KABANATA 2

Buong pagmamahal na sinusundan niya ng tingin ang bawat kilos ng lalaki. Halo-halong emosyon ang nararamdaman niya nang mga sandaling iyon. Gusto niyang umiyak at tumawa sa magkahalong lungkot at tuwa. Hindi iilang beses niyang pinapangarap na dumating ang araw na masisilayan niya muli ang mukha ng lalaking itinitibok pa rin ng puso niya. Hindi iyon nabago kailanman ng pitong taong pagkakawalay nito sa kanya.

Maya-maya ay pumunta ang lalaki sa gitna at nagsalita gamit ang mic.

"Thank you all for coming. Ito ang pinakamagandang salubong ninyo sa akin sa pagbabalik ko dito sa Pilipinas. Please enjoy the night. I'll do my best para mapuntahan kayo isa-isa," pagkasabi no'n ay umalis na nga ito agad sa maliit na stage sa gitna.

Nagsimula nang mag-serve ng mga pagkain ang mga waiters at nakita nga niya nang puntahan ni Sky ang bawat mesa para mangumusta.

Tumayo siya para pumunta ng restroom bago pa siya makita ng lalaki.

Kabisado pa rin naman niya ang bawat sulok ng bahay ni Sky. Sa katunayan, wala pa ring ipinagbago iyon. Nagkulong siya sa isang cubicle at ilang beses na huminga nang malalim. Nang sa tingin niya ay okay na siya ay saka siya lumabas.

Hinimas-himas niya uli ang wedding ring na suot. Ready na siyang harapin ang lalaki. Kinabisado na niya ang paghingi ng sorry dito na pitong taon na niyang inulit-ulit sa utak. Handa na siyang ipaliwanag ang lahat.

May isang bagay din siyang gustong aminin sa lalaki. Isang bagay na hanggang ngayon ay dala-dala pa rin niya sa dibdib. Hindi man niya kayang aminin pa iyon ngayon pero alam niyang kailangan niyang sabihin iyon dahil karapatan nitong malaman ang sekreto na tanging siya at si Audrey lang ang nakakaalam.

Bigla ay parang gusto niyang maiyak nang maisip iyon. Mahigit anim na taon na niyang dinadala mag-isa ang sakit ng alaalang hindi man lang niya nasabi kahit sa pamilya niya.

Kung sana'y hindi umalis si Sky no'ng mga panahong iyon ay baka...

Agad na pinahid niya ang nagbabantang luha sa sulok ng mga mata. Nag-retouch siya ng makeup saka lumabas na ng restroom.

Napatingin siya sa munting stage sa harap dahil nakatayo uli si Sky doon kasama ang mga magulang nito at kapatid na si Ara.

"Tonight is special for me because nakasama ko na uli ang pamilya ko. The main reason also why bumalik ako ng bansa ay para ipaalam sa inyong lahat ang nalalapit kong kasal," masayang anunsiyo ng lalaki.

Kasal?

Parang bombang sumabog sa tenga niya ang unexpected na announcement ng asawa.

Paano ito magpapakasal kung kasal pa rin sila?

Para siyang mabibingi sa masigabong palakpakan ng mga panauhin habang parang estatwang nakatayo lang.

"I'd like to call my very beautiful and very supportive fiancee, Audrey Simmons!"

Si Audrey? Ang pinsan niyang wala na rin siyang balita nang ilang taon? Ang babaeng una talagang minahal ni Sky?

Hindi makapaniwalang natuon ang pansin niya sa napakagandang babae na umakyat ng stage at may karga-kargang bata!

Bigla ay nagdilim ang paligid niya. Narinig pa niya ang pagsigaw ng isang babae malapit sa kanya bago siya nawalan ng malay.

Napakurap-kurap pa siya nang parang may naamoy siyang mint na malapit sa ilong niya.

"I think she's conscious now."

Pamilyar ang boses ng lalaking nagsalita. Pinilit niyang ibuka nang tuluyan ang mga mata. May nakikita siyang mga taong nakatayo sa harap niya habang nakahiga siya sa isang sofa.

Nasaan ba siya?

Agad na napabalikwas siya ng bangon nang maalala ang nangyari kanina. Hinimatay yata siya.

"How are you feeling?" worried na boses ng ina ang narinig niya.

Tinabihan agad siya nito sa sofa nang tuluyan na siyang makaupo.

"I'm okay, Mom."

Napatingin siya sa paligid. Nasa sala siya sa loob ng bahay ni Sky. Nakita niya ang nag-aalalang mukha ng mga magulang ni Sky na nakatayo rin sa harap niya. Ang daddy niya naman ay hinawakan siya sa isang kamay at umupo na rin sa tabi niya.

"Bakit hindi mo sinabing pupunta ka rin pala rito?" ang mommy niya uli.

Imbes na sumagot ay inilibot niya ang tingin at hinahanap si Sky pero wala ito roon. Hindi ba't ito iyong unang nagsalita kanina?

"Here. You need to drink this."

Napatingin siya sa pinanggalingan ng boses at nakita nga niya si Sky na may dalang isang tasa at inabot sa kanya.

"S-sky?" sambit niya na hindi inaalis ang tingin sa mukha ng lalaki.

He was just staring at her coldly.

"Okay ka na ba, iha?" tanong ng ina ni Sky.

"I'm fine na po, Ma," tipid na ngumiti pa siya rito.

"I think you should stop calling them Ma and Pa, Braelle." Biglang dumating si Audrey at humawak agad sa braso ni Sky.

Napakunot-noong napatingin siya sa pinsan niya.

"Ikakasal na kami ni Sky and it would be improper for you to address them that way," mahinhin naman ang pagkakasabi ni Audrey no'n pero iba ang dating ng mga salita nito.

"In case you forgot, I'm still married to Sky." Parang nawalan na siya ng pasensiya. Itinaas pa niya ang kamay na may suot na wedding ring para ipakita iyon sa babae.

Nagkatinginan ang lahat ng ando'n sa sala. Hinawakan naman nang mahigpit ng mga magulang niya ang kamay niya na parang binibigyan siya ng lakas.

Matagal na napatingin ang nagtatanong na mukha ni Sky sa mga magulang niya.

"You should tell her everything, Sky." Bumaling lang si Audrey sa sa lalaki imbes na sagutin siya.

"We didn't have the guts to tell her. She was hurting and still hurting right at this moment. Hindi namin kaya na sa amin manggagaling." Ang ina niya ang nagsalita na parang maiiyak.

Lalo siyang naguluhan.

"I think kailangan na muna natin silang iwan para makapag-usap sila nang maayos," sabi ng ama ni Sky.

May hindi ba siya alam? Nalilito siya lalo't nakikita niya ang malulungkot na mga tingin ng mga magulang nila ni Sky.

"Sa labas na muna kami, anak," paalam ng ama at saka siya niyakap nang mahigpit.

Nakita pa niyang nagpapahid ng mga mata ang ina niya at parang naaawang tiningnan siya bago ito lumabas. Naiwan na nga silang dalawa ni Sky sa sala. Naririnig pa niya ang ingay sa labas ng bahay ng lalaki.

Napatingala siya rito nang nakatayo lang ito sa harap niya habang nakapamulsa ang dalawang kamay sa suot na pantalon.

Huminga pa muna ito nang malalim bago nagsalita.