الفصل الخامس... ابني لسه صغير مدخلش دنيا

صوت عربيات وشارع

(رامي) وصلنا الحمد لله وهننزل على المشرحة على طول أتمنى لا تتعبي أم أمل عارف المجهود زيادة عليك وكمان الموقف صعب ربنا يكون في عونك

(الأب) بتتكلم مع أم أمل ومتجاهلني تماما ايه هو أنا مش أبوه

(رامي) لا حضرتك ربنا يكون في العون بس القصد هنا إن دى ست وأم يعني الموقف مختلف احنا كرجالة ممكن نتحمل شوية

(الأب) لا أنت إنسان متحيز

(الأم) اسكت ياعديم الإحساس

(الأب) اسكتي أنت يأم لسانين

(أمل) شوفت يأستاذ أصل حضرتك بتقول متحاملة عليهم

(رامي) ميصحش ياجماعة والموقف لا يتحمل يلا انزلي أم أمل وخليك أنت يأمل في العربية

(أمل) لا يأستاذ رامي أمي مش هتقدر تتحمل الموقف لازم أكون جنبها دي أمي

(رامي) تمام يلا بينا

(الأم )تصرخ ابني ابني هو (محمد) هو (محمد) منهم لله اللي قتلوه منهم لله ده لسه صغير ومدخلش دنيا يدخلوه اخرة منهم لله وتصرخ وتنهار تماما

(رامي) اهدي يأم أمل وادعي له بالرحمة خلاص الكلام ده معدش يجي منه اتفضلوا خلاص كده لازم نمشي من هنا

خطوات وغلق باب

(وكيل النيابة) أستاذ رامي يروحوا مكان دلوقت يرتاحوا فيه عشان الموقف الصعب اللي هم فيه وهنبقي ناخد أقوالهم بعدين وهكلف المباحث باستكمال التحريات والبحث عن معاذ لأنه مفقود من ساعتها وربنا يسهل وينتهي الموضوع

(رامي) تمام حضرتك يلا يأمل هاتي ماما وتعالي نريح شوية

(الأم) أنا مش مروحة أنا هقعد جنب ابني لحد ما استلمه ابعدوا كده وأدي قاعدة

(أمل) اسمعي الكلام ياماما مينفعش كده هتقعدي قدام المشرحة تعملي ايه؟

(الأم) روحي أنت أنا مش متحركة من هنا ملكيش دعوة بيا وتعيط وتصرخ

(رامي) يأم أمل مينفعش تعالي أوصلكم وارجع النيابة نكمل الإجراءات عشان تستلميه هي مسألة وقت يلا يأمل هاتي أمك للعربية

(الأب) وأنا أظن مش محتاجيني في حاجة أروح أنا بقى

(الأم) آه يأخويا روح للسنيورة بتاعتك

(أمل) ماما خلاص يلا بينا

صوت عربيات ودوشة شارع

(وكيل النيابة ) بيكلم نفسه القاتل فاكر نفسه ذكي شوه الجثة وحط بطاقة (معاذ) في جيب الجثة وحط كارنيه (محمد) على عتبة الباب أكنه وقع منه وهو بيهرب ومستعجل ومعه محفظة محمد وشوية فلوس ومفاتيح بس القاتل ده دخل ازاي الا إذا كان محمد ومعاذ عرفينه وممكن تتبدل الأدوار ويكون معاذ هو القاتل بس فين معاذ دلوقت وياتري الطرف الثالث هيكون مين نكلف المباحث تعمل التحريات اللازمة ونشوف هنوصل لايه؟

صوت عربيات تتحرك

فون يرن

(وكيل النيابة) يرد أيوة يا رياض بيه( رياض بيه رئيس المباحث) وصلتوا لايه ونتيجة فحص الكاميرات كان ايه؟

(رياض) بيه فيه اثنين خرجوا من الشقة واحد لابس لبس محمد لكن مش محمد وواحد باين من ظهره وكان حريص جدا إن وشه ميظهرش والاثنين خارجين في توقيت واحد ورا بعض من نفس الشقة

(وكيل النيابة) همتك بقي يابطل عاوزين نعرف مين دول وفين معاذ؟

(رياض بيه) حضرتك شوفت تقرير الطب الشرعي

(وكيل النيابة) أيوة شوفته طعنة سكين في القلب مباشرة مات بعدها بثواني وواضح أن القاتل كان قريب منه جدا وأن القتيل مخدش منه خوانة لإن مفيش مقاومة نهائي دورتوا كويس في الشقة

(رياض بيه) دورنا في الشقة ملقناش أي حاجة نتحرك على أساسها مفيش قدامنا غير الكاميرات نحاول نعرف منها المترددين على المكان خلال الأسبوع ده

