Chapter 2

"Magiging kamukha mo na si Sheki sa bigat ng eyebags mo. Natutulog ka pa bang babae ka?"

Mahina akong sinuntok ni Barbie sa balikat habang papalabas kami ng university.

Kakatapos lang ng last subject namin. Afternoon shift ako kaya ganitong mga oras ang labasan ko. Pinindot ko ang cellphone para tingnan ang oras. Alas-otso na at malapit na rin akong ma-lowbat.

"Ang sagwa naman ng reference mo. Mas nagsusuklay naman ako kaysa kay Sheki 'no at natutulog ako ng eight hours a day para healthy. Hindi ako gaya niyang dilat ang mata magdamag kaya ang itim na ng undereyes."

Marahan akong naghikab. Inaantok na talaga ako. Kanina pa to mula sa second subject ko. Tinakpan ko ang bibig. Kumapit ako sa braso ni Barbie at naglalambing na inilapit ang sarili rito.

"Barbs, antok na ako. Piggy ride mo ako, please."

Lumabi ako at nagpapa-cute na ikinurap-kurap ang mga mata.

Nanghihilakbot na pilit na inalis ni Barbie ang pagkakahawak ko rito. Animoy diring-diri sa akin.

"Umalis ka nga! Nakakadiri kang babae ka!"

Tuluyan ko nang niyakap si Barbie. Ipinulupot ko ang braso sa bewang niya at tinangkang halikan ito. Ngumuso ako at inilabas ang dila para dilaan ang pisngi nito.

"Hoy, Xylca! Ang manyak mo! Di tayo talo!"

Pilit na iniiwas nito ang mukha para hindi ko maisagawa ang binabalak.

"Sige na. Piggy ride na!"

Binatukan niya ako.

"Magtigil ka nga."

Tumatawang binitiwan ko na siya at ipinagpatuloy ang paglalakad. Maalinsangan ang gabi. Sa tabi ng kalsada ay nadadaanan namin ang mga stalls ng mga nagtitinda ng street foods.

"Barbs, nakita ko kanina ang kuya ni Kay sa canteen."

"Si Gori?"

"Siya na ngang tunay at wala nang iba pa. Iyong number one enemy mo."

Umingos ito.

"Ano naman ngayon?"

"Poging pala iyon no? Ang tangkad niya. Di ba PMAer iyon? Bakit andito?"

Nagkibit'balikat ito.

"Ewan. Bakit ba kasi?"

"Wala lang. Sinasabi ko lang sa iyo."

Tiningnan niya ako ng masama.

"Sinarili mo na lang sana."

"Curious ako Barbs, ano ba talaga ang nangyari sa sinehan last year? Bakit parang umiiwas kang pag-usapan iyon?"

Namula si Barbie sa tanong ko.

"Anong umiiwas? Ako di ba ang unang nagkuwento sa inyo tungkol doon?"

"Oo nga, ikaw nga pero sa tuwing tinatanong ka namin kung ano ba ang nangyari sa loob ng dalawang oras doon, bigla ka na lang mananahimik at iibahin ang topic. So ano nga?"

"Wala naman kasing nangyari. Tigilan mo na nga ako sa kakatanong mo.

"Kitams? Nagba-blush ka na naman e. Ano ba kasi talagang nangyari?"

"Alam mo, mas gusto kita kapag lumalabas iyang pagkabobita mo. Paki-activate nga ng card. Reverse effect."

"Di ako academic intelligent kasi street smart ako. Sige na nga, pagbibigyan kita. Lusot ka ngayon sa aking matanglawin na mga katanungan."

Nanahimik na kami habang binabaybay ang kalsada patungong kanto.

"Nahihirapan ako sa Finance for I.T. na subject ko ngayon, Barbs. Alam mo namang ayaw ko sa mga numero at logic logic na iyan. Mahina ang ulo ko diyan e."

"Paturo ka kina Dean at Pariah."

"Wag na. Ayaw ko silang istorbohin. Busy ang mga iyon sa review para sa boards."

"May naisip ako, Xylca."

"Ano iyon?"

"Maghanap ka ng afam na magaling sa math at logic tapos pa-tutor ka. O di ba? Ang galing ko! Bright idea! Akin iyan, ha."

"Malabo iyan. Ang gusto nila kausap hindi estudyante."

"Edi mag-roleplay ka. Ikaw ang naughty student tapos siya ang ultimate hottie prof mo. Di ba?"

Tinampal ko sa braso si Barbie.

"Tange! Di ko ginagawa iyan, no! Hanggang chika lang ako. Hindi rin naman ako nanghihingi ng pera. Kung magbibigay, eh di salamat. Kung hindi, eh di bye-bye."

"Suggestion ko lang naman."

Naghiwalay na kami nang marating namin ang kanto. Sa kabilang lane kasi mag-aabang si Barbie ng jeep pauwi. Sumakay naman ako sa nakaantabay na jeep. Isinuot ko ang ear pods at nag-sound trip na lang.

