KABANATA 3

“The hottest rumored couple Mr. Colton Noah Villagonzalo and Ms. Devia San Agustin”

Naglilinis ako rito sa aming sala ng biglang umugong ang pangalan na Colton Villagonzalo at Devia San Agustin kaya napatingin ako sa aming munting telebisyon na may kulay red at green na linya dahil sa kalumaan. Kitang kita ang masayang mukha sa babaeng nasa telebisyon habang seryoso lang ang lalaki naglalakad habang iniinterview.

“Ang sungit naman ng lalaki yun,” wala sa sariling bulalas ko habang napako ang tingin sa lalaking walang emosyon at nakakatakot ang postura.

Mas lalo pa akong naintriga ng si Devia San Agustin lang ang halos sumasagot sa mga interview questions at mukhang bored na bored na ang katabi niyang boyfriend.

“Pinagkakaguluhan ng sambayanan kung ano ba talaga ang totoong score sa pagitan ninyo ni Mr. Villagonzalo, ano pong masasabi niyo miss San Agustin?”

Tanong ng interviewer at itinapat ang microphone kay miss San Agustin ngunit napasinghap ang mga inteviewer ng kuhanin ni Mr. Villagonzalo ang microphone at ito na ang sumagot sa tanong.

“Miss San Agustin and I are definitely more than getting to know each other.”

Ayun lang ang sinabi ng lalaki bago umalis sa lugar kung saan madami pang mga tanong ang gustong itanong ng mga interviewer. Ngunit humarang na ang mga bodyguard upang makaalis na ang dalawa, kitang kita ang ngiti sa labi ni miss San Agustin.

Napabalikwas ako mula sa panonood ng telebisyon ng marinig ang sigaw ni itay. “Patayin mo ‘yang telebisyon Fily, ngayon din.” nagtatakang napalingon ako kay itay dahil sa sigaw nito at kumilos naman ang aking katawang lupa upang sundin ang utos nitong patayin ang telebisyon. 

“Tay, bakit naman po kayo sumisigaw? Nakakagulat po kayo,” ani ko sa kanya at lumapit upang magmano. Mukhang galing na naman sa sakahan si itay dahil sa ayos nitong may sira-sirang sumbrero na gawa sa tuyong dahon. At kapansin- pansin ang mga putik na natuyo na sa kanyang damit at nangingitim na dulo ng pants na suot-suot.

“Nawiwili ka na naman kasi sa panonood anak. Alam mo namang kay bilis tumaas ng ating kuryente dahil diyan sa telebisyon na iyan,” saad ni itay at tinuro pa ang aming telebisyon. Kaya naman hinawakan ko ang kamay nito at niyakag na kumain sa aming munting lamesa.

“Kakabuhay ko lang din naman ng tv ‘tay. Ari at kumain na lang muna kayo, alam kong nagugutom na ang mga bulate diyan sa inyong tiyan.”

“Ramdam ko na nga ang mga bulateng nagalaw,” natatawang wika ni itay habang inaalis ang sumbrero at naupo na sa harap ng lamesa.

Dahil sa hirap ng buhay ay tuyo at upo lang aming ulam ngayon ngunit sobrang sarap na nito para sa amin. Walang rekla-reklamo namang kumain si itay kaya kumuha na lang ako ng tubig sa kusina upang may mainom siya pagkatapos kumain. 

“Nasaan ang inay mo Fily? Parang hindi ko pa nakikita? Napapasarap ata ang tulog.”

“Hayaan na lang ho natin si inay at palaging madaling araw na yun natutulog tay,” sabi ko kay itay at tumingin sa kwarto nila kung saan natutulog pa ang aking inay.

“Ayun naman ang gusto Fily anak, ang makapagpahinga ang inay mo lalo na at may dinaramdam siya ngayon. Basta tignan-tignan mo na lang ha?” paalala ni itay dahil mahina ang resistensya ni inay kaya hindi pupwede ang mabibigat na gawain sa kanya.

Maporselana rin si inay kaya maiisip mo talagang anak mayaman siya. Namana nga namin ni Easton ang kulay ng aming ina kaya naman kapag magkakasama kami ay napapalingon ang ibang tao dahil sa kulay ng aming kutis.

“Opo ‘tay, wala naman po akong lakad kaya magkasama po kami ni inay buong araw,” natatawang wika ko sa aking itay at hinatid na ito sa pintuan ng matapos na itong kumain dahil kailangan na ulit niyang magpunta sa palayan. 

Kumaway pa ako kay itay bago tuluyang sinara ang pintuan at pinagpatuloy ang paglilinis. Pakanta-kanta pa ako ng biglang may kumalabog sa kwarto nila inay. Nabitawan ko ang tambo na hawak at kumaripas ng takbo papasok sa kwarto nila inay ng makitang nakahandusay ito sa sahig.

“Nay! Nay! Gising po….”