الفصل الرابع ...... جاحدة زي أبوها

(رامي) أنا بعتبر الأنسة أمل زي بنتي عشان كده وجودي معها النهاردة إنساني اكثر منه شغل وقضية

(وكيل النيابة) سبحان الله الفرق كبير بين أب وأب

(رامي) حضرتك تقصد ايه

(وكيل النيابة) لا أبدا اتفضل أستاذ رامي أستاذة أمل اسمك وسنك وعنوانك

(أمل) اسمي أمل محمود سالم سني 21 سنة عنواني شارع المحور عمارة الزامك نمرة 5

(وكيل النيابة) ايه معلوماتك عن قتل أخوك محمد لصديقه معاذ؟

(أمل) معلومات ايه حضرتك أنا معرفش حاجة خالص

(وكيل النيابة) من أولها بتنكري

(رامي) بالراحة يافندم أمل فعلا متعرفش حاجة

(وكيل النيابة) أستاذ رامي أنا سمحت لحضرتك بالحضور بشكل ودي فلو سمحت لا تتدخل في الحوار

(رامي) حاضر يافندم وشاكر افضالكم بس بالراحة يافندم أمل صغيرة ومخضوضة والمتهم يبقي أخوها الوحيد

(وكيل النيابة) عشان كده بسألها لأنها اخته الوحيدة يبقى من المنطقي يلجأ لها وتخبيه

(أمل) تصرخ لا والله مشوفته ولا أعرف عنه حاجة الا لما الضابط جه وفتش البيت وهو اللي قالنا

الباب يخبط ويدخل (العسكري) أسف يافندم بس فيه واحدة برة بتقول انها

(أم معاذ) ومصممة تقابل حضرتك فورا وبتقول فيه حاجة خطيرة متستناش خالص

(وكيل النيابة) دخلها ياعسكري

أستاذ رامي خد الانسة أمل واستنوا برة شوية

(رامي) حاضر يافندم يلا يأمل

(أم معاذ) السلام عليكم ورحمة الله وبركاته

(وكيل النيابة) اتفضلي ارتاحي البقاء والدوام لله خير ايه الأمر المهم اللي ميستناش

(أم معاذ) البقاء والدوام لله بس ابني عايش ممتش

(وكيل النيابة) ازاي والجثة اللي لقيناها دي

(أم معاذ) مش ابني

(وكيل النيابة) وعرفتي منين استني افتح يابني محضر رسمي ناخد أقوالها اسمك وسنك وعنوانك

(أم معاذ) رابحة عبد العزيز 55 سنة ساكنة في نفس شارع أم أمل

(وكيل النيابة) اسم الشارع يامدام

(أم معاذ) شارع المحور عمارة محمود البدوي نمرة 10

(وكيل النيابة) ازاي عرفتي إن الجثة مش لابنك مع أن الطب الشرعي قال إن الوجه مشوه تماما ومفيش فيه أي ملامح وليه متأكدة أن ابنك لسه عايش ومش هو القتيل؟

(أم معاذ) أنا روحت المشرحة عشان أشوف الجثة وأول حاجة لمحتها رجليه وهم بيخرجوا الجثة من الثلاجة

(وكيل النيابة) وضحي أكثر مش فاهم حاجة

(أم معاذ) رجل الجثة اليمين فيها 6 صوابع مش خامسة زي كل الناس وأنا ابني مفيش في رجله صابع سادس وكمان فيه حاجة ثانية مع إني اتاكدت خلاص إنها مش جثة ابني

(وكيل النيابة) ايه ثاني؟

(أم معاذ) تحت باطه الشمال وحمة كبيرة وابني معندوش وحمة تحت باطه

(وكيل النيابة) يعني أنت متأكدة إن الجثة مش ابنك

(أم معاذ) لا الحمد لله ابني لسه عايش

(وكيل النيابة) وقعي على اقوالك واتفضلي مع السلامة وإذا معاذ ابنك طلبك كلمينا علي طول عشان ناخد أقواله.

(أم معاذ) حاضر يافندم

(وكيل النيابة) نادي على أمل سالم يا عسكري

صوت خطوات وباب يفتح

(العسكري) أمل سالم

(أمل) أيوة يافندم

(وكيل النيابة) الدنيا اتلخبطت الجثة مش لمعاذ أمه أكدت ذلك

(رامي) امال لمين يافندم؟

(وكيل النيابة) لسه هنشوف أنسة أمل انت تعرفي معاذ كويس

(أمل) اأوة يافندم

(وكيل النيابة) هل معاذ فيه علامة مميزة في جسمه

(رامي) وهي أمل هتعرف منين يافندم ده صاحب اخوها

(وكيل النيابة) أيوة بس قالت انهم متربين مع بعض من صغرهم يعنى كانوا وهم أطفال بيلعبوا مع بعض أو نزلوا البحر في مصيف مع بعض حاجة زي كده يعني

