Kabanata 32

NASA gitna ng isang importanteng meeting si Jacob, pero wala roon ang isip niya. Ni hindi nga niya naiintindihan kung ano ba ang mga sinasabi ni Lilibeth sa unahan nang sandaling iyon. Lipad ang utak niya sa kakaisip kung nagdududa na ba si Adelyn sa kanya. Hindi niya inaasahan ang komprontasyon nito sa pagtulong sa kanila ni Anton nang utusan niya itong magpaggap isang linggo na ang nakakaraan. Isa pa, napapansin niya na mula noon ay naging madalas na ang pagtatanong ng kanyang asawa tungkol sa mga bagay-bagay na dati ay hindi naman nito ginagawa.

“Jacob?” Lilibeth slammed her hand on the table, making him flinch. “Jacob, are you with me?”

Naipilig niya ang ulo pagkatapos ay nilingon ito.

“Y-yeah.” Tumikhim siya at umayos sa pagkakaupo.

“Kung gano’n, ano ang masasabi mo?” Pinagsalikop ni Lilibeth ang mga kamay sa ibabaw ng mesa.

“Masasabi about what?”

Tumaas ang kilay nito.

“See? You’re not with me,” umiiling na saad nito.

“I’m sorry.” Humugot siya ng isang malalim na hininga.