KABANATA ~ 2

Hannah's POV:

"Hay naku, Kaius. Palaging ganyan ang batang yan. Palagi na lang palpak!" Bumaling sa akin si nanay at pinandilatan ako. "O, ano, hindi ka pa talaga kikilos? Damputin mo na yan bago pa marumihan!" turo niya sa bigas na nasa sahig. "Ang tanga-tanga mo talaga! Hay naku, ano na lang ba ang silbi mo sa bahay na ito?"

"S-sorry po, nay." Dadamputin ko na sana ang natapong bigas nang bigla akong hawakan ni Tito Kaius sa braso.

Naramdaman ko na lang na parang may kuryente na bigla na lang dumaloy mula sa kamay n'ya papunta sa katawan ko. Ano bang klaseng pakiramdam ito, kinikilig lang ba ako?

"Huwag mo nang pulutin, bibili na lang ako ng bago," sabi niya sa akin. Paalis na sana siya nang pigilan siya ni nanay.

"Bakit ikaw pa ang bibili? Hayaan mo yang batang yan."

Nang marinig ko iyon ay kinuha ko na ang kalderong pagsasalinan ko at umiskwat na para simulan ang pagpupulot.

"Kaius, ano kaya kung sa labas na lang tayo kumain?" suhestiyon ni nanay.

Nang tingalain ko siya ay nakita ko ang paghawak niya sa kamay ni Tito Kaius habang sini-swing pa iyon. Parang gusto kong masuya. Ano ba itong nanay ko, 44 anyos na pero nagfi-feeling teenager pa.

"Sige." Yumuko sa akin si Tito Kaius. "Hannah, magbibihis ka pa ba, o ganyan ka na lang?"

Natigilan ako sa sinabi niya. Isasama nila ako? Matutuwa na sana ako dahil napakadalang na makaranas akong kumain sa labas, dahil sa kawalan namin sa buhay. Ngayon ay makakatikim na rin ako ng masarap na pagkain. Pero bigla namang kumontra si nanay.

"Ano? Isasama mo pa ito? Huwag na."

"E, ano ang kakainin nitong anak mo, kung hindi natin siya isasama?"

"Ayan." Itinuro ni nanay ang nagkalat na bigas sa sahig. "Isaing mo na lang yan Hannah, at kasalanan mo naman kung bakit natapon yan. May natira pang sardinas kagabi, iulam mo na yun bago pa masira."

Ang lupit naman. Sila kakain sa labas, tapos ako, sardinas na natira pa kagabi lang ang ulam? Lagpas ala-una na ngayon ng hapon, baka may bula na 'yon?

Magsasalita pa sana si Tito Kaius pero hinila na s'ya ni nanay sa labas. Biglang tumahimik ang bahay dahil naiwan akong mag-isa.

Bumuntung-hininga na lang ako at ipinagpatuloy na ang pagpupulot sa bigas. Bibilisan ko na at nang maisaing ko na ito, nagugutom na rin ako dahil wala din akong almusal. Hinintay ko kasing magising si nanay kanina para makakain, pero tanghali na siya bumangon. Paggising naman n'ya ay hindi din siya nag-almusal. Naligo lang siya at nag-make up tapos nagmamadaling umalis. Yun naman pala ay lalaki na naman ang aatupagin niya.

Simula ata nang magkaisip ako ay ganito na ang routine ng nanay ko, para siyang dalaga kung mag-aasta. Iba-iba din ang mga lalaking dinadala n'ya dito sa bahay kada buwan, kaya sanay na ako. Pero masasabi kong ngayon lang siya naka-jackpot ng bata-bata pa, dahil mukhang nasa trenta lang si Tito Kaius. Kaya nga hindi ko kaagad naisip na may relasyon sila.

Hay... Parang gusto kong mainggit kay nanay, ah. Napakagwapo naman kasi ng bago niya at ang bango-bango pa. Pero nakapanghihinayang lang kung hanggang isang buwan lang sila.

Chineck ko muna yung sardinas bago ko kainin. Mabuti na lang at hindi pa naman panis, kung hindi ay baka magdildil na naman ako ng asin.

Matapos kumain ay nag-review na ako. Inilatag ko sa lamesa ang mga lukot-lukot at may mantsa pa ng kape na reviewers ko para sa Housekeeping NC II. Kailangan ko itong maisaulo para masigurong makapapasa ako, kung hindi ay masasayang lang ang pagpasok ko ng dalawang buwan.

Dito sa pag-aaral ko nakasalalay ang magandang buhay naming mag-ina kaya kailangan kong pag-igihan. Pasasaan ba't makakaraos din kami sa ganitong hirap ng buhay. Gusto ko na rin kasing paalisin si nanay sa pinagtatrabahuhan niyang bar, eh. May mga naririnig kasi akong hindi magaganda tungkol sa kanya dahil sa pagtatrabaho niya doon.

Gabi na nang umuwi si nanay, at mukha siyang napagod sa pamamasyal.

"Oh." Inihagis n'ya sa mesa ang isang styro ng pagkain. "Uwian daw kita sabi ni Kaius."

Pagpasok ni nanay ng kuwarto ay agad kong binulatlat ang styro, at naglaway ako nang makita ko ang nasa loob. Wow! Lechon! Bukod sa lechon ay meron ding shanghai, at pancit. Wow! Birthday ko ba? Parang birthday ko, ah, kasi sa mga handaan lang ako nakakain ng mga ganito. Mabuti na lang at ako lang ang kumain kanina kaya marami pang natirang kanin. Makakain na nga!

Bihira akong ganahan at makaramdam ng ganitong kasiyahan sa pagkain, kaya masasabi kong, si Tito Kaius na ata ang pinaka nagustuhan ko sa naging jowa ni nanay. Sana nga lang tlaga ay magtagal sila.