الفصل الثاني

لقد أصبحتُ الشريرة؟!

....

"يا له من كاتب مستفز!"

أغلقت نورا الهاتف بعنف حتى كادت الشاشة تنكسر، ثم رمتْه فوق الفراش وهي تزفر بضيق.

ــ مستحيل... مستحيل دي تبقى النهاية!

مدت يدها من جديد، التقطت الهاتف، وعادت تقرأ آخر سطور الفصل وكأنها تأمل أن تتغير الكلمات.

لكنها كانت كما هي.

إعدام.

خيانة.

وظلم.

وضاعت حياة البطلة دون أن تنتقم ممن دمروها.

ضغطت على الهاتف بعصبية.

ــ ولي العهد ده زبالة... وابنة عمها أوسخ منه.

لو كنت مكانها...

والله ما كنت سبتهم يعيشوا يوم واحد مرتاحين.

جلست وهي تعقد ذراعيها.

ــ يعني إيه واحدة تثق في أقرب الناس ليها بالشكل ده؟

معقول ما خدتش بالها إن بنت عمها بتخونها؟

لا...

أنا كنت هعرف.

كنت هكشفهم واحد واحد.

وكنت أخليهم يندموا إنهم فكروا يلعبوا بيا.

ظلت تتمتم بغضب حتى سمعت صوت والدتها من الخارج.

"نورا...!"

ــ نعم يا ماما؟

"السكر خلص... انزلي هاتيه من السوبر ماركت."

نفخت بضيق.

ــ حاضر.

ارتدت سترتها على عجل، وأخذت محفظتها وهاتفها، ثم خرجت من المنزل وهي لا تزال غاضبة.

كانت تتمشى في الشارع وهي تحدث نفسها.

ــ بجد الكاتب ده مستفز.

هو كان هيخسر إيه لو خلاها تنتقم الأول؟

كل الرواية وهي بتحب الغلط.

وفي الآخر...

تموت وخلاص!

هزت رأسها.

ــ غبية...

والله غبية.

لو كنت مكانها كنت أول حاجة عملتها...

فسخت الخطوبة.

وبعدين...

تجوزت أي حد يجنن ولي العهد.

ابتسمت فجأة.

ــ لا...

مش أي حد.

الدوق.

هو الوحيد اللي كان يقدر يحميها.

وقفت أمام إشارة المرور تنتظر الضوء الأخضر.

وما إن تحركت...

حتى سمعت صرخة عالية.

"حاسبي!"

التفتت.

رأت شاحنة ضخمة تندفع بسرعة جنونية نحوها.

اتسعت عيناها.

تجمد جسدها.

كل شيء حدث في ثوانٍ.

صوت الفرامل.

صراخ الناس.

ثم...

اصطدام عنيف.

---

شعرت وكأنها تغرق في بحر بلا نهاية.

لا تدري كم مر من الوقت.

ثوانٍ؟

أيام؟

سنوات؟

ثم بدأ صوت خافت يصل إلى أذنيها.

"آنستي..."

صوت امرأة.

"آنسة أريانا..."

عبست نورا وهي تحاول فتح عينيها.

ــ أريانا مين؟

أنا نورا...

لكن الكلمات خرجت همسًا ضعيفًا.

سمعت شهقة قريبة.

"الحمد للإمبراطور... لقد استيقظت!"

فتحت عينيها ببطء.

سقف مرتفع مزين برسومات ذهبية.

ثريا كريستالية تتدلى فوقها.

ستائر حريرية تتحرك مع نسيم خفيف.

رمشت عدة مرات.

ــ أنا... فين؟

اقتربت منها خادمة ترتدي زيًا كلاسيكيًا وانحنت باحترام.

ــ هل تشعرين بتحسن يا آنسة أريانا؟

تجمدت.

ــ إيه...؟

ابتسمت الخادمة بسعادة.

ــ أقلقتِنا كثيرًا بعد أن سقطتِ مغشيًا عليكِ.

همست نورا:

ــ استني...

إنتِ قلتي اسم إيه؟

ــ الآنسة أريانا وينترفيل.

اتسعت عيناها.

شعرت بقشعريرة تسري في جسدها كله.

هزت رأسها بسرعة.

ــ لا...

لا...

ده أكيد حلم.

قفزت من السرير رغم دوارها.

ثم ركضت نحو المرآة الضخمة.

توقفت أمامها.

حبست أنفاسها.

وفي انعكاس المرآة...

لم تر وجهها.

بل رأت فتاة ذات شعر فضي طويل، وعينين بلون الياقوت الأزرق، وملامح جميلة بشكل يكاد يكون غير واقعي.

رفعت يدها.

انعكاس المرآة فعل الشيء نفسه.

لمست وجهها.

والفتاة أمامها لمست وجهها أيضًا.

تراجعت خطوة.

ثم أخرى.

ــ لا...

مستحيل...

أنا...

أنا بقيت...

أريانا؟!

في تلك اللحظة، اندفعت الخادمة نحوها وهي تحمل صندوقًا مخمليًا.

ــ آنستي، لقد وصل هذا منذ قليل من القصر الإمبراطوري.

عبست نورا.

ــ إيه ده؟

فتحت الخادمة الصندوق.

وفي داخله...

خاتم ضخم مرصع بالألماس.

ورسالة مختومة بالختم الملكي.

التقطتها نورا بيد مرتجفة.

فتحتها بسرعة.

ولم يكن بداخلها سوى سطر واحد.

"أشتقت إليكطيبتي العزيزة... سأزورك غدًا."

