Chapter 3 - Growing lies

Main Office, Florencio Group.

Banaag ang iritasyon sa mukha ni Darvis ngunit agad naglaho iyon pagkatapos niyang marinig ang sinabi ni Psalm. Matinding ligalig ang umukit sa mga mata ng lalaki. 

"Hon, masyadong busy ngayon sa kompanya dahil sa pagpasok ng bagong investors. I'm sorry kung nawalan ako ng oras para samahan ka. Uuwi ako ng maaga, okay? Huwag ka nang magalit." Nilangkapan niya ng lambing ang boses.

Walang sagot mula sa kabilang linya. Humigpit ang puso ni Darvis. Masyado na ba niyang napabayaan ang asawa? Huminga siya ng malalim at muli sanang magsasalita pero naunahan siya ni Psalm.

"Ano'ng oras ka uuwi?" Bakas ang pagod sa tono ng babae.

Nakahinga siya ng maluwag at sinipat niya ang suot na relos.

"Six o'clock," may alanganin niyang sagot.  

"Okay," kaswal na tugon ni Psalm at tinapos ang tawag nang hindi man lang nagpaalam.

Nang marinig ang pagkaputol ng linya ay naupo muli sa swivel chair si Darvis at bahagyang ngumiti. Clingy pa rin talaga ang asawa niya. Hindi naman sa ayaw niya ng ganoon. Binalingan niya ang nakabinbin na trabaho. 

Nitong mga nakaraang araw masyado siyang nasabik kay Pearl. Maraming alam ang isang iyon at hindi niya matanggihan. Nawalan tuloy siya ng oras kay Psalm. Siguradong nalulungkot ang asawa niya. Alam naman niyang mali ang kaniyang ginagawa pero kailangan niya ng tagapawi ng stress at ng init ng kaniyang puson. Kahit may affair siya sa ibang babae hindi maikakailang si Psalm pa rin ang mahal niya, hindi magbabago iyon.

Tumunog ang kaniyang cellphone at natigil sa pagsirko ang isip niya.

Si Pearl ang tumawag.

"Ano'ng problema?" pormal niyang sagot.

"Kuya, nami-miss na kita." Nanuot sa tainga niya ang malambing na boses ng babae. "Alam mo ba, bumili ako ng bagong lace gown, gusto mo bang makita?"

Lumundag ang Adam's apple ni Darvis at bumigat ang kaniyang paghinga. Nagbalik sa alaala niya ang makinis na alindog ni Pearl. Pero may pangako siya kay Psalm na uuwi ng maaga ngayon. Kailangan niyang pigilin ang sarili. 

"Uuwi ako ng mansion ngayong gabi," sabi niya.

"Kuya, ayaw mo ba talaga akong samahan? Mahal kita alam mo iyan, mas mahal kita higit kaysa pagmamahal sa iyo ni ate."

"Pearl, pinag-isipan mo ba kung sino tayo para sa isa't isa? Kung sino ka?" Malamig niyang kastigo sa kausap. "Kapatid mo ang niloloko natin, naisip mo ba iyon? Pumayag akong ikama ka kapalit ng pera, huwag kang maghangad na makuha ang pag-ibig ko. Si Psalm lang ang pwedeng magmamay-ari ng puso ko. Kung wala ka nang sasabihin ibababa ko na 'tong phone, may tatapusin pa akong trabaho."

Oras na siguro para klaruhin niya kay Pearl kung saan ang lugar nito sa buhay niya. Wala siyang pakialam kung magalit ito at magtampo. Hindi naman siya nagkulang, sa simula pa lang ay alam na nito kung ano lang ang hangad niya. 

Narinig niyang iingos-ingos sa kabilang linya ang babae. 

"Bakit feeling ko ngayon hindi mo nagustuhan ang mga ginagawa natin sa kama? Pero bakit nagagawa mo akong galawin ng ilang beses? Akala ko mahal mo ako. Kahit kunti ba ay wala kang nararamdaman para sa akin?"

Matagal na hindi nakasagot si Darvis. Bumuntong-hininga siya.

"Si Psalm lang ang mahal ko."

"Ganoon ba? Wait lang, may ipapakita ako sa iyo, Kuya." 

Ipinasa sa kaniya ni Pearl ang resulta ng pregnancy test. Saglit siyang hindi nakakilos.

