KABANATA ~ 1

Hannah's POV

"Hannah!"

Napabalikwas ako ng gising sa malakas na pagtawag ni nanay sa 'kin. Tiningnan ko ang oras sa cellphone ko, ala-una na pala ng hapon. Pupungas-pungas pa ako nang bumangon ako at lumabas ng kuwarto. Wala akong pakialam kahit nakasabog pa ang buhok ko, o kahit may panis na laway pa ako. Kami lang namang dalawa ni nanay ang nandito sa bahay, eh.

Pero natigilan ako nang sumalubong sa paningin ko ang isang guwapong lalaki na nakaupo sa luma naming sofa. Nakangiti siya sa akin.

"Hi Hannah," bati niya.

Bigla ko na lang naayos ang damit ko, parang kusa na lang umangat ang mga kamay ko para suklayin ang magulo kong buhok. Wala din sa loob kong napunasan ang paligid ng bibig ko dahil baka may panis na laway pa ako.

Nakakahiya! Sino ba ang lalaking ito at bigla na lang sumulpot dito sa bahay namin? Ang sarap naman sa mata ng kakisigan niya. Para siyang may lahi, yung parang Mexicano? Para siyang yung mga karakter na nakikita ko sa mga pocketbooks ni nanay. Sa suot nyang brown na polo shirt at relo, mukha s'yang may kaya sa buhay.

Napayuko ako. Hindi ko siya nagawang batiin pabalik kasi nahihiya ako. Ang gwapo naman kasi, eh.

"Nak ng putsa, bakit walang kanin? Hindi ka nagsaing?!" dinig kong reklamo ni nanay. Nagkakalantugan ang mga kaldero sa paghahalungkat n'ya. Sa tono at lakas ng boses niya, alam kong galit na naman siya. "Bakit walang pagkain?!" aniya paglapit niya.

Napasulyap muna ako sa lalaki bago sagutin ang tanong niya. "E, nay, sinabi ko naman po sa inyo na wala na po tayong bigas, eh."

Pumamewang siya. "Sinabi mo? Kailan?"

"Kanina po, bago kayo umalis. Hindi niyo po siguro narinig kasi nagmamadali kayo," sagot ko. Kung hindi ako mangangatwiran nang ganito at kung hindi ko ipapahiwatig na siya ang may kasalanan, malamang ay makatikim na naman ako ng sabunot sa kanya.

"E, bakit hindi mo ako hinabol? Hindi ba't sinabi kong dapat pag-uwi ko ay may pagkain na, dahil dito kami sa bahay kakain ng tito Kaius mo?"

Tito Kaius? Napatingin ako sa guwapong lalaki sa sofa. Ngumiti s'ya sa akin kaya napaiwas ako ng tingin. Tiyuhin ko ba siya? Kaanu-ano kaya siya ni nanay? Bakit wala naman nababanggit si nanay noon na may nakababata siyang kapatid na lalaki at ganito pa kaguwapo?

Inabutan ako ni nanay ng pera. "O, heto. Bumili ka ng isang kilong bigas. Bilisan mo na at iluluto mo pa yan."

Nakayuko akong lumabas ng bahay dahil madadaanan ko si "Tito Kaius" daw.

Nagpunta ako sa pinakamalapit na tindahan ng bigas sa amin. "Isang kilong bigas nga po, ate Inday," bungad ko sa matandang tindera.

"Heto... Huy Hannah, sino yung kasama ng nanay mo? Ang gwapo, ah!"

Napangiti ako. Bakit kinikilig ako, paano kung kamag-anak nga namin yun?

"Hindi ko po alam, ang sabi lang ni nanay ay si Tito Kaius daw yun."

"Kay... Kayos? Ano? Bakit naman ganun ang pangalan niya? Foreigner ba yun? E, kaanu-ano n'yo raw?"

"Hindi ko po alam, ate Inday, eh. Baka po tiyuhin ko siya sa malayong dugo?... Sige na po, at baka mapagalitan pa ako. Isasaing ko pa po kasi ito, eh." At nananakbo akong umuwi habang yakap-yakap ko ang binili ko.

Nagdire-diretso ako sa kusina at isasalin na sana sa kaldero ang bigas, nang mapasulyap ako sa guwapong bisita namin at kay nanay na nasa sofa.

Nanlaki ang mga mata ko at nabitiwan ko pa nang hindi sinasadya ang bigas nang makita kong naghahalikan pala silang dalawa. Nagbalik lang ako sa wisyo nang maramdaman ko ang pagtapon ng bigas na nasa plastic sa semento.

"Ano yan? Anong nangyari, bakit natapon?!" malakas na boses ni nanay. Tumayo siya at mabilis na lumapit sa akin... Heto na.

Paglapit n'ya ay agad niyang sinunggaban ang buhok ko at sinabunutan ako. Ramdam ko sa pagwasi-wasiwas niya sa ulo ko ang matinding inis niya sa akin.

"Pagsasaing na nga lang ang gagawin mo, hindi mo pa magawa nang tama? Pulutin mo yan at hugasan mong mabuti! Nagsasayang ka ng bigas!"

Maya-maya lang ay nakaamoy ako ng pabango ng lalaki. Ang bango-bango, at parang bagong paligo ang amoy.

"Heidi, tama na. Hindi naman niya sinasadya, eh."

Nakita ko na lang na nasa harapan ko na pala si Tito Kaius at inaawat si nanay. Dahil sa sobrang lapit niya sa akin ay doon ko lang napagmasdan nang malapitan ang kakisigan n'ya. Ang kinis pala ng mukha n'ya. Ang kakapal ng kilay, ang tangos ng ilong at ang pula ng labi.