الفصل الخامس

أنا بريئه يا بيه

و الله العظيم بريئه و دلال بتتبلي عليا

دا اللي قالته أم إبراهيم لوكيل النيابة من قبل حتي ما يسالها اسمك اية !!

وكيل النيابة بصلها و قال بسخرية:-

اشربي اللمون يا حاجة خليكي تفوقي كدا لسة ليلتنا مطولة مع بعض و شكلها هتبقي نبطشية عنب بجد

أم إبراهيم مسكت الكوباية و شربت بخوف و هي بتقول:-

من يد ما نعدمها يا بيه

وكيل النيابة برق ليها و قال:-

ها يا حاجة قولتلي اسمك اية ؟!

أم إبراهيم ردت عليه بخوف بان في نبرة كلامها و توتر على وشها و قالت:-؛

أم إبراهيم يا بيه

وكيل النيابة كمل و قال:-

ها يا أم إبراهيم هتقوليلي كدا بهدوء اية اللي حصل ولا هتقولي برضوا اية اللي حصل!!

أم إبراهيم بخوف و صوت مهزوز :-

والله العظيم بريئه يا بيه أنا معملتش حاجة ولا جيت جنب حد ، دا أنا في حالي ولا بهش ولا بنش حتي اسال عليا أم إسماعيل جارتي

وكيل النيابة نفخ و شخط فيها وقال:-

دا بينها ليلة مش هتهدي ما تقولي يا ولية عملتي في مرات ابنك كدا لية ؟!

أم إبراهيم مستحملتش نبره صوته و أغمي عليها

وكيل النيابة نفخ بضيق و هو بينادي على العسكري و بيقول:-

تعال يبني فوقها خلينا نخلص من أم الليلة دي

........

أمي أمي مالها ؟!

دي الكلمات اللي خرجت من إبراهيم و هو بيستفهم من أهل الحارة عن اية اللي حصل بعد المكالمة اللي جاتله

- والله يا أستاذ إبراهيم البوكس جه خد الست الوالدة و اللي عرفناه إن زوجتك هي اللي بلغت عنها و عملت ليها محضر

إبراهيم أخدت الكله جوه صدرة و اتماسك و قال:-

و عرفتوا إزاي إن مراتي هي اللي بلغت عنها ؟!

- أصلها كانت واقفة و هما بياخدوا و قالت للظابط إن أمك اللي ضربتها

إبراهيم هز رأسه بايجاب و قال جواه:-

عملتيها يا دلال أول مرة تنفذي كلامك ، عملتيها و حبستي ست كبيرة قدم أمك بس هتروحي مني فين افضالك بس و هروقك ترويقة العيد

جه يمشي عشان يروح لأمه لكن وقف لما سمع صوت ابنه و هو بيقول بخوف :-

بابا إنت رايح فين إنت كمان و سايبنا !!

إبراهيم لف وشه ليه لقي و أولاده الاتنين ماسكين اديهم في بعض و الخوف مالي وشهم فعقد حواجبه و قال:-

إنتوا اية اللي مقعدكم هنا ؟! مرحتوش مع امكم لية ؟!

الاتنين نزلوا رأسهم في الأرض وومحدش اتكلم و ابراهيم كان هيتجنن فنزل لمستواهم و قال:-

اية يا سيف اللي حصل و مروحتش إنت و أخوك مع أمك زي كل مرة لية ؟!

سيف اتنهد و قال:-

ماما مرضيتش تاخدنا معاها ، قالتلنا خليكم مع ابوكم و ستكم و خلوهم يربوكم و يشيلوا شيلتكم أنا مش كل مرة هاخدكم معايا و هما يقعدوا يريحوا دماغهم هنا

إبراهيم مسح على وشه بغيظ و كتم شتيمته و بصلهم و قال:-

طب وانتوا دلوقتي واقفين في الشارع لية ؟! ما تطلعوا تقعدوا في الشقة على ما اجيلكم

سيف بص ليه و الدموع نزلت من عينه و قال:-

إحنا خايفين يا بابا لا إنت ولا ماما معانا !!

- و كمان جعانين

دا كان صوت الطفل التاني اللي نطق أخيراً وإبراهيم بصله و قال:-

ما تأكلوا أي حاجة من التلاجة دلوقتي على ما اجيلكم يا أمير

هز رأسه بالنفي و قال:-

مهو مفيش حاجة في التلاجة تيتا خدت كل حاجة قبل ما تتخانق مع ماما النهاردة

إبراهيم وقف و شتم في نفسه و لعن حظه الزفت و قال:-

لية يا أمي كدا ؟!! دا إنت كحلتيها خالص بقي لونها أسود قاتم يا شيخة ، دا ليها حق البت تطق من اجنابها لما مش عارفه تأكل العيال

اخدهم و راح للمحل و اشتري ليهم اكل و حلويات و قال:-

روحوا انتوا وأنا شوية و هجيلكم

هز سيف رأسه بالنفي و قال :-

لا خدنا معاك أنا هخاف اطلع اقعد لوحدي

إبراهيم كان واقف في موقف هيتحسد عليه ما بين عياله اللي خايفين و محتاجينه و أمه اللي مرمية في الحجز و عاوز يروح يشوفها ...

