakikita kundi ang pagkakamali ni Caroline.

“Yeah, he is grandma. Hinahayaan ni Caroline na makasabay namin siya sa hapag kainan at nakakahiya na rin sa mga nakakakilala natin na ang asawa niya ay isang….” Tiningnan pa ni Aubrey si Caleb na tila ba nandidiri siya. “Ugh! This is disgusting, paano kung may sakit pala siya?” dagdag pa ni Aubrey. Napapangisi lang naman si Caleb habang pinapakinggan niya ang pamilya ni Caroline. Tiningnan niya na rin si Caroline na tahimik lang tila ba hindi niya alam kung paano niya ipagtatanggol ang sarili niya.

“Caroline, is this true? Answer me and tell me that you’re just joking!” galit pa ring saad ni Marianna.

“I am not, grandma.” Nakayukong sagot ni Caroline.

Akma sanang sasampalin ni Marianna si Caroline nang mabilis na humarang si Caleb kaya siya ang sumalo nang sampal na dapat ay kay Caroline.

“Don’t hurt her, Mrs. Adams, please.” Pakiusap ni Caleb pero maging siya ay sinampal ni Marianna.

“Ang kapal ng mukha mong nagpakasal sa apo ko, hindi ka nabibilang kahit sa anong pamilya, paano kita matatanggap?! Sinisira mo lang ang imahe ng apo ko at ng pamilya namin! And you came here without any gift for me?! What a shame!” galit na sigaw sa kaniya ni Marianna. Hindi akalain ni Caleb na mahalaga pala sa pamilya ni Caroline ang kapangyarihan. Mayaman ang pamilya nila at ang gusto rin nilang lalaki para kay Caroline ay nagmula rin sa mayamang pamilya.

“Don’t hurt my granddaughter, Marianna. Oo, nagkamali siya dahil nagpakasal siya ng hindi man lang sinasabi sa atin pero huwag niyo siyang sasaktan.” Pag-aawat na rin ni Elsie, ang lola ni Caroline sa mother side niya.

“Huwag mong pakikialamanan ang pamilya ko, Elsie. Magpasalamat na lang kayo dahil tinanggap ko pa si Caroline bilang apo ko kahit na anak lang siya ng anak mong malandi.” May diing wika ni Marianna. Hinila naman na ni Elsie ang apo niya palabas ng Adams mansion. Ayaw na ayaw niyang ipinapahiya ng mga Adams ang apo niya at ang anak niyang matagal ng nananahimik sa libingan.

Tahimik silang tatlo na sumakay ng sasakyan. Gusto nang bumagsak ng mga luha ni Caroline pero pinigilan niya yun. Ayaw niyang umiyak nang may nakakakita sa kaniya.

“Defend yourself sometimes, Caroline. Walang ibang makakatulong sayo kundi ang sarili mo. Kung hahayaan mong aapihin ka na lang ng pamilya ng ama mo, walang mangyayari sa buhay mo. Patuloy ka pa rin nilang ipapahiya.” Panenermon ni Elsie sa apo niya. Nanatili namang tahimik si Caroline habang nakikinig lang din si Caleb. Ngayon naiintindihan niya na kung bakit tila walang kakampi si Caroline sa loob ng bahay nila dahil siya ang illegitimate daughter.