(وكيل النيابة) تمام يابطل ربنا معكم

فتح باب وخطوات

(الأم) تدخل وتبكي

(سيدة الخادمة) فيه ايه ياستي بتعيطي ليه؟

(أمل) بس ياسيدة ادخلي الوقتي سيبي ستك في حالها

(الأم) لا اله الا الله محمد رسول الله بدل مافرح بيه وازفه عريس ازفه لقبره

(أمل) صلي على النبي ياماما

(الأم) هو فيه ايه يابت أنت مالك باردة كده ليه هو اللي اتقتل ده مش أخوك بردة

(أمل) بصوت عالي يعني عوزاني أعمل ايه مهو لازم حد فينا يبقي هادي عشان نعرف نتصرف

(الأم) تتصرفي في ايه خلاص محمد مات

(أمل) ربنا يرحمه يأمي نفكر بقى في الخطوات اللي جاية

(الأم) خطوات وتفكير قومي امشي من قدامي دانت معندكيش دم

(الخادمة سيدة )هو سي محمد مات ياست أمل

(أمل) أيوة محمد مات

(الخادمة سيدة) ومالك بتقوليها كده اكن اللي مات الكلب بتاعك ولا قطتك دانت لما القطة هربت قعدتي أسبوع من غير أكل لحد مارجعت يالهوي وتصوت

(أمل) اخرصي وامشي ادخلي المطبخ بلاش قرف

(الخادمة سيدة) تكلم نفسها الست أمل بينها مش مصدقة إن أخوها مات جايز مذهولة مهو مش معقول البرود ده كله وأخوها ميت طازة يالهوي دأنا كنت كسرت الدنيا

(أمل) تصرخ فيها بتقولي ايه أبت

(الخادمة سيدة) ولا حاجة ياست أمل وأنا مالي هو أخويا ولا أخوك

(أمل) اعملي ليا شاي

(الخادمة سيدة) قصدك قهوة أصل الناس في الموت بتشرب قهوة

(أمل) غوري من وشي مش عاوزة منك حاجة

الفون يرن

(رامي) أيوة يأستاذة أمل أخبار الوالدة ايه؟

(أمل) الحمد لله كويسة مفيش جديد أستاذ رامي

(رامي) لا لسه المباحث شغالة تحريات وربنا يسهل

(أمل) طيب هنستلم الجثة امتى؟

(رامي)احتمال بكرة بإذن الله

(أمل) شكرا لحضرتك تعبنا حضرتك معنا

(رامي) أنا شايف يأستاذة أمل بلاش تيجي تدريب المكتب اليومين دول وخليك جنب الوالدة

(أمل) حاضر شكرا لحضرتك مرة ثانية

(الأم) مين يأمل؟

(أمل) الأستاذ رامي

(الأم) قالك حاجة

(أمل) لا مفيش جديد

(الأم) يعني ايه مفيش جديد هنستلم أخوك امتي عشان نعمله عزا ويابنتي اكرام الميت دفنه

(أمل) عزا ايه ياماما احنا هندفنه وخلاص والعزا يقتصر على الدفن في المقابر

(الأم) ليه يابنتى ده ابني الوحيد مش كفاية مفرحتش بيه عريس كمان مش عاوزة عزا

(أمل) ياماما الناس كلامها كثير وكل واحد هيقول مات ازاي ويؤلف له حكاية وكلام ملوش لازمة يبقي مفيش داعي لعزا ووجع دماغ

(الأم) خلاص بلاش تحضري أنت العزا أنا هعمل لابني عزا

(أمل) وبابا هيحضر ولا كالعادة قاعد عند الست مراته

(الأم) أنت مالك ومال أبوك كل واحد في حاله

(أمل) ولما الناس تسأل هو مجاش ليه هتقولي ايه؟

(الأم) أنت انسانة رهيبة معندكيش دم ولا إحساس امشي من وشي

(أمل) مهو الحق دايما بيزعل ياست ماما

(الأم) مش قادرة افهم أنت ازاي كده باردة زي لوح الثلج ايه اللي مات ده مش أخوك

(أمل) أخويا بس المفروض أعمل ايه يعني؟

(الأم) تصرخ امشي من وشي امشي

(الخادمة سيدة) معلش ياست هانم شكلها مصدومة ومش مستوعبة واكيد لما تستوعب هتعيط وتصوت كمان ده أخوها الوحيد مش قطتها اللي قعدت تعيط عشانها أسبوع

(الأم) ابعدي من وشي أنت راخرة

(الخادمة سيدة) يعني الحق عليا خيرا تعمل شرا تلقى

(الأم) غوري من وشي

(الخادمة سيدة) حاضر حاضر

باب يغلق صوت شارع ودوشة

(رياض بيه رئيس المباحث) يدخل السلام عليكم ورحمة الله وبركاته

(وكيل النيابة ) وعليكم السلام ورحمة الله وبركاته خير اتمني تكونوا وصلتوا لحاجة

(رئيس المباحث) فعلا الحمد لله

(وكيل النيابة ) تمام هات ماعندك

(رئيس المباحث) فرغنا الكاميرات لمدة شهر مش يوم الحادث فقط لقينا حاجة غريبة

(الوكيل) لقيتوا ايه؟

(رئيس المباحث) لقينا فيه واحدة بتتردد على الشقة كانت لابسة ايشارب بتحرص على أنها تدارى وشها وهي داخلة خلال الشهر لاحظنا ترددها يومين في الأسبوع خلال الشهر ده

(النيابة) عرفتوا هي مين ولا لسه؟