Chapter 5

"Galingan mo, Kheious!"

Nabuhayan ako ng loob nang marinig iyon lalo na nang makita si Anaia na may hawak na banner. Pumalakpak siya nang malakas kaya nakisabay na rin ang ibang audience. Muli akong kumanta at sa pagkakataong ito ay may kumpyansa na sa sarili. Ibinigay ko lahat ng aking makakaya dahil ayokong bumaba ng entablado ng may pagsisisi.

"Ang galing-galing mo," salubong nito sa akin pagkababa ko ng stage.

"Salamat." Niyakap ko siya sa sobrang tuwa ko. 

Kung sakaling hindi siya dumating kanina baka natulala na lang ako sa unahan. Nakalimutan ko na nga ang lyrics kanina sa sobrang kaba. Sana lang ay hindi iyon makaapekto sa resulta ng evaluation. Lumabas na kami dahil masyado ng maraming tao at maingay sa loob.

"Mabuti naman at naisipan mong mag-audition?"

"Naisip ko rin na sayang din kung palalampasin ko. Next year na ang sunod na pa-audition. At saka nakakapanibago kasi kapag hindi mo na nagagawa iyong mga bagay na normal mong ginagawa dati."

"Ang galing mo kanina," ani nito habang naglalakad kami sa pathway.

"Sus. Muntikan ko na ngang makalimutan iyong lyrics kung hindi ka lang dumating."

"Nabawi mo naman kaagad. Ayos na 'yon."

"Talaga?"

"Um." Tumango-tango siya.

"Tingin mo ba hindi iyon makakaapekto sa performance ko? Baka kasi mamaya hindi ako makapasa dahil sa nang—"

"Huwag ka ngang mag-isip ng gan'yan. Papasa ka, okay? Nararamdaman ko 'yon. Nakita mo naman siguro iyong reaksyon ng mga nanunuod kanina, 'di ba? Grabe kung hindi nga kita kilala iisipin ko na concert mo 'yon."

"Thank you pala sa pagpunta. Sobra mong napalakas loob mo."

"Malakas ka sa 'kin eh." Umakbay ito sa akin at hinikit ako pababa. "At dahil d'yan kailangan mo akong ilibre." Hinatak na ako nito kaya hindi na ako nakapalag. 

[Anaia's POV]

"Saan galing 'yan?" tanong ni Syn nang makita ang barbeque sa plato.

Ibinaba lang nito ang bag at dumampot na ng isang stick.

"Kay Kheious."

"Nanliligaw na?"

"Uy hindi ah. Issue ka. Libre niya lang sa akin kanina. Sinuportahan ko kasi siya sa audition niya."

"Okay. Bihis na muna ako." 

Mag-street food sana kami ni Dustin kanina sa labas ng school kaya lang ay biglang umulan kaya nag-take out na lang kami. Hindi ko na rin siya nakasabay umuwi dahil may part time siya tuwing alas-cinco. Baka rin ma-late siya sa trabaho kaya isang stick lang kinain niya. Tapos iyong mga natira inuwi ko na. Maganda ring pang-ulam para hindi na kami bibili ni Syn. 

Pagkatapos magbihis ng kasama ko ay kumain na kami. Iyong barbeque na nga ang inulam namin. Tinanong pa niya ako ng tungkol sa amin ni Kheious at syempre nagkuwento naman ako dahil hindi naman ako titigilan ng isang iyan. Matagal na rin kaming magkaibigan kaya naman open na kami sa isa't isa pagdating sa lahat ng bagay.

"Manloloko ka!" Sinampal ko siya. 

"Anaia, hindi kita niloko."

"Come on, Kheious. Huwag mo ngang bilugin ang ulo ko. Nakita ko kayo kahapon. Ang saya-saya n'yo ng babae mo."

"Kaklase ko lang iyon. Nagpatulong lang sa assignment."

