KABANATA 2

“CUSTOMER ako dito, kaya kapag sinabi kong maupo ka, maupo ka!” sigaw kay Jade ng isang matabang lalaking customer nila na halatang lasing na lasing.

“Sir, kanina ko pa nga po pinapaintindi sa inyo, waitress ako dito, hindi po ako katulad ng iniisip ninyo,” paliwanag niya saka pinagsikapan unawain ang lalaki sa kabila ng katotohanan na malapit na siyang mapikon rito.

“Wala akong pakealam kahit manager ka pa o kung ano ka! Gusto ko maupo ka dito! Babayaran kita! Bakit ha? Akala mo ba wala akong pera? Sige sabihin mo sa akin ngayon, magkano ka ba?” ang galit at sumisigaw parin nitong tanong sa kanya na umagaw na sa atensyon ng ibang naroroon.

Sa puntong iyon ay mabilis na namula ang mukha ni Jade dahil sa galit. Gustong-gusto na niya itong sampalin dahil likas na bastos ang bibig nito pero nagpigil parin siya. Alam niyang kapag ginawa niya iyon ay matatanggal siya sa trabaho at iyon ang hindi niya gustong mangyari.

Kaya para makaiwas sa anumang hindi maganda na pwedeng mangyari ay minabuti niyang magpaalam na sa lalaki. Noon siya umakma nang aalis pero iba ang nangyari sa pagtalikod niya. Bigla ay dinakma ng lalaking lasing ang puwitan niya.

Hindi niya maintindihan. Hindi naman malaswa ang suot niya bilang kanilang uniporme at dahil narin sa prominenteng mga tao ang nagpupunta doon. Naka-kulay itim siya na slack pants at black polo siya. Wala siyang dahilan para bastusin siya ng ganoon ng lalaking ito kung pananamit lang ang gagawing basehan. At dahil nga sa nagulat, kasama narin doon ang katotohanan na kanina pa siya pinapahiya ng lalaki ay mabilis niya sinampal.

“Bastos! Walang hiya ka! Walang kang respeto sa babae!” ang galit na galit niyang sigaw.

Agad na gumuhit ang matinding galit sa mukha ng lalaki at umakma ito sa sasampalin siya. Noon pumikit si Jade saka hinintay na dumapo sa mukha niya ang posibleng malakas na sampal na alam niyang ikabubuwala niya. Pero iba ang nangyari.

“Hoy, saan ka ba nag-aral ng elementary at mukhang palagi kang absent sa GMRC class ninyo? Hindi ka ba tinuruan na ang mga babae hindi sinasaktan?” tanong ng isang lalaking estranghero sa kanyang harasser habang hawak nito ang kamay nitong gagamitin sana nitong panampal sa kanya.

“Huwag kang makealam dito kung ayaw mong masaktan!” anitong pilit na binawi ang sariling kamay pero hindi iyon binitiwan ng lalaki.

“Ah talaga, sasaktan mo ako? Eh talaga palang wala kang breeding eh! Daig ka pa ng mga asong kalye!” sagot ulit ng lalaki.

“Hindi ko na gusto ang tabas ng dila mo ah!” ang lalaking lasing na sumuntok pero nakailag ang lalaking para kay Jade ay kanyang knight in shining armor.

*****

“I’M so sorry Jade but I have to fire you. Kailangang may managot sa nangyari at dahil nga sa iyo naman nagsimula ang away, ikaw ang dapat na magbayad dahil sa nangyari,” ang club manager na si Dianne iyon nang kausapin siya nito matapos ang insidente.

“Pero Miss Dianne, binastos po ako nung customer,” giit niya kahit kung tutuusin, alam rin naman niya sa sarili niyang wala nang magbabago.

“I know, pero wala akong choice. Hindi natin pwedeng ikatwiran ang ganoon, alam mo iyon hindi ba? Please, huwag mo nang gawing mahirap ito para sa akin. Makakaalis ka na,” pagtataboy pa nito sa kanya.

Sa puntong iyon alam ni Jade na wala na siyang magagawa, kaya naman katulad ng gustong mangyari ni Dianne lumabas na siya ng opisina nito, nagtungo ng locker room at umuwi.