بصلهم و حسم امرة و قال بحده :-

.............

طلعا في دماغي نروق شوية

ما تيجي نروق شوية يما !!

قالتها دولت اللي قاعدة مشغلة الفون على الأغاني و مشغلة التليفزيون على مسلسل بتابعه و بتاكل ليب و شيبسي

أم دلال بصت ليها باستغراب و قالت:-

هو في اية يا بنتي بتاكلي زي المفجوعة كدا لية ؟! لا و كمان مروقة و تلفزيون و أغاني إنت سخنه يا بت ؟!

دلال ضحكت بصوت عالي و قالت:-

ربنا يكفيكي جو الشماته بعد ظلم وانك أول مرة تاخدي حقك دا حاجة حلوة أوي يما

أم دلال بصت ليها و قالت:-

بس إنت مقولتليش عملتي ايه لما خرجتي من هنا عاوزة أعرف كل حاجه من طقطق لسلاموا عليكم

هزت دلال رأسها بايجاب و قالت:-

هقولك تدري ليش ؟! لأن أنا عاوزة افتكر اللي حصل وافرح تاني وانبسط تاتي و تاني

أنا لما خرجت من هنا جريت على قسم الشرطة و دخلت للظابط وقولت ليه

فلاش باك

- يا حضرت الظابط الحقني أنا اتبهدلت و انضربت في نص الشارع

الظابط بص ليها و قال :-

اهدي يا ست و اتكلمي بالراحة و لو ليكي حق هيجيلك أما لو ملكيش فهتشوفي أيام أسود من الكحل

دولت بصت ليه و قالت و هي بتنهج و العرق ملا وشها:-

حماتي كل يوم و التاني تضربني و جوزي زي ما بيقولوا كدا دلدول أمه عشان مليش أب يدافع عني ممرمطني يا بيه و لو مش مصدقني في كاميرات بتاع محلات اللي قدام البيت جابت كل حاجه من أول الخناقة لاخرها

الظابط بص في وشها لقي كدمة جنب عنيها مزرقة شوية و قال:-

هتروحي المستشفى اللي جنب القسم دي و تجيبي تقرير باللي حصلك و تجيلي و هعملك المحضر

دلال ضحكت و هي بتقول :-

ربنا يخليك لولادك و يوقفلك ولاد الحلال يا رب يا بيه ، هروح اجيب التقرير و اجيلك هوا اوعي تمشي قبل ما اجي أنا مش ضامنه ربنا هيوقعني في واحد عامل ازاي بعدك

هز الظابط رأسه بايجاب و متكلمش و دلال اخدت بعضها و جريت على المستشفى و جابت تقرير انه تم الاعتداء عليها و دفعها و نتيجة الدفعة كانت الكدمة دي اللي دلال مكنتش حاسة بيها أصلا

رجعت للظابط اللي أخدت التقرير كإجراء قانوني و أخد قوه من القسم و أخد دلال معاه و اتحركوا عشان يقبضوا على أم إبراهيم

باااك

و باس يا ستي هو دا اللي حصل لا و حظها بنت اللعيبة ضرب نار بكره الجمعة و بعده السبت اجازة عيد الشرطة

أم دلال بحزن :-

بس حرام يا بنتي ست كبيرة هتتبهدل كدا

دلال بصت لأمها و قامت كلتها بالكلام و هي بتقول:-

وأنا مش حرام عليها تاذيني كل يوم والتاني كدا ؟! ولا مش حرام عليها تطلع كل يوم و التاني تفضي التلاجة ووتنزل ؟!

دا حتي الأكل اللي إنت بتجبيه إنت بتمشي من هنا و هي بتطلع تاكله من هنا !! هي تقدر تعمل كدا مع مرات حسين ولا مصطفى كانوا أهلهم كالوها أكل كدا ، لكن أنا عارفة هي بتستقوي عليا لية عشان غلابة و مش عاوزين نقف في وشها و بنمشي الدنيا لكن دي عاوزة اللي يديها على دماغها عشان تتعدل

أما النطع اللي متجوزاه دا ، سلبي في كل حاجة آخره يقولي أمي تعمل اللي هي عوزاه هعملها اية يعني ؟! بقي أخواته بيعملوا كدا ولا عاملين كرامه لمراتتهم ، أنا بس اللي مرمطون للكل

و التانية اللي نازلة معايرة فيا في الطالعة و النازلة عشان جوزها بيجي يرجعني بعد كل مرة بغضب فيها ؟! دي بتقولي ميقدرش يستغني عن بعدي و خافظلي كرامتي لا كل واحد يقف و يلزم حدوده و يشد خط و يحط نقطة كمان ز نبدأ سطر جديد بقي .

أم دلال خلاص فهمت إن بنتها جابت آخرها من العيلة دي و إن كتر الضغط بيولد الانفجار و بنتها من كتر الضغط و الظلم اللي اتعرضتله انفجرت فيهم كلهم ....

فاقوا الاتنين على صوت رن تلفون دلال اللي كان إبراهيم اللي قال بعد ما فتحت الخط:-

يتبع