"Nagpatulong lang? Kailangan ba nakakandong?"

"W-Wala na kasing ibang upuan."

"Tanginang rason naman 'yan. Edi sana tumayo ka! Tigilan na natin ito. Kung gusto mo roon, doon ka na." Tinalikuran ko na siya pero hinawakan nito ang pulsuhan ko.

"Please ayusin natin. Aaminin ko nagkamali ako. Iyong mga kaklase kasi namin shini-shift kami."

Humarap ako at sinalubong siya ng sampal na malakas. "At nagpadala ka namang p*tang!na ka!"

"And cut!" Tuwang-tuwang pumalakpak si Syn na nagsilbing direktor namin. "Grabe ang galing-galing n'yo pareho."

"Talaga?" Tuwang-tuwang akong humarap kay Kheious. "Congrats sa 'tin. Narinig mo 'yon? Ang galing-galing daw natin."

"Sa sobrang galing mo muntik ng matanggal ulo ko."

Nawala ang ngiti ko nang makita ang namumula niyang mukha na nasampal ko.

"Hala sorry. Masyado lang akong nadala sa eksena."

"Ayos lang. Mawawala rin ito mamaya."

"Tinotoo mo naman kasi iyong sampal, 'te."

"Mukha kasing totoong-totoo iyong eksena kaya nadala ako. Halika, gamutin ko na muna 'yan." Pinaupo ko si Kheious sa silya.

Kumuha ako ng yelo at isinilid iyon sa ice pack. Panay ang hingi ko ng pasensya habang ginagamot ko siya. Nag-practice pa kami ng dalawang take bago kami kumain ng tanghalian. Linggo ngayon at bukas na ang pa-audition ng theater kaya naman todo practice na ako. 

Sumubok din kami ng iba't ibang genre. Hindi naman kami nahirapan sa eksenang gagawin at sa linyang ibabato dahil scriptwriter ng school si Syn. Nag-a-adlib lang kami kapag kailangan o may nakalimutang linya. Magaling si Kheious umarte kaya naman mas ginanahan akong lalo.

"Relax ka lang." Inabutan niya ako ng tubig sa upuan ko.

"Ang gagaling nila," kabado kong sambit habang nakatingin sa mga nagpe-perform sa stage. "P-Paano kapag hindi ako nakapasa?"

"Anong sabi mo dati?" tanong ng katabi ko.

"Huwag mag-isip ng negatibo. Maniwala na papasa."

"Iyon lang isipin mo."

"Eh paano nga kung hindi?"

"Kung hindi ka pumasa isa lang ibig sabihin no'n..."

"Ano?" kunot noo kong tanong.

"Hindi ka pang-stage, pang-TV ka." Pumalakpak siya ng isa. "Sa galing mo ba namang iyan? Naku, ako na nagsasabi sa 'yo, imposibleng hindi ka matanggap."

"Eh paano nga kung hindi talaga ako pumasa kasi malay mo marami pa palang mas magaling sa 'kin."

"Oh problema ba 'yon? Kung hindi ka pumasa d'yan, edi labas tayo ng school. Pag-au-audition-in kita sa mga TV networks d'yan. Pili ka na lang kung ano mas bet mo. Maging Kapuso o maging Kapamilya?"

Natawa ako sa sinabi niya. "Ikaw talaga!" Pabiro ko siyang hinampas sa braso.

Dahil doon ay nawala kahit papaano ang kaba ko. Nagkabisado pa ako ng linya ko habang nakaupo kami at naghihintay na matawag. Ilang saglit pa ay narinig ko na ang auditionee number ko. 

"Kapag kinabahan ka, tingnan mo lang ako." Tinapik nito ang balikat ko.

Huminga ako nang malalim bago umakyat ng stage. Maraming nanunuod pero parang si Kheious lang ang nakikita ng mata ko. Sinunod ko lahat ng sinabi ng direktor. Ibinigay ko ang isang daang porsyento ko sa bawat eksena. Hindi ko alam kung pasado ako pero ang mahalaga na lang sa akin ngayon ay ibinigay ko ang best ko. 

