KABANATA 6

Busy sa kusina ang mommy niya pati na rin ang Tita Janese niya. Ang mga ama naman nila ay nasa veranda at nag-uusap na. Sigurado siyang tungkol na naman sa negosyo ang paksa ng mga ito.

Si Ara na batang kapatid ni Sky ay karga-karga naman ng yaya nito.

"Sa labas tayo, Sky!" Agad na hinila niya ang isang kamay nito para akayin papunta sa kwadra ng mga kabayo.

Excited siyang ipakita rito ang bagong kabayo niya na regalo ng ama. Kulay itim iyon at kanina lang din niya nakita. Halos sampu na yata ang mga kabayong alaga nila dahil mahilig din ang ama niya sa kabayo. Sa katunayan, ang ama niya ang nagturo sa kanya mula pa pagkabata kung paano sumakay ng kabayo.

Ang mommy niya lang ang palaging sumasaway sa kanyang mangabayong mag-isa dahil natatakot itong mahulog siya.

Alam niyang may alaga ring kabayo si Sky sa bahay ng mga ito. Katulad ng sa kanila ay may malaking hacienda rin ang mga magulang nito na may iba't-ibang klase ng mga hayop. Halos isang oras din ang layo ng bahay ng mga ito sa kanila.

Napupunta lang siya roon kapag may espesyal na okasyon sa kanila ni Sky. Ang sabi ng mommy niya kasi ay pangit kung sila ang dumadalaw lagi sa bahay ng lalaki lalo pa at ipinagkasundo na silang dalawa. Mas mabuti raw na sila Sky ang laging dumadalaw sa kanila.

Hindi niya man naiintindihan ang logic no'n ay ipinagkibit-balikat niya na lang.

Saka lang niya binitiwan ang kamay ni Sky nang nasa loob na sila ng kwadra. Ayaw niya sanang bitiwan ito dahil masarap sa pakiramdam niya ang hawakan ang kamay nito pero baka makahalata naman si Sky.

Agad na napansin ni Sky ang bagong kabayo nila at nilapitan iyon.

"What's her name?" Hinawakan nito ang mukha ng kabayo habang nilingon siya.

"His name is Atlas, lalaki siya, regalo ni daddy." Nakangiting lumapit na rin siya at nakihimas sa mukha ng kabayo.

Lumuwang ang ngiti ni Sky saka ibinaling nang muli ang tingin sa kabayo.

"Gusto mong subukan natin siya?"

"Can we?" Excited na tanong ni Sky.

"Oo naman. Magaling ka namang mangabayo, eh. Ayoko kasing sumakay mag-isa kasi nga kakabigay lang ni daddy. Baka pareho kaming manibago at baka ihulog lang ako," nakatawang sabi niya.

Ngiti lang ang itinugon ni Sky na nanatiling nakatingin sa kabayo na para bang nag-iisip.

"Sige na, please..." Hinila-hila pa niya ang manggas ng suot nitong polo.

Hindi nga siya nito natiis. Binuksan niya agad ang pinto ng kulungan ni Atlas. Mabuti na lang at maamo ang kabayo at hindi nag-alburoto. Hawak-hawak ni Sky ang renda nito habang inilalabas nila ang hayop sa kulungan.

Inayos muna nila ang saddle ng kabayo nang makalabas. Malaki kasi ang nasasakupan ng hacienda nila kaya't malawak ang lugar para sa pangangabayo.

Inalalayan siya ni Sky na sumakay muna. Hindi na niya naalala na nakabestida pala siya kung makasakay siya.

Pumalatak si Sky na parang naiinis dahil nakakunot ang noo nito.

"W-what?" Nagtatakang tanong niya nang masama ang tingin nito sa kanya.

"You're not a child anymore, Braille. Marami kayong lalaking tauhan dito."

"Oh? Bakit nga?"

Huminga ito nang malalim bago siya sinagot.

"I just saw a glimpse of your... undies. Huwag ka ngang paburara kung kumilos. Ganyan ka ba kapag sumasakay ng kabayo? So lagi kang nasisilipan niyan?" Mas lalo pa yata itong nainis pero napansin niyang medyo namula ang mukha nito.

Sa galit kaya iyon? Or dahil nakita nito ang panty niya?

Imbes na mahiya sa nalaman ay natawa pa siya. Ang cute kasi tingnan ng reaction nito.

"At least may suot na undies. Saka hindi naman manipis ang suot kong pan-"

"Stop! Next time, huwag kang sumakay ng kabayo nang hindi nakapantalon." Agad na pinutol nito ang sasabihin niya saka sumakay na rin ng kabayo.

Sinupil niya na lang ang ngiti nang makitang pulang-pula na ang mukha nito.

Itinuon niya na lang ang tingin sa harap nang maramdamang ganap na itong nakaupo sa likod. Mabilis na hinawakan uli nito ang renda. Pakiramdam niya tuloy ay nakayakap ito sa likod niya.

