Chapter 06

SA kabila ng malamig na buga ng aircon sa reception hall ng hotel, pinagpawisan si Gracie sa mga nangyayari sa birthday party ng kanyang step-father. Isang malaking iskandalo ang sumabog sa marangyang pagtitipon na iyon at siya mismo ang involve.

“Miss, ikaw ba ‘yung nasa video?” tanong ng katabi niyang guest sa okupadong table. Isang babae na nasa kalagitnaan ang edad na titig na titig sa mukha niya. “Hawig na hawig kayo eh.”

“Oo tama ka Mrs. Royales, ang laki ng resemblance niya sa babaeng nasa video,” segunda ng isang babaeng guest na mas bata.

Napatitig sa kanya ang lahat ng naroon sa table. Isang komosyon ang nangyayari sa paligid. Hindi niya malaman kung paano kikilos sa mga oras na iyon na ibinababad na siya sa suka ng kahihiyan. Gusto na niyang magpalamon sa lupa kung pwede nga lang.

Narinig niya ang pagsigaw ni Lucia para ipatigil ang nagpi-play na video. Sa stage nakita niya si Oliver na pilit na nagpapaliwanag kay Tatiana pero sinampal ito ng huli. Kita naman sa mukha ni Armando ang pinipigil na galit.

“Miss ikaw ba talaga ‘yung nasa video?” untag kay Gracie ng isang male guest na naroon din sa table. Tila iisang mata na nakatingin sa kanya na hinihintay ang sasabihin niya.

Ramdam niya ang matinding pangangatog ng tuhod niya na inalisan siya ng lakas na ialis ang sarili sa lugar na iyon.

“Ikaw! Ang lakas ng loob mo!”

Natulig ang magkabilang tainga niya at pakiramdam niya ay naalog ang utak niya sa isang malakas na sampal na dumapo sa pisngi niya. sa pag-angat niya ng tingin ay tumambad sa kanya ang galit na mukha ni Tatiana. Hindi niya namalayan na nakalapit na sa kanya ang kapatid.

Napaawang ang labi niya na hindi malaman ang sasabihin.

“Ninakaw mo na nga ang business proposal ko at pati ba naman boyfriend ko ay aagawin mo rin. Isa kang malaking ahas na inalagaan ng pamilya naming. Mang-aagaw ka Gracie!” Singhal ni Tatiana.

Mula sa katatapos na video ay sa kanilang dalawa naman ng kapatid nabaling ang atensyon ng mga bisita.

Mang-aagaw ka Gracie!

Nagpanting ang tainga niya sa sinabing iyon ng half-sister niya. Umahon ang dugo sa ulo niya saka napatayo siya. “At ano ang pakiramdam ang maagawan my dear sister?”

Pinanindigan niya ang paghuhusga na tinatamasa niya. Binigyan niya ng sarkastikong ngiti si Tatiana na lalong ipinangalaiti nito.

“Walang hiya ka! At talagang proud ka sa ginawa mo!” nadagdagang galit na sabi ni Tatiana.

“Of course, total ikaw ang dahilan kung bakit naging ganito ako. In fairness ang galing ni Oliver.” Inilapit niya ang labi sa kaliwang tainga ng kapatid saka bumulong. “Sa kama.”

Sa sumunod na sandali ay naramdaman niya na may sumaklit sa buhok niya at kulang na lang ay mapunit ang anit niya. Gumanti siya ng sabunot kay Tatiana kung saan nagtagumpay siyang mahila rin ang buhok nito.

Pareho silang gumaganti ng malakas na pwersa sa isa’t isa. Tinitiis niya ang pisikal na sakit nadarama niya sa ulo. Hanggang sa may malakas na pwersa na pilit silang pinaghiwalay.

“Enough of this!” ang galit na tinig ng isang lalaki. “Dinagdagan n’yo pa ang kahihiyan sa mismong birthday ko.”

“It’s all because of her Pa.” nanlilisik ang mga mata na itinuro siya ni Tatiana. Namumula na ang mukha nito sa matinding galit.

Sinapo ng sariling kamay ni Gracie ang kumikirot niyang anit. Naka- distanya na siya sa kapatid. Nanatiling malaking attraction sila sa maraming bisita habang ang iba ay kinukuhaan sila ng video.

“I’m very much disappointed to you Gracie.” Naiiling na pagbaling sa kanya ni Armando. “Hindi ko akalain na ganito ang igaganti mo sa kabila ng pagkupkop ko sa’yo. Itinuring pa naman kitang kapamilya-”

“Kahit kailan ay hindi ninyo ako itinuring na bahagi ng inyong pamilya,” mabilis na singit niya. “Ang lahat ng ibinigay ninyo sa akin ay binayaran ko ng pagtatrabaho sa kompanya ninyo. Kaya wala kayong karapatan na sumbatan ako ng ganyan.”

Sa wakas ay nagkaroon din siya ng pagkakataon na maisatinig ang mga sama ng loob na naipon sa dibdib niya. iyon nga lang ay sa isang akward na sitwasyon.

“Inggrata!” Isang malakas na sampal ang natanggap niya mula kay Lucia. “Mana ka talaga sa walang hiya mong ama. Ikinakahiya kita na naging anak kita.”

Sa butil ng pawis sa mukha niya ay sinabayan ng likido ng mga luhang bumalong sa mata niya. Tila tinarakan ng punyal ang puso niya. matapang na sinalubong niya ang titig ng sariling ina. “You never been a mother to me. Dahil sarili mo lang ang iniisip mo.”

Akmang sasampalin siyang muli ni Lucia pero mabilis na napigilan ito ni Armando. “Umalis ka ngayon Gracie hanggang kaya ko pang magtimpi ng galit ko sa’yo. Umalis ka na rin sa buhay namin at huwag na huwag ka nang babalik pa.”

“Hindi pa tayo tapos Gracie, tandaan mo ‘yan,” pagbabanta ni Tatiana.

Isang nanlilisik na tingin ang ipinukol niya sa tatlo at ganap na siyang lumakad paalis sa lugar na iyon. Sinadya niyang bungguin sa balikat nito si Tatiana saka nilagpasan na ito.

Ramdam niya ang maraming mata na nakatingin pa rin sa kanya sa kanyang pag-alis. Ang ganap niyang paglaya sa marangyang mundo na bumilanggo sa kanyang buhay nang mahabang panahon.

Sa paglabas niya ng hotel ay hindi na niya napigilang bumalong ng tuloy-tuloy ang luha niya. Naroong napahagulhol na rin siya.

“KUNG may problema dito sa unit mo ay tawagan mo agad ako.”

“Sige po Mrs. Paz, maraming Salamat po,” tugon ni Gracie sa kasera ng apartement na bagong tutuluyan niya.

Ilang saglit ay umalis na rin si Mrs. Paz. Isinara na niya ang pinto ng unit niya. Napapatulala na napaupo siya sa sofang naroon. Nakalapag pa sa sahig ang mga bag na kinalalagyan ng gamit at damit niya. Nanghihina pa siyang ayusin iyon.

Ngayong gabi ay ang daming nangyari sa buhay niya. pagkagaling niya sa hotel ay nagtungo siya sa mansion ng mga Luistro para kunin ang mga gamit niya. sa tulong ng kaibigan niyang nasa abroasd na si Anika ay nai-recommend siya sa apartment ng tita nito na siyang tinutuluyan ngayon.

Kailangan na maging mas matatag ako ngayon. Ako na ang gagawa ng sarili kong buhay at sisiguradihin ko na magtatagumpay ako.