CHAPTER 2

PARA ng maiiyak si Anthony habang hinihintay lumabas ang mag-ama.  Hindi niya alam kung ano ang pinag-uusapan ng mga ito pero umaasa siyang hindi sana pumayag ang anak nitong makasal sa kanya.

            Hindi niya maintindihan ang Papa niya kung bakit siya nito pinipilit na mag-asawa eh lalaki nga ang type niya?

            Maluha-luhang tinawagan niya ang kanyang kakambal na si Andy, “I can’t believe this, Andy.  Ano ang akala sakin ni Papa? Isang burger na pwedeng ipalafang kahit na kanino?” Dinukot niya ang kanyang pamaypay mula sa dala niyang bag, “This is so stressful. My gosh, Andy, I can’t imagine myself with a woman!” Napapabilis ang paypay niya, para siyang masusuka habang iniisip ang kasalang senet-up ng Papa niya at ng kaibigan nito.

            Paniguradong magwawala ang boyfriend niyang si Basti kapag nalaman nito na gusto siyang ipakasal ng Papa niya.

            “Gusto kang maging lalaki ni Papa kaya nya ginagawa ‘yan. . .”

            “Which is impossible.  Kahit siguro wala ng tao sa mundo, hinding-hindi ako magkakagusto sa babae!”

            “Anthony, alam mo naman ang kalagayan ni Papa.  ‘Wag na ‘wag mo sana siyang bibigyan ng sama ng loob.” Sabi ng kakambal niya sa kabilang linya.

            Napasimangot siya, “Madaling sabihin saiyo ýan porke hindi ikaw ang nasa sitwasyon ko!”

            “Sorry na lang brother dear.  Kasi kung ako naman ang pipilitin ni Papa, okay lang naman sakin, after all, kapirasong papel lang naman ýan. Hindi naman ibig sabihin nyan kailangang maging loyal ka na sa mapapangasawa mo.  Ang mahalaga, sundin mo ang gusto ni Papa. . .”

            “Talaga lang ha? Eh kung sabihin ko kaya kay Papa na ikaw na lang ang pilitin nyang ipakasal sa anak ng kaibigan nya?”

            “No way! Over my dead body!” Mariing sagot ni Andy sa kanya.  “Alam mo namang may girlfriend na ako ‘no.”

            “Bakit, may boyfriend rin naman ako ah!” Yamot na sabi niya sa kakambal. Pinindot na niya ang end button nang lumabas muli ang mag-ama.  Tumuwid siya ng upo.  Mapapatay siya ng Papa niya kapag babakla-bakla siya sa harapan ng kaibigan nito kaya kahit hirap na hirap siya ay pinipilit niyang magpakalalaki.  Pero may mga pagkakataong di talaga niya mapigilan lalo pa at me pagkamaldita ang anak nito.  Pinagtaasan niya ng isang kilay ang babae nang pasadahan siyang muli ng tingin mula ulo hanggang paa.  Feelling mo? Hoy girl, mas maganda ko sayo! Gusto sana niyang sabihin dito.

            “Anong oras ba darating ang Papa mo para mapag-usapan namin ang tungkol sa kasal ninyo nitong unika ija ko.” Tanong ng kaibigan ng Papa niya na napag-alaman niyang Ariel ang pangalan.

            “On the way na po siya, Tito Ariel,” pa-macho ang tinig na sagot niya sabay irap sa anak nito nang muling magsalubong ang kanilang mga paningin.  Diyos ko, sarap ahitan ng makapal nitong kilay.  Pumilantik ang kanyang mga daliri.  Gustong-gusto na niyang sabunutan ang babae kung hindi lang nila kaharap ang tatay nito.

            Gosh, kung inaakala mong matitikman mo ang alindog ko, you’re wrong. Mamatay na muna ako bago ko pakasal sayo!

“UMAMIN ka na, alam kong malansa ka!” Sita ni Catherine kay Anthony nang sila na lamang dalawa ang naiwan sa salas habang ang Daddy niya at ang father ni Anthony ay busy sa pag-iinuman sa may wine bar malapit sa kanilang kusina.

            Inirapan siya ni Anthony, “Alam mo na pala, bakit pumayag ka pa ring pakasal sakin?”

            “Me magagawa pa ba ko kung iyakan na ko ng Daddy ko? Ikaw dapat ang umurong sa kasal eh.”

            “Bakit ako? Dapat ikaw ‘no,” Taas ang kilay na sabi nito sa kanya, “Ikaw ang babae kaya dapat ikaw ang magdedesisyon sa buhay mo!”

            “Gusto mong atakehin sa puso ang Daddy ko? Sya na lang ang meron ako kaya mas gugustuhin ko pang pagtiisan ka, kesa naman may mangyaring masama sa Daddy!” Muli niyang naalala ang naging pag-uusap nila kanina.  Dalawang beses pa lang niyang nakitang umiyak ang Daddy niya.  Nuong mamatay ang Mommy saka kaninang nag-uusap sila ng heart to heart.  Kaya kahit tutol ang kalooban niya ay napapayag na rin siya nito.  Handa niyang isakripisyo ang kanyang kalayaan mapagbigyan lang ang kanyang pinakamamahal na ama.

            “Wow ha? Ikaw pa ‘tong magtitiis sakin? Uy, baka gusto mong humarap sa salamin? Saka, hindi ka ba tinuturuan ng nanay mong mag-ahit ng kilay?” May pagkamalditang tanong nito sa kanya.

            “Twelve years old pa lang ako nang mamatay sa cancer ang nanay ko.”

            “Oh, I’m sorry. . .” Biglang lumambot ang mukha nito, “But God, I really can’t marry you for obvious reason. . .”

HINDI makatulog si Anthony ng gabing iyon.  Tinawagan niya ang kasintahang si Basti. Hindi siya makapapayag na makasal sa babaeng iyon.

            Hindi siya papayag na kontrolin ng Papa niya ang buhay niya.

            “Hello, Basti?”

            “Yes, sweety?”

            May naulinigan siyang malakas na tugtugan sa background nito, “Asan ka? Nakikipagparty ka na naman ba?”

            “Sweety, nagkakatuwaan lang kami ng barkada.  Napatawag ka?”

            “Magtanan na tayo sweety.  Ilayo mo ko dito sa bahay.  Kailangan kong makatakas kay Papa at sa babaeng iyon!”