Kilig na kilig siya sa posisyon nilang iyon.

"Hiyah!" Malakas na sigaw ni Sky habang ikinilos ang dalawang kamay na may hawak ng renda.

Nagsimula na ring gumalaw si Atlas. Tiwala siyang masyado dahil si Sky ang kasama niya. Ito ang unang beses na dalawa silang sakay ng isang kabayo. Mas madalas kasi ay ito lang ang nangangabayo habang nanonood sila.

Ang totoo ay magaling din siyang mangabayo pero dahil patago lang siyang nangangabayong mag-isa ay hindi niya pwedeng ipagyabang din iyon kay Sky. Baka makarating pa sa mommy niya.

Kakutsaba niya lagi ang daddy niya. Kunyari ay angkas siya nito sa kabayo habang papunta sa dulo ng hacienda malayo sa bahay nila. Pagdating do'n ay hinahayaan na siya ng ama na mangabayong mag-isa habang abala ito sa pagbisita sa mga tauhan nilang may mga bahay na nakatayo sa bandang iyon.

Hindi naman siya natatakot na isumbong ng mga ito sa mommy niya dahil kinausap na sila ng daddy niya.

"Here, try holding this. Sa dami ng kabayo ninyo, dapat marunong ka na rin."

Nanindig yata lahat ng balahibo sa batok niya nang maramdaman ang mainit na hininga ni Sky sa batok niya. Nanginginig tuloy ang mga kamay niya nang hawakan ang renda ng kabayo.

Akala yata nito ay dahil iyon sa takot. Nagulat na lang siya nang kasabay ng renda ay hinawakan din nito ang dalawang kamay niya nang mahigpit. So bale parang silang dalawa ang may hawak ng renda.

Ang sweet!

"Don't be afraid. Hindi naman kita hahayaang mahulog dito. Magaling naman talaga pumili ng kabayo mo si Tito. Masyadong mabait itong si Atlas, di ba, Atlas?"

Muli ay dumampi sa balat niya ang hininga nito.

Narinig nila ang pag-ingay ng kabayo na para bang sagot sa sinabi ni Sky. Muntik pa yata siyang makasabay sa tunog ni Atlas sa pagkakawindang niya ngayon.

Hindi binibitiwan ni Sky ang mga kamay niya habang tumatakbo ang kabayo. Sumusunod lang siya sa bawat galaw ng mga kamay nito.

Medyo bumibilis na rin ang takbo ni Atlas pero hindi siya natatakot. Mas mabilis ang pagpapatakbo niya kapag siya lang mag-isa kumpara do'n.

Nadaanan nila ang mga tauhan ng hacienda na busy rin sa pagluluto. Alam niyang dadalhin ng mga iyon ang lulutuin sa bahay nila pagkatapos. Imbitado rin kasi ang mga ito sa tuwing may okasyon sa kanila.

Binabati naman sila ng mga nadaanan nila. Hindi rin nakakaligtaan ng mga ito na batiin siya sa kaarawan niya.

Puro ngiti ang isinasagot nila ni Sky sa mga ito. Pinatigil ni Sky ang kabayo nang mapadako sila sa maliit na batis na siyang nagsisilbing barrier sa kabilang lupa na hindi na nila pag-aari.

Sa gilid ng batis na iyon ay may harang na rin para hindi basta-basta mapapasok nang kahit na sino ang hacienda nila.

Nauna itong bumaba at saka siya hinawakan sa kamay para alalayang bumaba na rin. Ando'n na naman ang kakaibang kiliti sa pagdaop ng mga palad nila.

Kung kanina ay paburara siyang sumakay ng kabayo, ngayon naman ay ingat na ingat siya na huwag magpakita ng panty uli. Alam niya kasing iinit na naman ang ulo ng lalaki.

Ewan nga ba kung bakit na-highblood ito nang makita ang panloob niya kanina, eh, hindi naman iyon butas. Sa katunayan ay napakamahal ng brand ng suot niyang underwear na bigay ng mommy niya. Napaingos siya sa naisip.

Narinig na lang niya ang mahinang pagtawa nito. Bigla siyang napatingin sa mukha ni Sky na sa kanya pala nakatingin.

"Ano bang inisip mo at may paingos-ingos ka pa riyan?" Curious na tanong nito na nakatawa pa rin.

Lumabi lang siya sa lalaki saka nauna nang pumunta sa tabi ng malaking bato at naupo sa lupa. Hindi na naisip na baka madumihan ang suot na damit.

Sumunod na rin ito sa kanya at umupo sa tabi niya. Iyon kasi ang paborito nilang tambayan.

Nang makaupo na ito ay saka siya nagtanong.

"Pang-ilang girlfriend mo na ba sa Rhea?"

Matagal na hindi ito nakaimik.

"Who told you about her?"