(أمل) حضرتك تقصد علامة مميزة زي ايه مثلا

(وكيل النيابة) صباع سادس في رجله مثلا

(أمل) تصرخ أخويا ويغمى عليها

(وكيل النيابة) ياعسكري هات ميه وشوف واحدة من الاداريات تيجي تفوق الأستاذة

(وكيل النيابة) حمدالله على سلامتك أستاذة أمل بس عاوز أعرف فيه أيه خلاك تصرخي ويغمى عليك

(أمل) أخويا (محمد) في رجله ست صوابع فيه صابع زيادة حاولنا نشيله جراحيا بس لحكمة لا يعلمها الا الله كان ينمو ثاني ويطلع الصابع السادس

(وكيل النيابة) معني الكلام ده إن الجثة لمحمد مش معاذ ومفيش علامات ثانية في جسم أخوك انسة أمل وحمة مثلا جرح من صغره ترك أثر

(أمل) فيه يافندم وحمة تحت باطه كبيرة على شكل نجمة

(وكيل النيابة) تمام وقعي على اقولك ومن فضلك أستاذ رامي خد الأنسة أمل ترتاح وهديها لأن كده مسار القضية اتغير 360 درجة

باب يفتح

(الأم) مالك يأمل فيه ايه وشك مخطوف ليه كده فيه يابنتي لقوا أخوك

(أمل) أيوة لقوه لقوه وتعيط وتصرخ

(الأم) الحمد لله

(أمل) فين بابا؟

(الأم) راح للسكرتيرة بتاعته

(أمل) كفاية بقى محمد مات محمد مات

(الأم) تصرخ وتسقط أرضا مغشيا عليها

(رامي) ليه كده يأمل كنت قاسية قوي على أمك

(أمل) يأستاذ رامي هي وبابا ملهمش شغلة غير نفسهم والخيانة اللي بينهم لكن أنا ومحمد آخر اهتماماتهم

(رامي) طيب اهدي عشان نشوف هنعمل ايه؟

(العسكري) أستاذ رامي الباشا وكيل النيابة عاوز حضرتك

(رامي) حاضر حاضر استني يأمل مع أمك هنا وبلاش يابنتى تزوديها عليها دي أم بردة وأنا هشوف المطلوب ايه وارجع لك

(أمل) حاضر يأستاذ رامي

(الأم) حرام عليك يأمل أنا بردة مش مهتمة بيك وبأخوك أمال مين يابنتى كان بينزل يشتغل شغلتين في اليوم عشان لا تتحوجوا لحد وملاليم النفقة بتاعة أبوك كانت بتقضي طلباتك وطلبات أخوك دانا كنت برجع من المدرسة اعملكم لقمة على السريع واجري قبل ما ارتاح على سنتر الدروس ادي كام حصة وارجع جري اسهر على طلباتكم ومكنتش مخلياكم محتاجين مليم من حد أحسن لبس كان لكم أحسن أكل لكم مصاريف مدارس وكليات ومصيف عاوزة ايه ثاني؟

(أمل) يعني سمعتينا أمال كان مغمي عليك ازاى؟

(الأم) حرام عليك مصيرك تتجوزي وتعرفي ازاي تفني عمرك مع إنسان خاين

(أمل) ودي بقت كل مشكلتك لكن أنا وأخويا نغور في داهية أكل ايه ولبس ايه اللي بتكلمي عنه مهي القطط والكلاب بياكلوا في الشوارع لكن فين مشاعرنا فين احتياجاتنا النفسية ملهاش قيمة عندك ولا عند بابا أنتم أنانيين معملتوش حسابنا في حياتكم وقفتوا قصاد بعض بهدلتوا بعض في المحاكم واحنا ملناش ذنب في عمايلكم دي

(الأم) حرام يأمل اتقي الله فيا

(أمل) وأنا وأخويا مين يتقي الله فينا

(رامي) خلاص يابنتي اتصلي بأبوك عشان نروح مع النيابة لمعاينة الجثة

(الأم) ميعرفوش يأستاذ رامي مشفوش من عشر سنين هيعرف شكله ازاي

(رامي) أصلا الجثة مشوهة الوجه احنا هنشوف العلامات المميزة في جسمه

(الأم) أنا اللي أعرفها مش هو

(رامي) الأمر هيبقي صعب على حضرتك والأب لازم يكون موجود دي القوانين عموما هستأذن لحضرتك تكوني موجودة بس المشوار بعيد على حضرتك شرم سفر مدة طويلة وحضرتك تعبانة في النيابة من الصبح

(الأم) لا أنا كويسة وهاجي أودع ابني واخده في حضني لآخر مرة

(أمل) مش كنتي أخدتيه وهو حي افضل حاجة غريبة والله دلوقت عرفتي قيمته وهو ميت

(رامي) كفاية يأمل أنا معرفش انك قاسية قوي كده

(الأم) طالعة لأبوها جاحدة زيه

(رامي) خلاص ياجماعة خلاص يلاه نركب العربية