003

Lumipas ang isang buwan matapos ang hindi sinasadyang pangyayari kina Hiro at Quincy, lalong naging busy sa kanilang kompanya si Fern. Kaya halos wala na siyang oras kay Quincy at bihira na lang silang magkita.

"Love, busy ka pa rin ba mamaya?" malungkot ang tinig na wika ni Quincy.

"Yes. I'm sorry. Babawi ako sa susunod, okay? I love you," sabi ni Fern sa kabilang linya.

"I love you, too," malungkot na tugon ni Quincy bago ibinaba ang tawag.

Malungkot siyang umuwi galing sa trabaho. Ngunit wala siyang magagawa dahil kailangan niyang unawain ang kaniyang fiancé. Lalo na ngayong mayroon siyang malaking kasalanan kay Fern.

"Hiro?"

Laking gulat niya nang makita sa kanilang bahay ang binata. Nginitian siya ng binata ngunit matalim niya itong tinititigan.

"Anak, nandito si Hiro dahil may dala siyang mga pagkain at kung anu-ano pa para sa iyo. Pinadadala raw ni Fern dahil hindi ka niya madadalaw dito," sabi ng kaniyang ina.

"Kay Fern ba talaga galing iyan?" tanong niya kay Hiro.

Mabilis na tumango si Hiro. "Yes. You can ask him para malaman mo. Nakisuyo lang siya sa akin."

Nag-message kaagad si Quincy sa kaniyang fiancé at nakumpirma niyang pinabibigay nga iyon ni Fern para sa kaniya. Naiinis man pero nagpasalamat na lang siya kay Hiro bago nagtungo sa kaniyang silid. Akala niya umalis ang binata pero nandoon pa ito nakaupo sa sala. Siya na lang ang nandoon. Naisip niyang baka nagpapahinga na ang kaniyang ina.

"Ano pang ginagawa mo dito? Umalis ka na," mahinang saad niya ngunit bakas doon ang galit.

"Nagkaroon ka na ba? Kailan ang huling dalaw mo?"

Hindi nakapagsalita si Quincy. Pero hindi siya kinakabahan dahil hindi naman siya regular nagkakaroon ng dalaw. At wala rin siyang nararamdamang sintomas ng pagbubuntis.

"Bakit kailangan mo pang tanungin? Umalis ka na, Hiro. Hindi ako papayag na masisira mo ang kasal namin ni Fern," nanginginig ang boses ni Quincy.

Habang ang binatang si Hiro naman ay nakatingin lamang sa dalaga. Buo na ang pasya ni Hiro. Kung ano man ang kalalabasan ng mga desisyon niya, handa siyang harapin iyon. Basta ang nasa isip niya kung sakaling magbunga man ang nangyari sa kanila ni Quincy, hindi siya papayag na makasal ang dalawa. Bahala na kung magkagulo sila ng kaniyang kambal.

"Please, Hiro... nakikiusap ako sa iyo. Huwag mong sirain ang kasal namin ng kambal mo. Please, matagal kong pinangarap na maikasal sa kapatid mo kaya huwag mo na akong guluhin pa. Hayaan mo na ako. Hindi ako mabubuntis dahil isang beses lang naman iyong nangyari. Umalis ka na. Please, umalis ka na," naluluhang wika ni Quincy na may halong pagmamakaawa.

Bumuntong hininga si Hiro. "Mananahimik ako hangga't hindi ko pa nakukumpirmang mabubuntis ka nga. Pero kung sakaling mabuntis kita, hindi ako papayag na makasal kayong dalawa ng kakambal ko."

Pagkatapos niyang sabihin iyon, tumalikod na siya at saka umalis. Malakas kasi ang pakiramdam ni Hiro na magagawa niyang mabuntis si Quincy. At hindi niya alam kung bakit iyon ang nararamdaman niya.

Pumasok kaagad sa kaniyang silid si Quincy at doon na umiyak nang walang ingay. Naninikip ang dibdib niya. Mahal na mahal niya si Fern ngunit malaki ang kasalanan niya sa kaniyang fiancee.

