Chapter 3

"Tapos ko na pong linisin ang lahat, Sir," wika ni Erica nang malagay niya sa loob ng basurahan ang lahat ng mga kalat na nasa sofa kanina.

Nagtataka pa rin siya kung bakit ganoon kadami ang mga kalat na nandoon gayong nung umalis siya ay malinis na ang office nito.

"Do you want coffee? Or juice, water?" tanong ni Sir Elias mula sa likuran. Saglit itong sinulyapan ni Erica at mabilis siyang lumingon.

"Sir," nag-aalalang sabi niya. Bakit nag-aalok nito ng kape? Ganito ba ito sa lahat ng mga trabahante rito?

Yumuko siya sandali sa kanya at mabilis na tumalikod at naglakad. Ngunit nakakatatlong hakbang pa lang siya ay nagsalita ulit ito.

"May ipapalinis pa sana ako sa 'yo," dagdag ni Sir Elias.

Umubo na naman si Samuel.

"Saan po, Sir?" tanong ni Erica at inayos na ang kanyang mga panlinis na dala.

"'Yong banyo sana. Tumae kasi si Samuel doon kanina, ipapalinis ko sana," sagot ni Sir Elias.

"Tumae ba ako, Sir? Hindi ako pumapasok d'yan sa banyo mo tapos ako pa ang aakusahan mong tumae d'yan? Ikaw lang naman ang nakakapasok sa CR mo. Sa labas kaya ako nagbabanyo!" pagrereklamo ni Samuel.

Sumenyas si Sir Elias na lumapit ito sa kanya, na agad namang sinunod ng secretary nito.

Inakbayan nito si Samuel at tinapik ng malakas ang balikat nito. Napangiwi si Samuel at sunod-sunod itong tumango. Kahit si Erica ay napangiw dahil mukhang masakit iyon.

"Oo! Oo tumae ako d'yan kanina. Tumae ako. Pero hindi naman mabaho at wala naman akong iniwang bakas d'yan. Ipapalinis lang ulit ni Sir Elias. Alam mo naman 'tong boss natin, ayaw niya sa madudumi kaya gusto niya malinis lahat ng nasa paligid niya," nagkamot pa si Samuel ng batok at dahil maputi ay halata ang pamumula ng magkabilang tainga nito.

"Tama. Mabuti at hindi natin nakalimutan na ipalinis ang banyo, 'no? Masakit kasi ang tiyan niya kanina kaya limang beses atang pumasok sa banyo ko," dagdag ni Sir Elias.

Nalaglag ang panga ni Samuel sa narinig.

"Limang beses?" tanong ni Samuel, bakas sa mukha nito ang pagtataka.

Muling tinapik ni Sir Elias ang balikat nito. Hindi nga kasi tapik kundi parang hampas na. Sa sobrang lakas, parang matatanggal ang baga ni Samuel. Napaubo ito.

"Tama! Limang beses akong pumasok d'yan. Masakit pa nga hanggang sa ngayon." Humawak ito sa kanyang tiyan. "Tinitiis ko na lang. Kaya pakilinis lang ng banyo ni Sir Elias, ah? Pasensya ka na. Dito ang banyo niya, pumasok ka na lang sa loob," wika ni Samuel.

Kahit naguguluhan sa inaasta nila, pumasok pa rin si Erica sa loob ng banyo. Ang inaasahan niya ay bubungad sa kanya ang mabahong amoy at maduming banyo. Ngunit kabaligtaran ang bumungad sa kanya.

Malinis na malinis ang buong banyo at mabango. Sabi nila madumi ito? Lumapit si Erica sa bowl at makintab pa iyon sa kanyang mukha. Wala namang dapat na linisin dito sa loob. Wala siyang makitang madumi kaya ano ang lilinisin niya rito?

Lumabas siya upang magtanong sa kanila. Naabutan niya silang dalawa na nagsisigawan. Ang ulo ni Samuel ay nasa gitna ng kilikili ni Sir Elias at panay naman ang hampas ni Samuel sa kamay nito upang bitawan siya nito.

"Hindi na ako makahinga! Bitawan mo nga ako!" sigaw ni Samuel.

Kahit si Erica ay natatakot na dahil namumula na ang mukha ni Samuel.

"Ahhmm... Ano po ang nangyayari?" tanong ni Erica.

Napatigil silang dalawa. Nang mag-angat ng tingin sa kanya si Sir Elias ay matamis itong ngumiti sa kanya at binitawan si Samuel.

Napahawak kaagad ito sa kanyang leeg at naghahabol ng hininga nito.

"Ayos lang po ba kayo? Nakakahinga naman po kayo ng maayos?" nag-aalalang tanong ni Erica rito.

Si Sir Elias na ang sumagot para sa kanya. Ayan na naman siya sa pagtapik sa balikat, parang hampas na.

"Ayos lang siya. Training niya lang ito. Anyways, tapos ka na bang maglinis? Mabaho ba sa loob kaya ka lumabas? Ang dugyot mo talaga, Samuel! Nakakahiya sa kanya!" sabi ni Sir Elias.

"Wala naman pong kalat sa loob, Sir. Malinis naman po ang banyo niyo at wala naman pong dapat na linisin," sagot ni Erica.

Nagkatinginan silang dalawa. Si Samuel ay hinahaplos pa rin ang kanyang leeg.

"Kung wala na po kayong ipapalinis sa akin ay lalabas na po ako, Sir," paalam ni Erica sa kanila.

Bitbit ang kanyang mga panlinis ay naglakad siya palabas. Kinuha niya na ang kanyang mga gamit para makauwi na ng bahay. Dadaan pa siya sa tindahan para bumili ng bigas at ulam.

