Chapter 3

Pumarada na ang kotse nito sa harap ng isang yellow na gate. Tahimik ang paligid, pero sa loob ng sasakyan, parang mas mabigat pa kaysa katahimikan ang nararamdaman niya. Lumingon si King Lex sa kanya.

“Bumababa ka na. Heto ang susi ng bagong bahay nating mag-asawa,” sabi nito habang iniaabot ang susi. “May pupuntahan pa ako… Just don’t forget na ikaw ay nasa master bedroom, akin naman ang kabilang room, okay?”

Bahay nila. Mag-asawa.

Pero bakit pakiramdam niya, siya lang ang naniniwala sa salitang iyon?

Sandaling nanigas si Queen sa kinauupuan niya.

“Pupuntahan mo siya, hindi ba? Pwede bang huwag na lang… Siya na nga ang makakasama mo sa Honeymoon suite natin na, kung tutuusin natin sana ‘yon. Kaya’t pwede bang ako naman ngayon? Kailangan din kita… please stay…” Gusto niyang isantinig lahat ng iyon, pero nanatili siyang tahimik. Tinikom niya ang bibig at marahang bumaba ng sasakyan.

Sinundan niya lang ng tingin ang papalayong kotse ng lalaki.

“Welcome to our new home…” mahinang usal niya, sabay ng mapait na ngiti.

Binuksan niya ang gate at minasdan ang kabuuan ng bahay.

“Ang ganda ng bahay… pero mas maganda sana ‘to kung ang titira ay tunay na mag-asawa…” bulong niya habang humahakbang papunta sa swing sa gilid ng bahay. May malawak ding playground doon.

“Mukhang umaasa talaga sila na magkakaanak kami… kahit ako rin naman…” malungkot niyang dagdag.…pero malabo.”

“Pero… malay natin, hindi ba?” bulong niya sa sarili. 

“Pero kung magkaanak kami… tatanggapin kaya siya ng ama niya?” Sabay sandala niya sa lubid ng swing.

Tanghali na nang magpasya siyang pumasok sa loob. Nagpa-deliver muna siya ng pagkain at inaliw ang sarili sa paglibot sa buong bahay.

Tatlong palapag ang bahay. May swimming pool sa labas at sa rooftop. Pagpasok niya, napakaganda ng loob—malawak, elegante, at moderno. Kumpleto sa gamit, may sariling banyo at terrace ang kwarto.

Sumilip siya roon.

“Ang sarap siguro tumambay rito tuwing umaga habang yakap ka ng taong mahal mo… sabay ninyong pinapanood ang pagsikat at paglubog ng araw… magkakape kayo habang nagkukwentuhan hanggang sa mauwi sa lambingan…” napangiti siya nang mapait. “Ang sarap lang… may asawa nga ako pero hindi ko naman siya maangkin. Hanggang kailan ko ba paparusahan ang sarili ko?”

Huminga siya nang malalim.

“Hay… maliligo na nga lang ako, tapos kain na rin.”

Binuksan niya ang cabinet at nagulat nang makitang may mga damit na nakasabit doon.

“Ang sweet talaga nina Mama…” nakangiting bulong niya.

Kumuha siya ng shorts at spaghetti strap na damit at pumasok sa banyo.

“Ang laki ng bathtub… pwedeng dalawa… pero mag-isa lang ako, haha…” pilit niyang tawa.

Naligo siya, nagbihis, at bumaba para kumain.

Pagdating ng hapon, nagluto siya ng dinner para sa kanilang dalawa. Matiyaga siyang naghintay sa sala, tinatanggap ang gutom at lamig habang umaasang uuwi ito nang maaga.

Hindi niya namalayang nakatulog siya.

Nagising siya nang may marahang tapik sa pisngi niya.

“Ba’t dito ka natulog?” Pungas-pungas siyang bumangon.

“Ano kasi… hinintay kita. Hindi ko namalayang nakatulog na pala ako…” nakayuko niyang sagot.

Sasagot pa sana ito nang biglang mag-ring ang cellphone nito.

“Hello, babe… yeah, makauwi na ako… oo naman, I had a great time… masarap yung pagkain sa restaurant… okay, good night… I love you.”

At ibinaba na nito ang ttawag Bumaling ito sa kanya.

“Ano ‘yung sabi mo kanina?”

“Wala… sige, matulog ka na,” pigil niya ang sariling manginig ang boses.

Tumalikod siya para itago ang luha.

Tiniis niya ang gutom at lamig para lang hintayin ito… pero buong maghapon pala ay kasama nito si Lyka.

Hindi na niya hinintay ang sagot nito. Dumiretso siya sa kusina at kumain nang kumain. Isang buwan na ang lumipas mula nang magsama sila sa iisang bahay. 

Pero sa loob ng isang buwan na iyon, never pa silang kumain nang sabay. Maaga itong pumapasok at gabi na umuuwi. Kapag walang trabaho, sa condo ni Shiela ito tumutuloy.

Kaya ngayon, nagulat siya nang makita niyang nasa bahay ito at hindi umaalis.

“Queen… damihan mo ang lulutuin, papasyal daw si Mama rito,” sabi nito mula sa likuran niya.

“Kaya naman pala…” mahinang usal niya.

Napatingin ito sa kanya.

“What?”

“Wala…”

“Ang sarap mo palang magluto, Iha. Ang swerte naman ng anak ko sa’yo,” masayang sabi ng ina ni King Lex.

“Oo naman, Ma,” sagot nito habang nakangiti at inakbayan pa siya.

Kung hindi niya lang alam na palabas lang iyon, baka ngayon tumatalon na siya sa tuwa.

“Ang sweet ninyong tingnan. Natutuwa akong maayos na kayo. Tama nga ang desisyon naming ipakasal kayo,” masayang sabi ng ginang.

Lalong sumikip ang dibdib niya. Kitang-kita niya ang pag-asa sa mga mata nito.

Hindi siya umiimik. Hinayaan niyang si King Lex ang magsalita.

“May hihingi sana akong pabor kung okay lang…” biglang sabi ng ginang.

Napatingin siya.

“Ano po ‘yon, Ma?”

“May business trip kasi ang papa ninyo, mga two weeks. Pwede bang dito muna ako tumira? Para may kasama ako. Kung hindi naman ako nakakaabala sa inyo.”

Nagkatinginan silang dalawa ni King Lex.

Kapag tumuloy ang ginang dito, malalaman nitong hindi sila okay… at baka madiskubre nitong magkaibang kwarto sila.

“Ahm kasi, Ma—”

Pinutol ni King Lex ang sasabihin niya.

“Sure, Ma. Okay lang ‘yon. May makakasama si Queen dito pag nasa office ako.”

Nagulat siya. Akala niya tatanggi ito. Kaya napilitan siyang tumango.

“Oo nga, Ma…”

“Salamat, mga anak. Babalik na lang ako mamaya. Ihahatid ko pa ang papa ninyo sa airport.”

Ihatid nila ang ginang palabas. Nang makaalis ito, bumaling si King Lex sa kanya.

“Pasok na tayo. Ililipat ko yung gamit ko sa kwarto mo. Baka magtaka si Mama kung bakit separate ang rooms natin.” Tahimik niya itong tinulungan.

“Dahil nandito si Mama, we should act like a real married couple. Pero ‘wag kang mag-assume, okay? Si Lyka lang ang mahal ko. Hindi ‘yon magbabago. Understood?”

“Ahm… okay,” mahina niyang sagot.

Ano pa nga ba ang magagawa niya?

Ganito ang papel niya—ang martir na asawa.