"Buntis ka?"

***

Florencio Mansion...

Mapait na ngumiti si Psalm. Nagmadali pa siyang umalis ng hotel para umuwi rito. Pero wala namang Darvis na dumating. Bakit pa kasi siya naniwala sa sinabi nito kanina. Siguro ay umaasa ng kaunti ang puso niya na baka may pag-asa pa na maayos ang pagsasama nila.

Sinuyod niya ng tanaw ang buong garden kung saan naka-setup ang magarbong buffet. Dati tuwing anniversary nila, binibigyan nila ng day off ang mga kasambahay at may kasama pang cash gifts.

Ngayon din naman. 

Dati masaya niyang ipinamudmod ang gifts nila habang pinagtatawanan siya ni Darvis dahil mas excited pa raw siya dahil sa ingay niya at pagiging atat na buksan ang cash gifts.

Ngayon, walang Darvis na naroon. 

"Ma'am, sobrang busy siguro ni Sir sa trabaho kaya hindi siya nakauwi pero tiyak iniisip niya kayo ngayon." Pangongonsola ng ilang katulong. Alam ng mga kasambahay kung gaano siya kamahal ng asawa niya. Malamang ay nagtataka na ang mga ito.

"Alam ko, don't worry, okay lang ako. Sige na, enjoy n'yo ang gabi."

"Kahit papaano, Ma'am, maswerte pa rin kayo kay Sir, hardworking po siya."

Ngumiti siya ng mapakla. Hardworking sa hita ng ibang babae. 

Pagkatapos kumain ng mga kasambahay ay kaniya-kaniyang umalis ang mga ito. Naiwan siyang mag-isa sa dambuhalang mansion.

Habang nakatitig sa liwanag mula sa kandela, naisip niya kung gaano kawalang-hiya ang asawa niya. Mahal daw siya. Bwesit! Sumobra pa ang pagmamahal nito sa kaniya kaya umapaw iyon at napunta sa puson nito? Magtaksil na lang, sa sariling kapatid pa niya? Nakakatawa! Kapag nalaman ng lipunan ang tungkol sa ginawa nito, malamang pati sa kabilang buhay ay ekis ito kay Satanas.

Nag-vibrate ang cellphone na nasa tabi niya sa couch. Pumasok ang chat ni Darvis.

Husband: Hon, may urgent dito sa opisina. Bukas na ako makakauwi, may regalo ako sa iyo. Gusto mo bang magbakasyon muna?

Klaro na sa kaniya. Si Pearl ang pinili ni Darvis. Buti naman, ngayon malinaw na sa kaniya. Hindi na siya lilingon pa sa nakaraan kahit maraming magagandang alaala roon. 

Hinaplos niya ang tiyan. Maingat na dinama ang buhay na pumipintig sa kaniyang sinapupunan. 

"Baby, hindi na natin kailangan ang Papa mo. Ikansel na natin siya sa buhay natin, okay? Ibibigay ni Mama sa iyo ang pagmamahal na walang kapantay."

Ang pahayag niyang iyon ay hindi lang para sa bata kundi para na rin sa sarili niya. Matagal na panahon ding nakatuon lang siya kay Darvis at halos kalimutan na niyang mahalin ang kaniyang sarili. Babawi siya. 

"Goodbye, Darvis. Sana ma-realize mo na hindi ka naging karapat-dapat sa akin at sa pagmamahal ko."

Dinampot niya ang cellphone at nag-reply sa chat ng asawa.

Wife: Okay. Birthday mo na nga pala in three months' time, may hinanda akong gift para sa iyo, sana magustuhan mo.

Husband: Really? Excited akong malaman kung ano iyon.

Mapait na ngiti ang sumilay sa kaniyang labi. Nakasanayan na niyang maghanda ng regalo tuwing kaarawan ng asawa. Hopefully, masisiyahan ito sa ibibigay niya ngayon. Ibababa na sana niya ang phone nang mag-chat naman si Pearl.

Pearl: Ate, kasama ko si Kuya Darvis, kita mo na, ako ang pinili niya. Kawawa ka naman. Huwag ka na kasing umasa, hindi mo naman siya mabigyan ng anak.

Para na siyang sinasakal ng paninikip ng kaniyang dibdib. Pero hinamig niya ang sarili. Magiging matatag siya alang-alang sa kaniyang anak.