ولي العهد سيدريك.

تجمدت في مكانها.

ثم همست بصوت مرتجف:

"بكرة...؟!"

وسقطت الرسالة من بين أصابعها، بينما كانت تتذكر بوضوح النهاية التي قرأتها...

"بعد عام واحد... سيقف هذا الرجل نفسه ليشاهد إعدامها دون أن يرمش."

...

فضلت نورا واقفة قدام المراية، ملامحها شاحبة، وإيديها بترتعش.

بصت لانعكاسها مرة... واتنين... وتلاتة.

وبعدين ضربت خدها بخفة.

ــ آه!

ضربته تاني.

ــ آه!

غمضت عينيها وهي بتتمتم.

ــ لا... ده حلم... أكيد حلم.

سمعت صوت الخادمة وراها.

ــ آنستي... حضرتك كويسة؟

لفت لها بسرعة.

ــ إنتِ... اسمك إيه؟

الخادمة استغربت.

ــ أنا روز يا آنستي.

ــ روز... قوليلي... أنا مين؟

شهقت روز.

ــ آنستي! حضرتك بتهزري؟

ــ ردي عليا!

ــ حضرتك الليدي أريانا وينترفيل... ابنة دوق وينترفيل.

نورا حطت إيديها على راسها.

ــ يا نهار أبيض...

يعني أنا بجد...

دخلت الرواية؟!

بصت حواليها بسرعة.

الأوضة...

السرير...

الستاير...

كل حاجة هي نفسها اللي كانت متوصفة في الرواية.

همست وهي حاسة إن قلبها هيقف.

ــ لا...

أنا بقيت الشريرة بجد!

وفجأة افتكرت.

ــ استني...

أنا في أي وقت من الأحداث؟

بصت بسرعة للخادمة.

ــ روز... إحنا في شهر كام؟

استغربت الخادمة السؤال.

ــ شهر الربيع يا آنستي.

ــ لا... أقصد...

أنا مخطوبة من قد إيه؟

ابتسمت روز.

ــ بقالها سنتين تقريبًا.

ابتلعت نورا ريقها.

ــ ولسه... لسه متحددش ميعاد الجواز؟

ــ لا يا آنستي... بس الكل بيقول إنه قريب.

وقعت على الكنبة وهي حاطة إيديها على قلبها.

ــ الحمد لله...

لسه فيه وقت.

لسه ما اتسجنتش.

لسه عيلتي عايشة.

لسه أقدر أغير كل حاجة.

ابتسمت لأول مرة.

ــ يعني...

أنا قدامي سنة كاملة.

سنة واحدة بس.

أمنع الإعدام.

أنقذ بابا وماما.

وأبعد عن الزبالة ده.

قاطعتها روز.

ــ آنستي؟

ــ نعم؟

ــ حضرتك بتكلمي مين؟

اتعدلت بسرعة.

ــ ولا حاجة... كنت بكلم نفسي.

بصت للرسالة اللي كانت واقعة على الأرض.

التقطتها.

وقرتها تاني.

"اشتقت إليكِ، خطيبتي العزيزة... سأزورك غدًا."

ضحكت بسخرية.

ــ اشتقتلي؟

إنت لو شوفتني دلوقتي هتتمنى إني اختفي.

مزقت الرسالة نصين.

ثم رمتها في المدفأة.

وقفت روز بفزع.

ــ آنستي!

دي رسالة من سمو ولي العهد!

ــ وعادي.

ــ لو عرف إن حضرتك حرقتيها...

رفعِت كتفها بلا مبالاة.

ــ يعمل اللي يعمله.

أنا أصلًا مش ناوية أكمل الخطوبة دي.

شهقت روز.

ــ إيه؟!

حضرتك بتحبيه من وإنتِ صغيرة!

ده حضرتك كنتِ...

قاطعتها بسرعة.

ــ كنت.

إنما دلوقتي...

لا.

بصتلها روز كأنها أول مرة تشوفها.

ــ آنستي... حضرتك مخوفاني.

ضحكت نورا.

ــ وأنا كمان.

أنا مخوفة نفسي.

قربت من الشباك.

وبصت على الحديقة الواسعة.

ثم افتكرت حاجة خلت ابتسامتها تختفي.

ــ الدوق...

همست بالاسم وكأنها بتفتش في ذاكرتها.

ــ لوسيان أشفورد.

أغمضت عينيها.

في الرواية...

كان بيظهر بعد كام شهر.

ولحد الوقت ده...

كان مرضه بيسوء كل يوم.

ولو الأحداث مشت زي الرواية...

هيبدأ أول انهيار حقيقي للمانا بعد أسابيع قليلة.

فتحت عينيها بسرعة.

ــ لا...

لازم أوصل له قبلها.

بس...

إزاي؟

وأنا أصلًا مخطوبة لولي العهد.

وفي اللحظة دي...

سمعت طرقات قوية على باب الأوضة.

دخل كبير الخدم بسرعة، وكان واضح عليه التوتر.

انحنى باحترام وقال:

ــ آنستي...

سمو ولي العهد موجود تحت.

اتسعت عيناها.

ــ إيه؟!

ــ سموه وصل حالًا...

وبيطلب يقابلك.

همست لنفسها وهي حاسة إن قلبها بيدق بعنف.

ــ الرواية قالت إنه هيجي بكرة...

إزاي جه النهارده؟

رفعت رأسها ببطء.

وأدركت لأول مرة...

إن الأحداث بدأت تتغير.

يتبع...