Lumipas pa ang isang buwan, sa susunod na linggo na ang araw ng kasal nina Quincy at Fern. Muling nagyaya ng dinner ang pamilya ni Fern para pag-usapan ang tungkol sa kasal. Masayang nag-uusap ang kani-kanilang mga magulang nang bigla na lang makaramdam si Quincy ng kakaiba. Tila maduduwal siya. Noong nakaraang linggo, palagi siyang inaantok sa trabaho at panay ang kain niya nang maaasim.

Nanlalaki ang mata ni Quincy habang nagpipigil na maduwal. Habang si Hiro ay kanina pa nakatingin sa kaniya. Habang si Fern naman ay nagpaalam saglit dahil may kakausapin ito.

"Excuse me," wika ni Quincy at saka dali-daling nagtungo sa restroom.

Doon na nga siya naduwal. Hindi niya alam kung bakit. Nanghihina siyang napahawak sa pader. Nagmumuog siya sandali at saka hinawi ang kaniyang buhok. Laking gulat niya nang makitang nakaabang na sa kaniya si Hiro. Akma niya sanang lalampasan ang binata nang hapitin siya nito sa baywang at isandal sa pader.

"Bakit ka naduduwal? Buntis ka ba?" tila kulog ang boses ni Hiro.

Nanlaki ang mga mata ni Quincy. "A-Ano bang pinagsasabi mo? Hindi ako buntis ka kung puwede ba, bitawan mo ako!"

"No! Kailan kong malaman kung buntis ka ngang talaga o hindi. Lagpas dalawang buwan na rin ang lumipas simula nang may mangyari sa atin kaya siguradong malalaman na kung buntis ka nga o hindi. Bibili ako ng pregnancy test mamaya. Kailangan kong malaman ang totoo at kapag tumanggi ka pa, sasabihin ko kay Fern na may nangyari sa ating dalawa," may pagbabantang wika ni Hiro bago niya pinakawalan si Quincy.

Nauna na siyang bumalik sa kanilang table habang si Quincy naman, ilang minuto pa ang lumipas bago siya muling nakabalik. At dahil may kailangang ayusin na naman si Fern, si Hiro na naman ang naghatid kina Quincy at sa kaniyang pamilya sa bahay nito. Nagkaroon si Hiro ng pagkakataong makausap si Quincy. Bumili siya kaagad ng tatlong pregnancy test sa botika at saka ito inabot kay Quincy.

"Gamitin mo ang tatlong iyan para sigurado. Ngayon ko gustong malaman ang magiging resulta."

Nanginginig ang kamay ni Quincy nang kunin niya ang pregnancy test na binigay ni Hiro. Mabibigat ang hakbang niyang nagtungo sa banyo upang gamitin ang mga iyon. Sabay-sabay niyang pinatakan ng kaniyang ihi ang tatlong pregnancy test. Todo pigil hininga ang kaniyang ginawa habang naghihintay sa resulta.

"Jusko..."

Doon na siya napaiyak nang makita ang dalawang pulang guhit sa tatlong pregnancy test. Nasabunutan niya ang kaniyang sarili at saka mahinang inuntog ang ulo sa pader. Panay ang agos ng kaniyang luha. Buntis nga siya. Nagbunga ang nangyari sa kanilang dalawa ni Hiro.

"Quincy..." sambit ni Hiro nang lumabas ng banyo ang dalaga.

Panay ang iyak ni Quincy. Habang si Hiro naman, kinuha sa kamay niya ang pregnancy test at nanlaki ang mga mata nito sa nakitang resulta. Mabilis na tumibok ang kaniyang dibdib at hindi maipaliwanag ang kaniyang nararamdaman. Pinaghalong saya at pananabik ang kaniyang nararamdaman.

"Buntis ka... magkakaanak na tayo!"

"Hindi! Hindi sa iyo ito!"

Nandilim ang paningin ni Hiro. "Sa akin iyan, Quincy. Huwag mo ng ipagkaila pa. Wala pang nangyayari sa inyong dalawa ni Fern kaya sa akin iyan. Anak ko ang nasa sinapupunan mo. Kaya hindi ako papayag na maikasal kayong dalawa."