Chapter 2

TWO WEEKS LATER.

Nasa loob ng isang suite ng mamahaling hotel si Cataleya. Nakaupo siya sa couch na naroon habang nagba-browse sa social media account niya gamit ang cellphone. Nakasuot siya ng isang roba na nagtatago sa katawan niya na nakasuot ng sexy lingerie. Iyon ang gabi ng kabayaran. Suot pa rin niya ang eye glasses na iniingatan niya.

Biglang nakita niya ang account ng kakambal niyang si Claudia. May pagka-pribadong tao ang kapatid niya dahil wala itong masyadong post o picture nito. Ngayong araw ang kasal ng twin sister niya sa matagal na nitong nobyo. Katulad nito ay galing din ang napangasawa sa mayamang angkan na may malalaking negosyo.

Wala naman siyang interest na malaman pa ang ibang parte ng buhay ng kapatid. Hindi na nga niya inalam ang pangalan ng mapapangasawa nito. Alam niya na wala siyang karapatang ituring iyon na bayaw. Si Claudia nga ay mabigat ang dugo sa kanya na ituring siyang kapatid.

Ang malaking agwat ng pamumuhay nila ang humahadlang para ganap na magtagpo ang iisang dugo na nanalaytay sa kanila. Isang limitasyon na ibinigay sa tadhana nilang dalawa.

Kung nabubuhay pa marahil ang kanyang amang si Guillermo, siguro ipapamukha at magpapasalamat dito si Claudia sa ginawang pagbenta dito sa mayamang pamilya. Na hindi nagkamali ang tatay niya sa desisyon nito kapalit ang panandaliang pangtustos sa hirap ng buhay.

At siya na naiwang anak ng mga magulang niya ay kasama niyang namuhay sa kahirapan ang mga ito. Nakikisaka lang lupa ng isang mayamang pamilya sa probinsyang pinagmulan nila ang ama niya. Ang ina niyang si Corazon ay namamasukang katulong.

Ang malaking dahilan kung bakit nagpursige siya sa buhay. Pinag-aral niya ang sarili sa pagpasok sa iba’t ibang uri ng trabaho. Noong mga panahong iyon ay hindi niya alam na mayroon pala siya nawawalang kakambal na kapatid. Buong buhay niya ay akala niya ay solong anak lang siya ng mag-asawang Domingo.

Pagka-graduate niya ng college ay nagkaroon ng munting selebrasyon sa kanilang bahay. Nalasing ang tatay niya at hindi sinasadyang inamin nito ang ginawang pagbibenta sa kakambal niya noong sanggol pa sila. Ang akala ng ina niya ay namatay ang kapatid niya na naunang lumabas sa kanya.

Nagkaroon ng tensyon sa mga magulang niya noon. Salamat na lang dahil nagawa niyang pakalmahin ang sariling ina. Kinabukasan, hindi itinatwa ng ama ang sinabi nito noong nagdaang gabi.

Nalulungkot man siya sa mga nalaman pero kailangan niyang magpatuloy sa buhay. Nag-apply siya ng trabaho sa mga company sa siyudad. Sa tulong ng internet ay nagawa niya iyon. Pursigido siyang makipagsapalaran para maiahon ang pamilya niya sa kahirapan. 

Dalawang araw bago siya lumuwas ng Maynila, biglang inatake sa puso si Guillermo hanggang sa namatay ito. Hindi na niya nakausap ng ina sa huling sandali sa mundo.

Dalawang linggo pagkalibing sa ama ay nagpasya na siyang magtungo ng Maynila. Isinama na niya ang kanyang ina dahil ayaw na niyang maiwan ito sa probinsyang kinalakihan.

Hindi naging madali ang buhay para sa kanilang mag-ina sa siyudad. Matinding pagtitiis ang ginawa nila dahil sa hirap. Nahirapan siyang maghanap ng trabaho at kung saan-saan sila nanirahan dahil napalayas pa sa inupahang boarding house. Makalipas ang tatlong buwan ay natanggap na siya sa trabaho hanggang sa maging regular na empleyado. Ngunit namatay ang ina niyang si Corazon dahil sa hit and run. Nasagasaan ng isang rumaragasang sasakyan.

Nang gabi bago ito maaksidente ay nakiusap ito sa kanya na hanapin ang nawawalang kakambal kapag may pagkakataon. Hindi inaasahan ang pagtatagpo nila ni Claudia sa isang event ng company nila noon. Pareho silang nagulat noon dahil sa malaking pagkakamukha nila sa isa’t isa. At inamin na nga nito sa kanya na adopted ito ng mayamang magulang na kinagisnan. Ang marahil ay pinagbentahan ng kanyang ama dito noong sanggol pa sila.