Pagbaba ko ay nilakad ko ang makipot na daanan papunta sa amin. Nadaanan ko pa ang mga nagkukumpulang mga tumatagay na tambay sa gilid.

Hindi pa man ako nakakarating ng bahay ay rinig ko na ang mga boses ng mga magulang. Nagsisigawan na naman sila. Nag-aaway na naman sila dahil sa pera. Ano pa ba ang bago?

Magigising ako sa umaga na wala sila tapos madadatnan ko sila pag-uwi ko na nagbubulyawan. Hay, buhay.

Walang kibong pumasok ako ng bahay at dumiretso sa kwarto. Nagbihis ako at kinuha ang pitaka. Chinarge ko ang cellphone pagkuway lumabas ako para pumuntang kusina. Nadaanan ko si mama na prenteng nakaupo sa kahoy na upuan sa sala. Nakataas pa ang dalawang paa nito sa mesita.

"Hoy Xylca! Nagsumbong sa akin ang ate mo kanina. Hindi niya raw nagustuhan ang mga sinabi mo kanina sa kaniya! Ikaw naman kasi! Ang yabang mo nang magsalita. Respetuhin mo naman ang ate mo! Nagmana ka talaga dito sa magaling mong ama!"

Hindi ko na lang pinansin ang sinabi  ni mama pero sa loob ay labis-labis na ang paghihimagsik na nararamdaman ko. Tiningnan ko si papa na nakalugmok sa sahig. Lasing na naman siya. Panaka-naka ay sinasagot niya ang mga patutsada ni mama.

"Jun," tawag ko sa kapatid na nakaupo sa upuan sa tabi ng mesa sa kusina.

"Bakit 'te?"

"Saan si Missy?"

"Nasa kwarto ni Ate Marize, te. Pinabantay ni ate kay Kikay."

Tumango ako.

"Kumain na kayo?"

Umiling ito.

"Hindi pa ate."

"Sige magluluto ako. Nagsaing ka na?"

"Opo, ate."

"Hindi man lang nila nagawang magluto ng hapunan. Hinintay pa talaga nila akong dumating."

Binuksan ko ang ref at naglabas ng isang whole chicken. Kumuha rin ako ng bawang, sibuyas, luya,toyo, suka, asin, asukal, paminta at bay leaf. Mag-aadobo ako.

"Jun, pakihiwa nga ng mga rekados."

Tumayo ito at kumuha ng kutsilyo at chopping board at nagsimulang maghiwa.

Ibinabad ko naman sa tubig ang manok.

"Jun, may klase na kayo bukas di ba?"

"Opo te."

"May assignments ka ba? Si Missy?"

"Meron, te. Mamaya gagawin ko."

"Jun! Dalhan mo nga ako ng tubig na malamig dito! Bilisan mo!" sigaw ni mama.

Lumapit ako kay Jun at kinuha ang kutsilyo.

"Sige na. Bigyan mo ng tubig."

"Leche! Dalian mo! Ang malas ko talaga sa pamilyang ito! May asawa na nga akong lasenggero, may mga anak pa akong walang kwenta! Nagkandakuba na nga ako sa pagtatrabaho para makapag-aral kayo tapos magpapabuntis lang! Kaya ikaw Xylca, tumigil ka na rin sa pag-aaral mo! Hindi ka rin naman makakatapos! Mabubuntis ka rin gaya ng mga mahaharot mong kapatid! Kung ako sa iyo, pakasalan mo na iyang mga Amerikano mo at nang makatulong ka naman sa amin! Jun, ang tubig ko! Ang kupad mo!"

Parang walang narinig na ipinagpatuloy ko ang paghihiwa. Wala ng epekto sa akin ang mga sinasabi sa akin ni mama. Araw-araw ba naman niyang linya iyan sa loob ng apat na taon, ewan ko na lang kung masaktan ka pa. Wala na. Pinatigas na ako ng panahon. Mas masahol pa sa mga sinabi niya ang mga natatanggap kong mga salita sa ibang tao.

Mabubuntis rin daw ako ng mga maaga gaya ng mga ate ko. Wala raw akong mararating. Magbenta na lang daw ako ng katawan para mapakinabangan naman daw ako. At nang malaman ng buong barangay na may mga ka-chat akong afam, pinagkalat nilang puta daw ako. Na halos lahat ng mga kalalakihan dito sa lugar namin ay natikman na raw ako.

Sa una, siyempre nakakaramdam ako ng sakit pero kalaunan ay nasanay na ako. Wala namang totoo sa mga sinasabi nila so bakit ako magpapaapekto? Hindi naman sila ang nagpapakain sa akin. At hindi rin naman ako magkakapera kung patuloy kong pakikinggan ang mga sinasabi nila. Labas sa tenga lahat ng mga panghahamak nila.

Kinuha ko ang manok at hiniwa ito. Pagkatapos ay nagsalang ako ng kawali sa stove, inilagay ang manok at mga rekados, nilagyan ng mantika at iba pang pampalasa at tinakpan. Pinihit ko ang burner.