Sapat na rin sa akin na hindi ako nakagawa ng nakakahiyang eksena sa stage at hindi ako nabulol sa pagbabato ng linya ko. Pagbaba ko ng entablado ay kaagad akong sinalubong ni Kheious. Nagsabay na kaming umuwi dahil wala na rin namang kaklase. 

"Ayos lang ba talaga iyong acting ko?" tanong ko bago sumampa sa jeep. 

"Ang galing-galing mo kanina."

Punuan na sa loob kaya sa pinakadulo na kami naupo. Si Kheious ang nasa may bandang pinto habang ako naman ay nasa tabi niya. Kalong ko ang totebag ko at yakap iyon habang ang isang kamay ay nakahawak sa hawakan ng jeep. Mahirap na kapag biglang pumreno.

"Tingin mo papasa kaya ako?"

"Oo naman. Ang galing mo kaya kanina. Iyong mga katabi ko nga pinag-uusapan ka. Ang husay mo raw umarte."

"Talaga?" Nabuhayan ako ng loob matapos marinig iyon.

"Oo naman. Kaya relax ka lang. Sigurado ako na makakapasa ka. Kung hindi man, aba sinasayang ka nila." 

Biyernes na ngayon at pareho kaming kabado ni Kheious. Ngayon na kasi ilalabas ang resulta ng audition sa bawat school club. Hawak ko sa pulsuhan ang lalakeng kasama ko at hatak-hatak ito. Nakipagsiksikan kami sa mga estudyanteng nandito na tulad namin ay nagtitingin din ng resulta.

"Hindi nga ako pasado. Tiningnan ko na 'yan kanina."

"Nakausap ko iyong isa sa mga officer ng club, hindi pa raw iyon ang final list ng mga nakapasa. May ipapaskil pa raw silang isa pa. Malay mo nandoon na pangalan mo. Kaya halika na tingnan natin." Hinatak ko siya ulit papunta roon.

Siksikan at mainit pero ininda namin iyon. Mas importante na makita namin ang resulta. Medyo nakahinga ako nang maluwag nang mapunta na kami sa pinakaunahan. 

"Wala nga sabi d'yan pangalan ko."

"Hush! Titingnan ko pa. Huwag mo pangunahan." Gamit ang talas ng mata at hintuturong daliri, hinanap ko ang pangalan niya sa nakapaskil na poster. "Oh my god! Kheious, nandito ka! Pangalan mo 'to, 'di ba?"

"Patingin nga. Luh! Oo nga. Pumasa 'ko."

"I told you papasa ka."

Sunod naman namin na tiningnan iyong sa akin. Dito na ako kinabahan dahil malaking bagay sa akin ito, lalo na't gusto ko talaga na maging parte ng theater. Makakatulong din kasi ito sa scholarship ko kaya sayang naman kung hindi ako papasa. 

"Relax ka lang, okay?" Minasahe nito ang balikat ko habang hinahanap ko ang pangalan ko sa listahan.

"Kheious, nakita ko na. Nandito iyong pangalan ko." Tuwang-tuwa akong pumihit paharap sa kaniya. "Nakapasa 'ko sa audition!" Niyakap ko siya sa sobrang saya. 

Parang lumulukso iyong puso ko sa sobrang tuwa. Ilang gabi kong pinagdasal na sana makapasa ako tapos ngayon heto at magiging parte na ako ng theatro. 

"Wala ka kasing bilib sa 'kin. Sabi ko naman sa 'yo pasado ka, sigurado. Sa audition pa lang, malinaw pa sa tubig na papa—"

Nawala ako sa sarili dahil sa sobrang saya at n*******n siya sa labi.

Sh*t! Ba't ko ginawa 'yon?

—Azureriel