Pinahiram siya ng pera ni Sanya. Ibibili niya rin ng gatas ang anak niya. Nagpapadede pa rin siya sa kanya. Pero sinanay niya ang anak na uminom sa milk bottle para sa tuwing may trabaho siya ay may pamalit.

Naabutan niya na naglalaro sa sala ang anak niya nang pumasok siya sa loob.

"Mellie! Nandito na si Mama!" sigaw ni Erica.

Nang marinig ng anak niya ang boses niya ay agad itong tumingin sa pintuan. Mabilis nitong iniwan ang mga laruan. Ang mga maliliit nitong mga paa ay tumakbo papunta sa kanya. Muntik pa itong matumba ngunit nasalo niya ito. Yumuko siya upang buhatin ito.

"Kumusta ang Mellie ko? Naging good girl ka ba kay Lolo at Lola habang wala si Mama?" tanong niya gamit ang pambatang boses.

"Es! Es!" sagot ng anak niya at hindi pa mabigkas ang letrang Y.

"Hindi ka umiyak?" tanong niya.

Umiling ito. "'Mellie di iyak," sagot ng anak niya.

Tinuro pa nito ang kanyang sarili. Pinugpog niya ng halik ang buong mukha ng anak bago ito nilapag sa sahig.

Nahirapan siya ng husto nung nanganak siya sa kanya. Sa center lang siya nanganak at midwife ang nagpa-anak sa kanya. Kasama niya pa ay 'yong isang kapit-bahay nila dahil hindi maiwan- iwan ni Lolo si Lola sa bahay.

Kaunti lang ang mga gamit ng anak niya. Buti na lang noong malaki-laki na si Mellie ay may mga mabubuting puso na nagbibigay sa kanya ng mga damit. Naaawa rin ang mga ka-barangay dahil sa sitwasyon nila.

Si Erica lang ang may kakayahang maghanapbuhay sa kanila. At apat pa silang nasa bahay. Kaya sa tuwing may ipapagawa sila, may ipapalinis, o ipapalabang mga damit ay si Erica agad ang kanilang tinatawagan.

"Erica, nandito ka na pala. May dala ka bang bigas? Hindi pa ako nakakapagsaing dahil wala na tayong bigas," sabi ni Lolo.

Lumapit muna si Erica upang magmano.

"May binili po ako, Lo. Nandoon po sa sala, may sardinas din akong binili d'yan para pang-ulam natin mamaya," sagot niya.

Mabilis na kinuha ni Lolo ang bigas para makapagsaing na. Dalawang kwarto lang ang bahay nila. Ang maliit na sala ay wala masyadong gamit kung hindi ang malaking sofa lang at ang lumang divider. Naalala ni Erica nung bata siya ay marami pang laman itong sala nila. May TV pa sila. Kaso nung nawala ang mga magulang niya ay unti-unting binenta ang mga gamit hanggang sa ito na lang ang natira.

Magkatabi lang ang bahay nila ng Lola at Lolo niya. Kaya nung mawala ang mga magulang niya ay dito na sila tumira. Gawa ito sa semento pero ang bubong ay marami ng butas dahil sa tagal ng panahon. Tumutulo sa tuwing malakas ang ulan at kailangan maglagay ng timba para hindi bumaha sa loob.

Kinabukasan ay pumasok ulit siya sa trabaho. Sa ibang floor ang lilinisin niya pero ilang minuto lang ang nakalipas ay bigla na lang siya sa top floor kung nasaan ang office ng CEO.

Naglalakad pa lang siya sa hallway ay nakita niya na agad si Samuel sa labas ng office ni Sir Elias. Nakatayo ito na parang isang guard.

"Good morning po!" nakangiting bati niya at tumungo.

"Good morning. Bilin pala ni Sir na unahin mo raw munang linisin ang hallway bago ang office niya dahil may meeting pa siya at malelate siya ng punta rito," sabi ni Samuel.

Kumunot ang noo niya. Mas mabuti nga na wala pa si Sir Elias, lilinisin niya na ang office para kapag nagtrabaho ito ay wala ng istorbo. Ngunit bakit baliktad ito?

"Makakaistorbo po ako kung mamaya ko pa lilinisin ang office niya. Mas mabuti pong habang wala siya ay sisimulan ko na po," sagot niya.

Iniiwasan niya rin na makita ito dahil pinapaalala ni Sir Elias sa kanya ang nangyari nung gabing iyon. Sa dami ng naikama niyang babae, naalala pa siya?

Umiling si Samuel bago ngumiti sa kanya. "Unahin mo na lang dito sa hallway. Iyon kasi ang bilin niya sa akin. Tatawagin na lang kita mamaya kapag nandyan na siya," sabi nito.

Gulong-gulo siya habang nagmamop ng sahig. Walang ibang dumadaan at pumupunta sa floor na ito. Kesa doon sa baba na marami siyang nakakasalubong. Siguro dahil nandito ang office ng CEO kaya hindi pwedeng bastabasta lang tumapak dito.

Bandang alas-nwebe ay dumating si Sir Elias. Kumaway-kaway pa ito sa kanya kahit nasa pinakadulo siya ng hallway at ganoon din siya.

"Erica!" excited itong pumunta sa pwesto niya. May halo ng takbo ang bawat lakad nito. Ang presko nitong tingnan sa suot na white longsleeve at itim na trousers. Hindi nakikita ang mga tattoo nito sa braso. Bumaba ang tingin niya sa katawan nito at naalala niyang may mga tattoo rin ito sa dibdib.

Tumikhim ito nang maabutan niya na nakatitig sa katawan nito. Nahawakan niya na rin iyon dahil pinahawak niya sa kanya nung may nangyari sa kanila. Pilit niya na binaon sa limot.

"Pumasok ka na sa loob. Simulan mo na ang paglilinis dahil nandito na ako," utos ni Sir Elias.