Naupo ako sa plastic na silya at tinitigan ang apoy. Dinig ko ang patuloy na talak ni mama. Ang pagsisisi niya na nagpakasal siya kay papa, na naging anak niya kami at ang pagiging walang kuwenta ko raw. As per usual, ako na naman ang nakita niya.

Naghikab ako. Pagod na pagod na ako. Literal na pagod ang katawan ko pati ang utak at puso. Mabigat din ang pakiramdam ko.

Makalipas ang ilang minuto ay hinango ko na ang kawali. Kumuha ako ng plato at nagsalin ng kanin at ulam.

"Jun, tawagin mo na sila. Kakain na. Si Missy, ha."

"Sige, ate."

Bitbit ang plato ay pumunta akong kwarto. Nilagpasan ko lang si mama na nang makita ang plato ko ay pasigaw na tinawag sina ate na buong araw yatang nagpapakasarap sa kanilang mga kwarto.

"Marize! Elise! Kain na kayo! Nakaluto na!"

Pumasok ako sa kwarto at isinara ito. Nagsimula akong kumain. Hinugot ko ang charger at nag-on ng data. May mga messages na galing kay Charles.

Love, I've been sending you messages but u don't reply.

Nag-type ako ng reply.

I'm sorry, love. Just got home from school and guess what? I passed our test. You are really my lucky charm.

I told u u can do it. You're an intelligent girl. It's one of the reasons why I'm smitten by you.

I know. Lol

What a humble girl.

And a beautiful one, too.

Yes, thank you for adding 🤗. Mind if i call u?

Not now, Charles. My place is noisy right now. Very noisy. Lots of people here. I will not hear you.

That's unfortunate. Love, can u send me your smiling photo?

Send yours first

Sumubo ako habang hinihintay ito.

Charles Brown sent a photo.

Halos lumuwa ang mata ko pagkakita sa picture nito. Napasipol ako. Wow!

Naka-topless ito kaya kita ang napaka-toned na abs ng lalaki. Namumurok din ang mala-batong mga braso nito. Hanggang binti ang kuha ng picture nito habang nakahiga sa kama. Nakahawing pababa ang suot na shorts nito. May mga balahibo sa bandang puson nito na kung susundan mo ng tingin ay patungo sa..

"Shucks! Ang laki ng bulge! Anaconda ba ang nasa loob niyan?"

Zinoom-in ko ang crotch area ng lalaki.

"In fairness, biniyayaan si kuya. Blessed sa baba tas pinagpala rin sa mukha. Ang ganda talaga ng blue eyes mo."

Love, it's your turn. Show me your pretty smile.

Nag-scroll ako sa gallery para pumili ng picture ko. Siyempre alam ko na ang karakas ng mga 'to. Araw-araw talaga silang nanghihingi ng mga larawan mo. Ako naman bilang isang matapat na girl scout, nagpho-photoshoot na ako agad para pili-pili na lang tuwing nanghihingi sila gaya ngayon.

Sinend ko ang napili kong photo sa kaniya.

Beautiful as ever, love. I want to call u. Pls let me call u.

Sorry love. I will call u later. Need to do my assignments.

Okay, love. I understand. Study now. Love you.

Love you too.

Pinatay ko ang cellphone at ibinalik sa pagkaka-charge. Hinarap ko ang pagkain at tinapos na ito. Hindi na rin ako lumabas pa. Nag-aaway pa rin kasi si mama at papa. Hinahalungkat na naman nito ang nakaraan. Sana daw pinili na lang nito ang mayamang manliligaw nito kaysa kay papa. Disin sana ay maginhawa ang buhay nito ngayon.

May kumakatok sa pinto. Tumayo ako at binuksan ito. Si Jun. May bitbit na isang baso ng tubig. Sumilay ang ngiti sa labi ko.

"Te, tubig o."

Nakangiting kinuha ko ang baso at ininom.

"Te, akina ang plato mo."

Kinuha ko ang plato sa kama at inabot dito. Ang sweet talaga ng kapatid kong ito.

"Pagkatapos mong maghugas ng plato, dito na kayo sa kwarto dumiretso. Dalhin mo si Missy. Dito na kayo gumawa ng assignments para wala masyadong istorbo."

"Sige, te."

Tumalikod na ito bitbit ang baso at plato. Sinundan ko ng tingin ang kapatid. Ang aga nitong nag-mature sa buhay. Palibhasa naging saksi sa pang-araw-araw na pangit na mga eksena sa bahay.

Bumalik ako sa kama at nahiga. Pumikit ako at hinayaan ang mga luha na kumawala. Sa labas ay naririnig ko na ang pagkabasag ng mga gamit sa sala kasunod ang impit na pag-iyak ni mama. Nakatikim na naman siguro ng sapak mula kay papa.

Kinuha ko ang ear pods at isinalaksak sa tenga. Nagpatugtog ako. Umaasang malulunod ng malakas na kanta ang ingay na gustung-gusto kong patigilin pero hinahayaan ko lang dulot ng kawalang magawa.