Chapter Seven

PADABOG na pumasok si Aries sa loob ng living room at pinagsusuntok ang pader. Inihagis niya ang mga gamit na hawak niya. Ikinagulat ito ni Aling Delia, ang isa nilang kasambahay, kaya tumakbo ito pabalik sa kusina dahil sa takot kay Aries. Pakiramdam niya'y lulukso ang puso niya sa nerbyos; kakaiba kasi ang pagwawala ni Aries—para itong batang may kulang sa pag-iisip, sinisira niya ang lahat ng maabot niya. Napaatras siya nang masalubong niya si Don Manuel na may dalang bote ng alak.

"Anong nangyari at namumutla ka?" tanong ni Don Manuel kay Aling Delia.

"Si Sir Aries po, nagwawala na naman po," nanginginig na sagot nito.

Napabuntong-hininga si Don Manuel at nagtungo sa living room. Nasa bungad pa lang siya ay dinig na dinig na niya ang pagwawala ni Aries, na para bang isang batang nagpapalahaw.

"Aries, tumigil ka!" sigaw ni Don Manuel. Tumigil lamang si Aries nang marinig ang boses ni Don Manuel. Umupo siya sa mahabang sofa, kuyom ang mga kamao. May pasa sa mukha at sugat sa labi si Aries, marahil ay nakikipag-away na naman siya.

"Ano na naman ang nangyari at nagwawala ka?" Lumapit si Don Manuel sa anak, hinawakan ang mukha nito, at sinipat-sipat ang mga sugat.

"Kasalanan 'to ni Cassandra! Sinuntok ako ng bodyguard niya!" Tumayo si Aries, tikom ang mga kamao.

Napailing si Don Manuel at nagsalin ng alak sa baso. Sinimsim niya ito bago muling bumaling kay Aries.

"Hindi na ako magugulat, Aries. May ginawa ka na naman sigurong kalokohan kaya ka napagdiskitahan ng mga bodyguard niya.”

"That guy…" Huminga muna nang malalim si Aries; hindi maalis ang galit sa kanyang mukha. Nakatikom ang kanyang mga kamao at napasuntok na lamang siya sa hangin dahil sa inis.

"You're acting like a kid, Aries," sabi ni Hudson.

Napalingon si Aries nang marinig niya ang boses ni Hudson na nakatayo sa gilid ng main door ng living room, habang nakamasid at nakikinig kay Aries.

Si Hudson, ang panganay na anak ni Don Manuel at madalas na kalaban ni Aries sa lahat ng bagay—maging sa atensyon ng kanilang ama—ay itinuturing na mas magaling at mas matalino ni Don Manuel kaysa kay Aries, na palaging umaasa sa kanilang ama.

"Huh! Huwag kang makialam dito! Tumahimik ka na lang!" sigaw ni Aries.

Ngumisi lamang si Hudson, nilapitan ang kapatid, hinawakan ang mukha nito, at tiningnan ang sugat.

"Galos lang 'yan, tol," sabi ni Hudson, sabay tapik sa balikat ni Aries. Pasalampak na naupo si Hudson sa mahabang sofa at pinagmasdan ang kapatid.

"Mind your own business, Hudson," galit na sabi ni Aries.

"Grow up, bro. Hindi dapat iniiyakan ang maliit na bagay," pangungutya ni Hudson.

"Damn you, Hudson! Hindi ito basta maliit na bagay lang!"

"Tumigil na kayo, pwede ba? Para kayong mga bata!" bulyaw ni Don Manuel. Inihagis niya ang hawak na baso; ang mga piraso nito ay nagkalat sa sahig na marmol. Kapwa nanahimik sina Aries at Hudson at nagkatinginan. Iba na ang usapan kapag ang kanilang ama na ang nagalit at nakisali sa kanilang pagtatalo.

"I leave it all to you, Dad. Huwag mong aasahan na makikisali ako sa gulo na ginawa ni Aries."

Nagkibit-balikat si Hudson at iniwan ang kanyang ama at si Aries. Hahayaan niyang magtalo ang dalawa; ayaw niyang makisali sa gulo na ginawa ni Aries. Napamaang si Aries sa mga sinabi ni Hudson at bumaling sa kanyang ama, na para bang lalamunin siya sa galit.

"Papa, do something. Ayaw kong mawala si Cassandra."

"Bukas na tayo mag-usap, Aries. Anong akala mo? Maaga pa? Alas-dose na ng madaling araw! Kung ayaw mong magpahinga, huwag mo akong idamay."

"Do something, Papa! Ayaw kong mapahiya kay Cassandra! Kung hindi mo ako tutulungan, sisiguraduhin kong pagsisisihan mo ito!”

Padabog na nilisan ni Aries ang living room at naiwan si Don Manuel na nakatayo lamang at napamaang sa mga inasal ng kanyang anak. Tama si Hudson, Aries is still acting like a kid. Nangangamba siya sa mga banta nito. Kahit kailan ay hindi pa ito nagsabi ng hindi niya ginagawa, nagbigay kuryosidad tuloy sa kanya ang sinasabing Bodyguard ni Cassandra. Malakas ang loob niya para saktan si Aries. Walang sinuman ang maglalakas ng loob na kantiin si Aries sa loob ng mansyon ng Belmonte. Sino ang pinagmamalaki ng lalakeng iyon, napangisi na lamang siya at sabay sindi ng sigarilyo at sunod - sunod na hinitit ito.