Hindi siya nito tinanggap bilang kapatid. Nagtanim pa ito ng galit sa mga yumaong mga magulang. At ang pagkikita nilang iyon ay ipinangako ni Claudia na una at huli na.

The rest was history.

Ang pagtunong ng messaging apps sa cellphone niya ang nagpabalik sa diwa niya sa kasalukuyan. Isang mensahe mula kay Claudia ang natanggap niya. kaagad niya iyong binasa.

Be ready. On the way na kami d’yan. Alam mo na ang gagawin.

Nag-reply naman siya ng ‘okay’ sa estranged twin sister niya. Tumayo na siya mula sa pagkakaupo niya sa couch. Nagtungo na siya sa bathroom ng suite na kinaroroonan niya.

Ito na nga ang pagsasagawa ng plano niya para sa gabing iyon.

Makalipas ang mahigit kalahating minuto, bumukas ang pinto ng bathroom. Pumasok doon ang kakambal niyang si Claudia. Napatayo siya sa paglapit nito sa kanya. Kanina pa siya nakaupo sa nakatakip na bowl.

“Kambal nga talaga tayo Cataleya, sayang nga lamang at hindi kita kayang ituring na kapatid.” Hinaplos nito ang nakalugay niyang buhok na kagaya rin nito. “Anyway, ready ka na ba?”

Tumango siya. “Matagal ko nang inihanda ang sarili ko pabor na hiningi mo sa akin kapalit ang malaking halaga. Kung hindi nga lang ako makukulong ay never kong tatanggapin ang gusto mong mangyari.”

“Sa gabing ito, isipin mo na ikaw ay ako,” walang emosyong sabi nito. “Handa kong ipaubaya sa’yo ng ilang oras ang asawa ko, basta mapatunayan ko sa kanya na ako na buo pa rin ang pagkakababae ko.”

May pagka-conservative ang napangasawa ni Claudia at lingid sa lalaki na hindi na virgin ang kapatid. Kinailangan ng kakambal niya ang tulong niya sa honeymoon ng mga ito sa gabing iyon. At ang virginity ang kapalit sa tulong na ibinigay nito sa kanya.

“Huwag kang mag-alala, after this night ay hindi mo na ako makikita pa,” saad niya. May lihim siyang inggit na nadama sa kakambal niya. Bahagi iyon ng napagkasunduan nila.

Inalis niya ang suot na salamin sa mata.Sa sumunod na sandali ay lumabas na siya ng bathroom at naiwan sa loob si Claudia. Pansamantala ay gagamapanan muna niya ang pagkatao nito. Ginaya niya kung paano maglakad ang kapatid na natutunan niya sa ginawang orientation sa kanya. 

Sa blurred na paningin niya, naaninaw na niya ang bulto napangasawa nito na nakatayo sa may paanan ng malaki at malambot na kama. Sinadya niyang hindi magsuot ng contact lense dahil ayaw niyang malinaw na makita ang mukha ng lalaking pag-aalayan niya ng sarili. Ang sobrang liwanag na nakikita niya ang nagsisilbing gabay niya. Isa siya ngayong substitute wife. Si Claudia muna siya ngayon. 

“You’re already here my wife,” anito pagkalapit niya dito. “Akala ko ay susundan na kita sa bathroom para sa love making natin.”

Mahina siyang napatawa na katono ng kay Claudia. Aral din ang intonasyon niya sa pagsasalita. “Ikaw talaga hon, pasensya na kung natagalan ako. Ikaw kasi ang una at huling lalaki na pag-aalayan ko ng sarili ko, kaya pinaghandaan ko. Pasensya na kung natagalan ako.”

Mahina itong napatawa. Halatang napaniwala niya ito na siya si Claudia. Hindi man niya malinaw na napagmamasdan ang asawa ng kapatid pero alam niya na may taglay na  kakisigan at katikasan ito. May kung anong kakaibang init ang nabuhay sa katawan niya sa isiping iyon.

Bahagya pa siyang nagulat nang biglang hapitin nito sa baywang niya. Lalo pang nagkadaiti ang kanilang mga katawan. Sa una’y nagtama ang kanilang mga mata hanggang sa naglapat naman ang kanilang mga labi. Unang pagkakataon na maranasan niya ang isang marubdod at maalab na halik.

Sa mga turo ng kakambal niya ay sinunod niya ang pagtugon sa mainit na halik na asawa nito. Umangla ang mga kamay niya sa batok ng lalaki. Naramdaman na lang niya ang pag-angat ng katawan niya sa ere. Namalayan na lang niya na pinangko siya nito saka marahan siyang ibinaba sa kama.

Iyon na nga ang honeymoon kung saan ay isa siyang substitute wife na kanyang kakambal. Ang kabayaran sa ginawang pagtulong sa kanya ng kapatid.